New Covid-19 Treatment Guideline: કોરોના વાયરસની સારવારમાં ઉપયોગમાં લેવાતી દવાઓ અંગે સુધારેલી ગાઇડલાઇન જારી કરવામાં આવી છે. જે મુજબ ડોકટરોએ કોવિડ -19 દર્દીઓને સ્ટેરોઇડ્સ આપવાનું ટાળવું જોઈએ. આ સાથે દવાઓના વધુ પડતા સેવન અંગે પણ ચેતવણી આપવામાં આવી છે. તાજેતરમાં, કોવિડ પર સરકારના ટાસ્ક ફોર્સના વડાએ સંક્રમણની બીજી લહેર દરમિયાન દવાઓના વધુ પડતા ઉપયોગ પર દુઃખ વ્યક્ત કર્યું હતું.
સતત ત્રણ અઠવાડિયા સુધી ઉધરસ આવે તો કરાવજો આ ટેસ્ટ
સુધારેલી ગાઇડલાઇન મુજબ સ્ટીરોઈડ જેવી દવાઓ, જો વધુ પડતી અથવા લાંબા સમય સુધી ઉપયોગમાં લેવામાં આવે તો મ્યુકોર્માયકોસિસ અથવા 'બ્લેક ફંગસ' જેવા અન્ય ચેપનું જોખમ વધારે છે. ગાઈડલાઈન્સમાં કહેવામાં આવ્યું છે કે જો ઉધરસ બે કે ત્રણ અઠવાડિયાથી વધુ હોય તો દર્દીઓએ ટીબી અને અન્ય સમસ્યાઓ માટે ટેસ્ટ કરાવવો જોઈએ.
5 દિવસથી વધુ તાવ હોય તો શું કરવું ?
સુધારેલી ગાઇડલાઇન અનુસાર, શ્વાસ લેવામાં તકલીફ થતી હોય તેને હળવા રોગમાં વર્ગીકૃત કરવામાં આવે છે. આવા દર્દીને હોમ આઇસોલેશન અને કાળજી લેવાની સલાહ આપવામાં આવી છે. તેમજ કોવિડના હળવા દર્દીઓએ 5 દિવસથી વધુ સમય સુધી શ્વાસ લેવામાં તકલીફ, ઉંચો તાવ અથવા તીવ્ર ઉધરસમાંથી પસાર થઈ રહ્યા હોય તેઓએ ડૉક્ટરનો સંપર્ક કરવો જોઈએ.
ભારતમાં શું છે કોરોનાનું ચિત્ર
ભારતમાં જાન્યુઆરીની શરૂઆતથી કોરોનાના કેસ તીવ્ર ગતિએ વધી રહ્યા. દેશમાં કોરોનાના નવા કેસ સૌથી વધુ મહારાષ્ટ્રમાં સામે આવી રહ્યા છે. કેન્દ્રીય આરોગ્ય મંત્રાલયે જણાવ્યા મુજબ, છેલ્લા 24 કલાકમાં 2,82,970 નવા કેસ નોંધાયા છે અને 441 સંક્રમિતોએ જીવ ગુમાવ્યો છે. જ્યારે છેલ્લા 24 કલાકમાં 1,88,157 સંક્રમિતો સાજા થયા છે. દેશમાં ગઈકાલ કરતાં આજે 44,889 કેસ વધારે નોંધાયા છે. દેશમાં કુલ એક્ટિવ કેસની સંખ્યા 18,31,000 પર પહોંચી છે. દૈનિક પોઝિટિવિટી રેટ 15.13 ટકા છે. ઓમિક્રોનના કુલ કેસ 8961 થયા છે.
- કુલ એક્ટિવ કેસઃ 18,31,000
- કુલ ડિસ્ચાર્જઃ 3,55,83,039
- કુલ મૃત્યુઆંકઃ 4,87,202
- કુલ રસીકરણઃ 158,88,47,554