Nora Fatehi Bangladesh Program: આ સમયે વિશ્વના ઘણા દેશોમાં મંદી જોવા મળી રહી છે. પૈસા બચાવવા માટે આ દેશોની સરકારો જુદા જુદા નિર્ણયો લઈ રહી છે. આ એપિસોડમાં, હવે બાંગ્લાદેશ સરકારે પૈસા બચાવવા માટે બોલિવૂડ અભિનેત્રી નોરા ફતેહીના ડાન્સ પ્રોગ્રામને રદ કર્યો છે. નોરા ફતેહી બાંગ્લાદેશની રાજધાની ઢાકામાં એક કાર્યક્રમમાં પરફોર્મ કરવાની હતી, જેના માટે સરકારે મંજૂરી આપવાનો ઇનકાર કરી દીધો છે.
ડોલર સાથે જોડાયેલું છે શો રદ કરવાનું કારણ
બાંગ્લાદેશ સરકારે કરકસરના પગલાંના ભાગરૂપે ડૉલર બચાવવા માટે આ નિર્ણય લીધો છે. બાંગ્લાદેશના સાંસ્કૃતિક બાબતોના મંત્રાલયે સોમવારે (17 ઓક્ટોબર) જાહેર કરેલી નોટિસમાં જણાવ્યું હતું કે વૈશ્વિક પરિસ્થિતિને ધ્યાનમાં રાખીને અને વિદેશી મુદ્રા ભંડારને જાળવી રાખવાના હેતુથી નોરા ફતેહીના ડાન્સ શોને મંજૂરી આપવામાં આવી નથી. નોરા 18 નવેમ્બરે ઢાકામાં વિમેન્સ લીડરશિપ કોર્પોરેશનના એક કાર્યક્રમમાં પરફોર્મ કરવાની હતી અને આ કાર્યક્રમમાં એવોર્ડ્સ આપવા માટે પણ આવવાની હતી.
વિદેશી મુદ્રા ભંડારની સ્થિતિ શું છે?
બાંગ્લાદેશના સાંસ્કૃતિક મંત્રાલયે ઘટતા જતા વિદેશી મુદ્રા ભંડાર વચ્ચે ડોલરની ચૂકવણી પર કેન્દ્રીય બેંકના પ્રતિબંધોનો ઉલ્લેખ કર્યો હતો. જે મુજબ ઓક્ટોબર 12 સુધીમાં વિદેશી મુદ્રા ભંડાર ઘટીને $36.33 બિલિયન થઈ ગયું હતું. આ ભંડોળથી લગભગ ચાર મહિનાની આયાતની ચૂકવણી જ થઈ શકે છે. એક વર્ષ પહેલાં બાંગ્લાદેશનું વિદેશી મુદ્રા ભંડાર $46.13 બિલિયન હતું. હવે બાંગ્લાદેશની સરકાર પોતાની આ ભંડારને અન્ય ખર્ચાની ચૂકવણીમાં વેડફવવા નથી ઈચ્છતી. જેથી કરીને નોરા ફતેહીના કાર્યક્રમને મંજૂરી આપવામાં નથી આવી. નોરા ફતેહી મોરોક્કન-કેનેડિયન પરિવારમાંથી આવે છે. તેણે 2014થી હિન્દી ફિલ્મોમાં ડેબ્યૂ કર્યું હતું.
IMF બાંગ્લાદેશ સાથે વાતચીત કરશે
IMFના એશિયા અને પેસિફિક વિભાગના ડેપ્યુટી ડાયરેક્ટર એન-મેરી ગુલ્ડે-વુલ્ફે જણાવ્યું હતું કે, બાંગ્લાદેશને તેની માંગેલી લોન મેળવવામાં મદદ કરવા માટે ઇન્ટરનેશનલ મોનેટરી ફંડ આ મહિનાના અંતમાં તેનું પ્રથમ વાટાઘાટ મિશન બાંગ્લાદેશ મોકલવાની તૈયારી કરી રહ્યું છે. જેથી સરકાર સાથે વાતચીત શરૂ કરી શકાય. તેમણે કહ્યું કે દેશનો વિદેશી મુદ્રા ભંડાર અત્યારે સારા સ્તરે છે, પરંતુ તે સતત ઘટી રહ્યો છે. IMF એક આર્થિક કાર્યક્રમ યોજવાની ચર્ચા કરી રહ્યું છે જેમાં અર્થતંત્રને સ્થિર કરવા અને મંદી અટકાવવાના પગલાં પણ લેવામાં હશે.