દિલ્હીઃ કોટક મહિન્દ્રા બેંકમાં ITના દરોડા, 2 ખાતામાંથી 38-40 કરોડ રૂપિયા ધોળા કરવાની શંકા

એક્સિસ બેંકમાં કાળા નાણાંને ધોળા કરવાની તપાસ દરમિયાન પણ કોટ મહિન્દ્રા બેંકનું નામ સામે આવ્યું હતું. એક્સિસ બેંક કેસની તપાસ દરમિયાન આવકવેરા વિભાગને જાણવા મળ્યું હતું કે, કોટક મહિન્દ્રા બેંકમાં પણ 8 ખાતા છે જેમાં 38-40 કરોડ રૂપિયાના કાળા નાણાંને ધોળા કરવાની શક્યતા દર્શાવામાં આવી છે.

નવી દિલ્હીઃ ઇનકમ ટેક્સ વિભાગની ટીમે દિલ્હીમાં કસ્તૂરબા ગાંધી માર્ગ પર કોટક મહિન્દ્રા બેંકમાં દરોડા પાડ્યા છે. ઇનકમ ટેક્સને શંકા છે કે આ બેંકના બે ખાતામાંતી નોટબંધી દરમિયાન 38-40 કરોડ રૂપિયા જમા કરીને કાળા નાણાંને ધોળા કરવામાં આવ્યા છે.

આવકવેરા વિભાગના અધિકારીઓએ બેંકમાં આ બન્ને નકલી ખાતાને લઈને બેંકના કર્મચારીઓની પૂછપરછ કરી છે. જોકે બેંકે કોઈપણ ગોટાળો ન થવાનું કહ્યું છે.

બેંકે આ અંગે જણાવ્યું છે કે, બે ગ્રાહકોના ખાતાની તપાસ માટે ઇનકમ ટેક્સ વિભાગની ટીમ બ્રાન્ચમાં પહોંચી હતી. આ ખાતામાં કેવાઈસીને લઈને કોઈ ગોટાળો નથી મળ્યો. બ્રાન્ચ મેનેજરની પણ ઇનકમ ટેક્સ વિભાગે પૂછપરછ કરી છે પરંતુ હજુ સુધી બેંકને કોઈ ગોટાળો થવાની જાણકારી આપવામાં આવી નથી. બેંક નિયમિત રીતે ખાતામાં લેવડ દેવડની જાણકારી આપતું રહે છે. અમારી બેંકમાં કોઈ નકલી ખાતા નથી. અમે તપાસમાં સંપૂર્ણ સહયોગ કરી રહ્યા છીએ.