પાકિસ્તાનની હલકટાઈઃ ગુજરાતમાંથી પકડાયેલી બોટ, 9 પાકિસ્તાની અંગે આપ્યું કેવું વાહિયાત નિવેદન ?

પાકિસ્તાનના વિદેશ મંત્રાલયના પ્રવક્તા નફીઝ ઝકરીયાએ સત્તાવાર નિવેદનમાં દાવો કર્યો હતો કે પાકિસ્તાનની કોઈ બોટ કે માછીમારો ગાયબ છે જ નહીં તે જોતાં ભારતે તેમને પકડ્યા હોય એવી કોઈ શક્યતા નથી અને ભારતનો દાવો સાવ ખોટો છે.

નવી દિલ્હીઃ ભારતીય નૌકાદળના સમુદ્ર પાવક નામના જહાજે રવિવારે અરબી સમુદ્રમાં ભારતીય જળસીમામાં ઘૂસેલી એક પાકિસ્તાની બોટને ઝડપી 9 લોકોની ધરપકડ કરી છે ત્યારે પાકિસ્તાને રાબેતા મુજબ જ આ મુદ્દે પણ નફફટાઈ શરૂ કરી છે.

પાકિસ્તાને આ મુદ્દે સાવ હાથ અધ્ધર કરી દેતાં કહ્યું છે કે ભારત સાવ ખોટું બોલે છે અને પાકિસ્તાનની કોઈ બોટ ભારતે પકડી જ નથી. પાકિસ્તાનનો દાવો છે કે પાકિસ્તાનની કોઈ બોટ કે માછીમારો ગાયબ નથી તેથી તેમને પકડવાનો પ્રશ્ન જ નથી.

આ તમામ પાકિસ્તાનીઓની હાલમાં પોરબંદર ખાતે પૂછપરછ કરાઈ રહી છે. ભારતીય કોસ્ટ ગાર્ડના પીઆરઓ અભિષેક મતિમાને જણાવ્યું હતું કે સવારે 10.15 કલાકે આ બોટને ઝડપી લેવાઈ હતી અને તેને પોરબંદર લઈ જવાઈ છે.

ભારતીય કોસ્ટ ગાર્ડે રવિવારે સવારે ગુજરાતના દરિયામાંથી પાકિસ્તાની બોટને ઝડપી પાડી હતી. પોરબંદર ઇન્વેસ્ટીગેશન એજન્સીના જણાવ્યા અનુસાર ભારતીય નૌકાદળના જહાજ પાવક સમુદ્રે બોટને ઝડપી લઈને નવ પાકિસ્તાનીને પકડ્યા છે.

પાકિસ્તાનની આ આદત છે અને તેણે ભારતે પાકિસ્તાને પચાવી પાડેલા કાશ્મીર (પીઓકે)માં ઘૂસીને આતંકવાદી કેમ્પ્સનો સફાયો કરીને 50 કરતાં વધારે આતંકવાદીઓને ઠાર કર્યા તે મુદ્દે પણ આવું જ નિવેદન આપીને ઓપરેશનનો ઈન્કાર કર્યો હતો.