વલસાડ: વલસાડ જિલ્લાના ઉમરગામના ભીલાડમાં 23 ડિસેમ્બરના રોજ એક મુસ્લિમ પરિવારમાં લગ્ન પ્રસંગ હતો. આ દરમિયાન લગ્નના જમણવારમાં મામાને ત્યાં મોસાળમાં લગ્ન પ્રસંગ માણવા આવેલું એક બાળક ગુમ થયું હતું. જમણવાર બાદ બાળક નહીં મળતા પરિવારજનોએ શોધખોળ હાથ ધરી હતી. પરંતુ બાળકનો ક્યાંય પતો ન લાગતા આખરે પરિવારજનોએ ભીલાડ પોલીસ સ્ટેશનનો સંપર્ક કર્યો હતો. આ કેસમાં પોલીસને મોટી સફળતા મળી હતી. બાળકનું અપહરણ કરનાર આરોપી શાહબાજ ખાન ઉર્ફે સોનું ફારુક ખાન ભોગ બનેલા બાળકનો કૌટુંબિક મામો હતો. બાળક હેમખેમ મળી આવતા પોલીસ અને પરિવારજનોએ રાહતનો શ્વાસ લીધો હતો.
જિલ્લા પોલીસની 8થી વધુ ટીમો સર્ચ ઓપરેશનમાં લાગી
આ બનાવની જાણ થતા જ પોલીસે સમગ્ર મામલાને ગંભીરતાથી લીધો હતો અને વલસાડ જિલ્લા પોલીસવડા કરણરાજ વાઘેલાની આગેવાનીમાં જિલ્લા પોલીસની 8થી વધુ ટીમો સર્ચ ઓપરેશનમાં લાગી હતી. આ દરમિયાન પોલીસને મળેલી બાતમીના આધારે પોલીસે વાપી નજીક અમદાવાદ મુંબઈ નેશનલ હાઈવે પર દમણ ગંગા નદી કિનારે શોધખોળ હાથ ધરી હતી. સર્ચ ઓપરેશનમાં ડ્રોનની મદદ પણ લેવામાં આવી હતી. આખરે આ બાળક એક ઝાડીમાંથી અર્ધ બેભાન હાલતમાં મળી આવ્યું હતું.
36 કલાક સુધી ચલાવેલા સર્ચ ઓપરેશન દરમિયાન બાળક મળી આવ્યું
મામાના મોસાળમાં લગ્ન પ્રસંગ માણવા આવેલા બાળકના અપહરણ બાદ પોલીસે 36 કલાક સુધી ચલાવેલા આ સર્ચ ઓપરેશન દરમિયાન બાળક હેમખેમ મળી આવતા પોલીસે અને પરિવારજનો એ રાહતનો શ્વાસ લીધો હતો. જોકે બાળકની તબિયત જોતા તાત્કાલિક તેને સારવાર માટે વાપીની હરિયા હોસ્પિટલમાં ખસેડવામાં આવ્યું હતું. માતા પિતા સાથે લગ્નના થોડા દિવસ અગાઉ જ બાળક સાઉદી અરેબિયાથી ભીલાડ આવ્યું હતું અને લગ્નના જમણવાર દરમિયાન સગા સબંધીઓની હાજરીમાં જ તેનું અપહરણ થવાને કારણે અનેક રહસ્યો સર્જાયા હતા. આરોપી સુધી પહોંચવા વલસાડ જિલ્લા પોલીસે 100 થી વધુ સીસીટીવી ફૂટેજ તપાસ્યા હતા અને લગ્ન પ્રસંગમાં આવેલા અન્ય સગા સંબંધીઓની પણ પૂછપરછ કરી હતી.
70થી વધુ ઘરોમાં તપાસ કરી
આસપાસના 70થી વધુ ઘરોમાં તપાસ કરતા અંતે પોલીસે આ બાળકના અપહરણમાં શાહબાજ ખાન ઉર્ફે સોનું ફારૂખખાન નામના આરોપી સહિત અન્ય બે આરોપીઓની પણ સંડોવણી બહાર આવતા પોલીસે મુંબઈથી ઉમેર ઉર્ફે મોનું જુબેર ખાન અને મહંમદ ઉમર ઉર્ફે સઉદ ફિરોઝ સલીમ કાઝી નામના બે આરોપીઓની ધરપકડ કરી છે. અપહરણનો માસ્ટરમાઈન્ડ શાહબાઝ ખાન ઉર્ફે સોનું ફારુક ખાનની પણ ઉત્તર પ્રદેશના આગ્રા મથુરા નજીકથી ઝડપી પાડ્યો હતો.
મામાએ જ બનાવ્યો ભાણેજના અપહરણનો પ્લાન
વલસાડ જિલ્લા પોલીસે અપહરણના ત્રણે આરોપીઓની ધરપકડ કરી તેમની આગવી ઢબે પૂછપરછ કરતા સનસનીખેજ હકીકત સામે આવી હતી. જે મુજબ આરોપી શાહબાજ ખાન ઉર્ફે સોનું ફારુક ખાન ભોગ બનેલા બાળકનો કૌટુંબિક મામો હતો. મામાએ જ સાઉદી અરેબિયાથી લગ્ન માણવા આવેલા આ બાળકના પિતા પાસે લાખો રૂપિયાની ખંડણી માંગવાના ઇરાદે તેના મુંબઈના બે સાગરીતો સાથે મળી અને ભાણેજના અપહરણનો પ્લાન બનાવ્યો હતો.
લાખોની ખંડણી માગવાનો પ્લાન બનાવ્યો હતો
પ્લાન મુજબ આરોપીઓએ લગ્ન પ્રસંગમાંથી જ બાળકનું અપહરણ કર્યું હતું અને ત્યારબાદ તેને બેહોશ કરી અને બાળકના પિતા પાસેથી લાખોની ખંડણી માગવાનો પ્લાન બનાવ્યો હતો. જોકે બાળકનું ગળું દબાવતા બાળક બેહોશ થઈ ગયું હતું. આથી બાળક મરી ગયું હોવાનું માની આરોપીઓ બાળકને વાપી નજીક અમદાવાદ મુંબઈ નેશનલ હાઈવે પર ઝાડીયોમાં ફેંકી અને ફરાર થઈ ગયા હતા. જોકે બીજા દિવસે એક ભંગારવાળા ફેરિયાને નેશનલ હાઈવે પરથી એક ફોન મળી આવ્યો. જે અપહરણ થયેલા બાળકના દાદીનો હતો. જ્યારે બાળકનું અપહરણ થયું ત્યારે બાળક દાદીનો ફોન લઈ અને ગેમ રમી રહ્યો હતો. ત્યારે આરોપીઓએ બાળકને ફેકવાની સાથે આ ફોન પણ ત્યાં ફેંકી દીધો હતો. જોકે ભંગાર વાળા ફેરીયાને મળતા પોલીસે ફોનને સર્વેલન્સમાં રાખ્યો હોવાથી આ ભંગરવાળાની પૂછપરછના આધારે પોલીસે વાપી નજીક ઝાડીઓમાં સર્ચ ઓપરેશન હાથ ધર્યું હતું. 36 કલાકના સર્ચ ઓપરેશન બાદ બાળક મળી આવ્યું હતું. આમ કૌટુંબીક મામાએ જ ભાણેજના પિતા પાસેથી મોટી ખંડણી પડાવવાના બહાને અપહરણનું ષડયંત્ર રચ્યું હોવાનો ચોંકાવનારો ખુલાસો થયો હતો.