‘ગુજરાતના BJP સાંસદે મને ડિનર પર બોલાવી હવસનો શિકાર બનાવી’, વકીલ યુવતીની ફરિયાદ બાદ કોર્ટે શું કર્યું?

કોર્ટે આ મામલાની ઊંડાણપૂર્વક તપાસ માટે એક સ્પેશિયલ અધિકારીની નિમણૂક કરવાનો આદેશ કર્યો છે. સાંસદ ડૉ.કે.સી.પટેલ સામે બળાત્કારના આક્ષેપ અંગેની આ અરજી પર હવે 12 મેના રોજ વધુ સુનાવણી હાથ ધરાશે. પટેલને પોતાની સામેના કેસમાં વકીલની જરૂર છે એ બહાને તેમણે આ મહિલા વકીલનો સંપર્ક કર્યો હતો.

નવી દિલ્હીઃ ગુજરાતના વલસાડના ભાજપના સાંસદ કે.સી.પટેલ સામે એક મહિલા વકીલે બળાત્કારનો આક્ષેપ મૂકીને કોર્ટમાં ફરિયાદ કરતાં ખળભળાટ મચી ગયો છે. આ બાબતે દિલ્હીની પતિયાલા હાઉસ કોર્ટે નોર્થ એવન્યુ પોલીસ સ્ટેશન પાસે રિપોર્ટ પણ માંગ્યો છે. કોર્ટે પોલીસ સ્ટેશન પાસે એકશન ટેકન રિપોર્ટ પણ માંગ્યો છે.

સાંસદ સામે થયેલી ફરિયાદ અનુસાર પીડિત યુવતી પર પટેલે સાંસદે તેમના સત્તાવાર નિવાસસ્થાન 604 નર્મદા એપાર્ટમેન્ટ ખાતે આ વર્ષની 3 માર્ચે ડિનર પર બોલાવી બળાત્કાર કરવામાં આવ્યો હતો. પટેલે યુવતીને સુપ્રીમ કોર્ટમાં કેસ અપાવવાની લાલચ આપી બોલાવીને હવસનો શિકાર બનાવી હતી તેવો આક્ષેપ યુવતીએ કર્યો છે.

આ પીડિતા યુવતીએ એવુ પણ જણાવ્યુ છે કે પટેલે આ સિવાય પણ અનેક વાર તેના પર બળાત્કાર ગુજાર્યો હતો અને તેને હવસનો શિકાર બનાવી હતી. આ વાત કોઈને નહીં કહેવાની ધમકી આપી ત પોલીસ પાસે ન જવા પણ જણાવ્યુ હતુ. આ યુવતીએ એવી પણ ફરિયાદ કરી છે કે આ સાંસદે મને મારી નાખવાની ધમકી પણ આપી છે.

આ યુવતીએ જણાવ્યુ છે કે, પોલીસે મારી એફઆઇઆર લેવાનો ઇન્કાર કર્યો હતો તેથી હું સીધી કોર્ટમાં જ ગઇ હતી. તેણે એવુ પણ જણાવ્યુ છે કે સાંસદ કે.સી.પટેલે મારા ઉપર અગાઉ અનેક વખત બળાત્કાર કર્યો હતો. આ આક્ષેપોને સાંસદ કે.સી.પટેલે નકાર્યા હતા. આ ફરિયાદ પછી કે.સી. પટેલ ગાયબ થઈ ગયા હતા.