Gujarat University Exam News: અમદાવાદમાં ગુજરાત યુનિવર્સિટીમાં ભણતા વિદ્યાર્થીઓ માટે એક અગત્યના સમાચાર છે. આગામી સ્થાનિક સ્વરાજ્યની ચૂંટણીઓને ધ્યાનમાં રાખીને યુનિવર્સિટીએ અંડર ગ્રેજ્યુએટ (UG) અને પોસ્ટ ગ્રેજ્યુએટ (PG) ના વિવિધ સેમેસ્ટરની પરીક્ષાઓના કાર્યક્રમમાં મોટો ફેરફાર કર્યો છે. જે પરીક્ષાઓ એપ્રિલ મહિનામાં લેવાવાની હતી, તે હવે મે મહિનામાં લેવાશે. આ નિર્ણયથી આશરે 1.50 લાખ જેટલા વિદ્યાર્થીઓને અસર થશે. ચૂંટણીમાં મોટા પ્રમાણમાં સ્ટાફ અને બિલ્ડિંગની જરૂર પડતી હોવાથી યુનિવર્સિટી વહીવટી તંત્ર દ્વારા આ નિર્ણય લેવામાં આવ્યો છે.
યુનિવર્સિટીની પરીક્ષા સમિતિએ અગાઉ કુલ 5 ફેઝમાં પરીક્ષા લેવાનું આયોજન કર્યું હતું. જેમાંથી 2 ફેઝની પરીક્ષાઓ તો સમયસર પૂરી પણ થઈ ગઈ છે. પરંતુ, હવે સ્થાનિક સ્વરાજ્યની ચૂંટણી આવી રહી હોવાથી બાકીના 3 ફેઝના કાર્યક્રમમાં ફેરફાર કરવામાં આવ્યો છે. આ કારણે બી.એ., એમ.એ., બી.એસસી., લો, બી.કોમ. સહિતના ઘણા મહત્વના કોર્સની પરીક્ષાઓ હવે મોડી શરૂ થશે. યુનિવર્સિટીના પરીક્ષા વિભાગે આ રિવાઈઝડ (નવો) કાર્યક્રમ તમામ સંલગ્ન કોલેજો અને વિભાગોમાં મોકલી આપ્યો છે.
નવું ટાઈમટેબલ કંઈક આ મુજબ રહેશે:
પહેલો ફેરફાર (1 મે થી શરૂ): જે પરીક્ષાઓ અગાઉ 16 એપ્રિલથી શરૂ થવાની હતી, તે હવે 1 મે થી શરૂ થશે. આમાં B.A., B.Com, B.Sc, B.B.A, B.C.A ના સેમેસ્ટર 4 અને 6, M.A. સેમેસ્ટર 3, તેમજ ઇન્ટિગ્રેટેડ કોર્સ, LL.B. અને B.Ed. સેમેસ્ટર 2 ની પરીક્ષાઓ લેવાશે.
બીજો ફેરફાર (12 મે થી શરૂ): જે પરીક્ષાઓ 24 એપ્રિલના રોજ લેવાવાની હતી, તે હવે 12 મે થી શરૂ થશે. જેમાં M.A., M.Com, M.Sc, M.R.S ના સેમેસ્ટર 2, B.A., B.Com, B.Sc ના સેમેસ્ટર 2 અને ન્યૂ એજ્યુકેશન પોલિસી (NEP) હેઠળના UG કોર્સના સેમેસ્ટર 4 નો સમાવેશ થાય છે.
ત્રીજો ફેરફાર (21 મે થી શરૂ): 5 મે ના રોજથી શરૂ થતી પરીક્ષાઓ હવે 21 મે થી લેવામાં આવશે. જેમાં મુખ્યત્વે NEP હેઠળના UG-PG અને ડિપ્લોમા કોર્સના અલગ-અલગ સેમેસ્ટરની પરીક્ષાઓ લેવાશે.
આ સમયપત્રક બદલાવાને કારણે આર્ટસ, કોમર્સ, સાયન્સ, લો અને એજ્યુકેશન જેવી તમામ શાખાઓના વિદ્યાર્થીઓ પ્રભાવિત થશે. વિદ્યાર્થીઓને પરીક્ષાની તૈયારી કરવા માટે થોડો વધારાનો સમય તો મળી ગયો છે, પરંતુ સામે પક્ષે તેના કારણે પરિણામ પણ મોડા આવવાની શક્યતા છે. આ ઉપરાંત, વિદ્યાર્થીઓએ હવે મે મહિનાની કાળઝાળ ગરમીમાં પરીક્ષા આપવા જવું પડશે. જોકે, વિદ્યાર્થીઓને ગરમીમાં કોઈ તકલીફ ન પડે તે માટે પરીક્ષા કેન્દ્રો પર પાણી અને વીજળીની પૂરતી વ્યવસ્થા કરવા માટે યુનિવર્સિટી દ્વારા ખાસ ધ્યાન આપવામાં આવશે.
નવું ટાઈમટેબલ જોવા અહીં ક્લિક કરો...
Education Loan Information:
Calculate Education Loan EMI