વલસાડઃ ઉમરગામના કાંઠા વિસ્તારના ફણસા ગામે ખૂદ પતિએ જ પત્નીની છરીના ઘા મારીને હત્યા કરી નાંખતા ચકચાર મચી ગઈ છે. પતિના ત્રાસથી કંટાળી યુવતી પિયર ચાલી ગયા બાદ પરત નહીં આવતા બંને વચ્ચે વિવાદ ચાલી રહ્યો હતો, જેને કરુણ અંત આવ્યો હતો. ઘરેથી સંબંધીના ઘરે નીકળેલી પત્નીને રસ્તામાં જ પતિએ છરીના ઘા મારીને રહેંસી નાંખી હતી. પતિએ હુમલો કર્યા પછી યુવતીને સારવાર માટે હોસ્પિટલમાં લઇ જતાં સારવાર દરમિયાન મોત થતાં પોલીસ ફરિયાદ નોંધાવાઈ હતી.
આ અંગેની વિગતો એવી છે કે, મમતા (ઉં.વ.30)ના લગ્ન ગામમાં જ રહેતા પુનિત ગાંડાભાઇ મીતના (રિક્ષાચાલક) સાથે થયા હતા. લગ્ન પછી પુનિત અવારનવાર મમતા ઉપર વહેમ રાખી ઝઘડો કરતો હતો. પતિના ત્રાસથી કંટાળી મમતા બે સંતાનો સાથે પિયરે આવી ગઇ હતી. તેમજ મમતાએ ફરી સાસરે જવાનો ઇનકાર કરતી હોવાથી અનેક વખત બોલાચાલી થઈ હતી. ગામમાં જ પિયર અને સાસરું હોવાથી બન્ને અવારનવાર સામસામે આવી જતાં હતાં.
ગત 08 જુલાઇએ રાત્રે 8 વાગે મમતા ફણસા બજાર ખાતે રહેતા કાકા ધનસુખ વાસુભાઈ મીતનાના ઘરે જવા નીકળી હતી. ત્યારે રસ્તામાં રિક્ષામાં આવેલા મમતાના પતિ પુનિતે મમતાને અટકાવી તેના ગરદન, માથા અને હાથના ભાગે છરા વડે હુમલો કર્યા હતા અને લોહી લુહાણ હાલતમાં તરફડતી મૂકી નાસી છૂટ્યો હતો.
આ ઘટનાની જાણ થતાં મમતાનાં પરિવારજનો ત્યાં દોડી આવ્યાં હતાં અને તેને વાપીની ખાનગી હોસ્પિટલમાં લઈ ગયાં હતાં, જ્યાં સારવાર દરમિયાન મમતાનું મોત થયું હતું. પિતાની ફરિયાદના આધારે નારગોલ મરીન પોલીસે મમતાના હત્યારા પતિ પુનિત વિરુદ્ધ હત્યાનો ગુનો નોંધી તેને પકડવાની તજવીજ હાથ ધરી છે.