Natural Face Cleanser: ધૂળ, માટી, પ્રદૂષિત હવાના સંપર્કમાં આવવા અને ચહેરા પર જમા થયેલી ગંદકી દૂર કરવા માટે નિયમિતપણે ચહેરોને વોશ કરતા રહેવું જરૂરી છે. ઉપરાંત, દિવસમાં ઓછામાં ઓછા બે વાર ફેશ વોશ કરવો જોઇએ પરંતુ વારંવાર અને વધુ પડતા ફેસવોશના ઉપયોગથી આપણી ત્વચા શુષ્ક બની જાય છે. ખાસ કરીને શિયાળામાં ત્વચાની શુષ્કતા વધુ વધી જાય છે. આવી સ્થિતિમાં, બજારમાં કેમિકલ આધારિત ફેસવોશને બદલે, તમે તમારા ચહેરાને ઘરેલું કુદરતી ક્લીંઝરથી સાફ કરી શકો છો. તેનાથી તમારી ત્વચા સુકાઈ જતી નથી અને ચમકતી પણ રહેશે. તો ચાલો જાણીએ આવા જ કેટલાક હોમ નેચરલ ક્લીન્ઝર વિશે, જે તમને તમારા ચહેરાને હાઇડ્રેટેડ રાખવામાં અને તમને ડાઘ રહિત રાખવામાં મદદ કરશે.
જૈતુનનું તેલ
શિયાળાની ઋતુમાં અનેક તહેવારોની સાથે લગ્નસરાની સિઝન પણ હોય છે. આવી સ્થિતિમાં આપ વારંવાર મેકઅપ પણ કરો છો. પરંતુ મેકઅપ દૂર કરવા માટે મેકઅપ રીમુવર અને ફેસ વોશનો વધુ પડતો ઉપયોગ તમારી ત્વચાને ડ્રાય કરી શકે છે. આવી સ્થિતિમાં ઓલિવ ઓઈલ તમારી મદદ કરી શકે છે. તે એક કુદરતી મેકઅપ રીમુવર છે, જે મેકઅપને સરળતાથી દૂર કરે છે અને તમારા ચહેરાના છિદ્રોને બંધ કરતું નથી. આ માટે તમે પહેલા કોટનની મદદથી આખા ચહેરા પર ઓલિવ ઓઈલ લગાવો અને પછી બીજા કોટન બોલની મદદથી ચહેરા પર જમા થયેલ તમામ મેકઅપ અને ગંદકી દૂર કરો.
કાચું દૂધ
વિટામિન A, B, K, પ્રોટીન, લેક્ટિક એસિડથી ભરપૂર, કાચું દૂધ તમારી ત્વચા માટે શ્રેષ્ઠ ક્લીંઝર અને ટોનર માનવામાં આવે છે. કાચું દૂધ તમારી ત્વચાને નરમ બનાવે છે, એક્સ્ફોલિયેટ કરે છે અને હાઇડ્રેટ કરે છે. તમારા ચહેરાને સાફ કરવા માટે, એક બાઉલમાં થોડું કાચું દૂધ લો અને તેને કોટન સ્વેબની મદદથી તમારા ચહેરા પર લગાવો. જ્યારે તે થોડું સુકાઈ જાય, ત્યારે તે જ પ્રક્રિયાને વધુ 1-2 વખત પુનરાવર્તિત કરો. ત્યાર બાદ સાદા પાણીથી ચહેરો ધોઈ લો.
મધ
મધનો ઉપયોગ ચહેરા માટે ક્લીંઝર તરીકે કરી શકાય છે. આ સાથે, તે ચહેરાના મોશ્ચરને પણ બરકરાર રાખે છે. આ માટે તમે અડધી ચમચી મધને એટલું પાણીમાં મિક્સ કરો કે તે પાતળું થઈ જાય. આ પછી, તેને તમારા ચહેરા પર પેસ્ટની જેમ લગાવો, તેને 10-15 મિનિટ માટે રહેવા દો અને પછી ચહેરાને હૂંફાળા પાણીથી ધોઈ લો. જે લોકોની ત્વચા વધુ શુષ્ક છે તેઓ પાણીને બદલે દૂધનો ઉપયોગ કરી શકે છે.
કાકડી
આપણે સલાડમાં કાકડી લઇએ છીએ. પરંતુ તમારી ત્વચાને સાફ કરવા માટે ફેસ વોશને બદલે કાકડીનો ઉપયોગ કરી શકાય છે. વિટામિન-એથી ભરપૂર કાકડી તમારી ત્વચાને શુષ્કતાથી બચાવે છે અને સાથે જ તેને ચેપથી પણ દૂર રાખે છે. આ માટે અડધી કાકડી કાપીને છીણી લો અને પછી આખા ચહેરા પર ઘસો. આ સિવાય તમે કાકડીનો રસ દહીંમાં મિક્સ કરીને ચહેરા પર 5 મિનિટ સુધી લગાવી શકો છો. ત્યાર બાદ સાદા પાણીથી ચહેરો ધોઈ લો.