Ahmedabad News: અમદાવાદમાં 1.66 કરોડના સોનાની ચોરીનો ભેદ ઉકેલાયો, બોયફ્રેન્ડ સાથે રહેવા યુવતીએ કરી હતી ચોરી

Ahmedabad News: ક્રાઈમબ્રાંચને માહિતી મળી કે હર્ષિદા દાગીના લઈ માણેકચોકમાં વેચવા આવી છે. જેથી ક્રાઈમબ્રાંચની ટીમ  ત્યાં પહોંચી હર્ષિદા દાગીના વેચે તે પહેલાં જ તેની અટકાયત કરી હતી.

ક્રાઈમબ્રાંચની ટીમ ત્યાં પહોંચી હર્ષિદા દાગીના વેચે તે પહેલાં જ તેની અટકાયત કરી હતી

Source : ફોટોઃ એબીપી અસ્મિતા

Show Quick Read

Key points generated by AI, verified by newsroom

• સેલ્સ ગર્લે પ્રેમી સાથે રહેવા 1.66 કરોડના દાગીના ચોર્યા.
• દાગીના લઈને ફરાર થયેલા પ્રેમીએ મહિલાને દગો આપ્યો.
• પોલીસે 18 લાખના દાગીના સાથે મહિલાની ધરપકડ કરી.
• પોલીસ ફરાર થયેલા પ્રેમીને ઝડપી પાડવા તપાસ કરી રહી છે.

Ahmedabad News: અમદાવાદના નિકોલમાં આભૂષણ જ્વેલર્સમાં થયેલી સોનાની ચોરીનો ભેદ પોલીસે ઉકેલી નાંખ્યો છે. 11 મે 2026ના રોજ જ્વેલર્સ શો- રૂમમાં કામ કરતી હર્ષિદા શેટ્ટીએ 1.66 કરોડની દાગીનાની ચોરીની ફરિયાદ થઈ હતી. પરણિત બોયફ્રેન્ડ સાથે રહેવા સેલ્સ ગર્લે દાગીના ચોર્યા પણ તેની જ સાથે દગો થઈ ગયો. જેની સાથે રહેવા ચોરી કરી અને તેની સાથે અલગ- અલગ રાજ્યોની હોટલમાં પણ રહી હતી. પરંતુ હર્ષિદા શેટ્ટી જ્યારે હોટલમાં ન્હાવા ગઈ ત્યારે પાછળથી તેનો બોયફ્રેન્ડ દાગીના લઈને ફરાર થઈ ગયો હતો. 

ક્રાઈમબ્રાંચને માહિતી મળી કે હર્ષિદા દાગીના લઈ માણેકચોકમાં વેચવા આવી છે. જેથી ક્રાઈમબ્રાંચની ટીમ  ત્યાં પહોંચી હર્ષિદા દાગીના વેચે તે પહેલાં જ તેની અટકાયત કરી હતી. હર્ષિદાને ક્રાઈમ બ્રાન્ચ લઈ જવામાં આવી હતી. જ્યાં તપાસ કરતા તેની પાસેથી 18 લાખના ચોરીના દાગીના મળી આવ્યા હતા. હર્ષિદાએ 1.66 કરોડના દાગીના ચોર્યા હતા ત્યારે 18 લાખના દાગીના મળતા બાકીના મુદ્દામાલ અંગે પૂછપરછ કરવામાં આવી હતી. 

હર્ષિદાની પૂછપરછ દરમિયાન જાણવા મળ્યું હતું કે, તે દાગીના ચોરી કર્યા બાદ તેના બોયફ્રેન્ડ સાથે ઉત્તર ભારતના અલગ અલગ રાજ્યોમાં ગઈ હતી. બંને ચોરીના દાગીના લઈને સાથે રહ્યા હતા. આ દરમિયાન એક દિવસ હર્ષિદા નાહવા ગઈ ત્યારે તેનો બોયફ્રેન્ડ 18 લાખના દાગીના મૂકી બાકીના દાગીના લઈ ત્યાંથી નાસી ગયો હતો. હર્ષિદાને જાણ થઈ ત્યારે તેને પણ દગો થયાનો અનુભવ થયો હતો જેથી તેણે બોયફ્રેન્ડને સંપર્ક કરવાનો પ્રયત્ન કર્યો પરંતુ સંપર્ક થયો જ નહોતો. હવે પોલીસે હર્ષિદાના ફરાર બોયફ્રેન્ડની તપાસ શરૂ કરી છે.

પોલીસ તપાસમાં સામે આવ્યું છે કે, કરોડોના દાગીનાની ચોરી કર્યા બાદ મહિલા કર્મચારી તેના બોયફ્રેન્ડ સાથે ઉદયપુર, જયપુર થઈને દિલ્હી ભાગી ગઈ હતી. ક્રાઈમબ્રાન્ચે ગુપ્ત ઓપરેશન પાર પાડીને મહિલા આરોપી હર્ષિદા શેટ્ટીને ઝડપી પાડી છે અને તેની પાસેથી ચોરીના દાગીના સહિત આશરે 18 લાખનો મુદ્દામાલ રિકવર કર્યો છે. જ્યારે બાકીના કરોડોના દાગીના લઈને ફરાર થઈ ગયેલા તેના બોયફ્રેન્ડને પકડવા માટે પોલીસે ચક્રો ગતિમાન કર્યા છે. મહિલા આરોપીની ધરપકડ બાદ ક્રાઈમબ્રાન્ચે કાયદેસરની કાર્યવાહી કરીને તેને વધુ તપાસ અર્થે નિકોલ પોલીસને સોંપી દીધી છે. નિકોલ પોલીસે મહિલા આરોપીની સત્તાવાર કસ્ટડી મેળવીને તેને કોર્ટમાં રજૂ કરવાની અને રિમાન્ડ મેળવવાની તજવીજ શરૂ કરી છે.