ગુજરાતના કયા મહિલા કોંગ્રેસ પ્રમુખે અચાનક આપી દીધું રાજીનામું, જાણો વિગત

નર્મદા જિલ્લા મહિલા કોંગ્રેસના પ્રમુખ અંગીરા તડવીના સસરા દિનેશ તડવીને હાલમાં જ નર્મદા જિલ્લા પંચાયતના આરોગ્ય સમિતિના ચેરમેન બનાવાયા છે. તે છતાં એમણે ક્યા કારણોસર પોતાના હોદ્દા પરથી રાજીનામું આપ્યું હશે એ મામલે અનેક ચર્ચાઓએ જોર પકડ્યું છે. આ બાબતે એવી પણ ચર્ચાઓ પણ ચાલી રહી છે કે નર્મદા જિલ્લા કોંગ્રેસમાં અમુક હોદ્દેદારોને બાદ કરતાં જિલ્લાના મોટે ભાગના હોદ્દેદારોની અવગણના કરવામાં આવી છે.

નર્મદા જિલ્લા કોંગ્રેસ પ્રમુખ પ્રફુલ્લ પટેલે જણાવ્યું હતું કે, નર્મદા જિલ્લા કોંગ્રેસમાં કોઈ જ જૂથવાદ નથી. તમામ કાર્યકરોને સાથે રાખીને જ ચાલીએ છે. સામાન્ય મનભેદ હોય તો એને જૂથવાદનું સ્વરૂપ ન આપી શકાય. જિલ્લાના કોઈ પણ કાર્યકરનો સંગઠનને લાગતો પ્રશ્ન હોય તો એને જિલ્લા પ્રમુખ તરીકે મેં હંમેશા નિરાકરણ લાવવાનો પ્રયત્ન કર્યો છે.

બીજી તરફ અંગીરા તડવીએ આ બાબતે જણાવ્યું હતું કે, મેં મારું રાજીનામું બે મહિના પહેલા જ પ્રદેશ મહિલા સમિતિને મોકલી આપ્યું હતું. મેં જૂથવાદને કારણે નહીં મારા અંગત કારણોસર રાજીનામું આપ્યું છે. હું કોંગ્રેસ પક્ષની સૈનિકો છું, હતી અને રહીશ.

ભરૂચ: નર્મદા જિલ્લા મહિલા કોંગ્રેસ પ્રમુખ અંગીરા તડવીએ પોતાના હોદ્દા પરથી રાજીનામું આપતા કોંગ્રેસમાં ખળભળાટ મચી ગયો છે. તેમણે પોતાનું રાજીનામું નર્મદા જિલ્લા કોંગ્રેસ પ્રમુખને આપવાની જગ્યાએ સીધું જ પ્રદેશ મહિલા કોંગ્રેસ પ્રમુખને મોકલી આપતાં સ્થાનિક નેતાઓમાં દોડધામ મચી ગઈ હતી. રાજીનામાં પાછળ આંતરિક જુથવાદ જવાબદાર હોવાની ચર્ચા ચાલી રહી છે.