અમદાવાદઃ કોલસેન્ટરમાં કામ કરતાં પ્રેમમાં પડી મેરેજ કર્યા ને લોકોને ધૂતવા કોલ સેન્ટર શરૂ કર્યું

અમદાવાદઃ થાણેના કોલ સેન્ટર કૌભાંડનો પર્દાફાશ થયા પછી ગુજરાત પોલીસે અમદાવાદ અને અન્ય જગ્યાએ ગેરકાયદે ચાલતાં કોલસેન્ટરો પર તવાઇ બોલાવી છે, ત્યારે અમદાવાદના ચાંદખેડામાંથી વધુ એક કોલસેન્ટર પકડાયું છે. વિદેશીઓને ડરાવીને પૈસા પડાવતા કોલસેન્ટર પર દરોડો પાડીને પોલીસે એક યુગલની ધરપકડ કરી છે. આ યુવક-યુવતી ત્રણ વર્ષ પહેલા પ્રેમમાં પડ્યા હતા અને આ પછી લવ મેરેજ કરી લીધા હતા. એટલું જ નહીં, વિદેશીઓને ધૂતવા માટે તેમણે કોલ સેન્ટર શરૂ કર્યું હતું.

ચાંદખેડા પોલીસને કંટ્રોલ મેસેજ મળ્યો હતો કે પરમેશ્વર-3 ના આ ઘરમાં કોલસેન્ટર ચાલે છે. જેના આધારે પોલીસે રેડ કરી પ્રાથમિક રેડમાં પોલીસે લેપટોપ કબ્જે કરી તાપસ શરુ કરી તો પોલીસને લેપટોપમાંથી કોલસેન્ટર ચાલાવવા માટે જે જે વસ્તુ ની જરૂર હોય એ તમામ વસ્તુઓ મળી આવી હતી. આ પછી પોલીસે ફરિયાદ દાખલ કરીને પોલીસે દંપતીની ધરપકડ કરી હતી.

છેલ્લા ત્રણ વર્ષમાં આ દંપતીએ લાખો રૂપિયાનું ટર્નઓવર કર્યાનું પોલીસ માની રહી છે. આ ઉપરાંત પોલીસેને લેપટોપમાંથી ન્યુ યોર્ક સરકારના સહી-સિક્કાના લેટરપેડ અને ન્યુ યોર્ક ડિસ્ટ્રીક કોર્ટના નામના દસ્તાવેજ પણ મળી આવ્યા છે.

ચાંદખેડાની પરમેશ્વર સોસાયટીમાં રહેતાં સુમિત રાવલ અને નિલીમા રાવલની મુલાકાત ત્રણ વર્ષ પહેલાં એક કોલ સેન્ટરની ઓફિસમાં થી હતી. આ પછી બંને પ્રેમમાં પડ્યા હતા અને બંને લગ્ન કરી લીધા હતા. કોલસેન્ટર પર દબાણ વધતાં બંનેએ નોકરી છોડી પોતાના ઘરે જ કોલસેન્ટર શરૂ કરી દીધું હતું અને વિદેશીઓને ધમકાવીને પૈસા પડાવવાનું શરૂ કર્યું હતું.