કેમિકલયુક્ત પાણીથી ધોળકાનો ખેડૂત બન્યો લાચાર, 1 લાખની કમાણી કરાવતા ગુલાબના છોડ ખેતરમાંથી ઉખેડ્યા

અમદાવાદના ધોળકા તાલુકાનું ભેટાવાડા ગામ એક સમયે ગુલાબ અને અન્ય ફૂલોની ખેતી માટે જાણીતું હતું, પરંતુ આજે અહીંના ખેડૂતો કેમિકલયુક્ત અને ગંદા પાણીના કારણે ખેતી બરબાદ થવાનો આક્ષેપ કરી રહ્યા છે.

ગંદા પાણીના કારણે ખેતી બરબાદ થવાનો આક્ષેપ કરી રહ્યા છે.

Source : ફોટોઃ એબીપી અસ્મિતા

Show Quick Read

Key points generated by AI, verified by newsroom

• ધોળકાના ભેટાવાડામાં પ્રદૂષિત પાણીથી ફૂલોની ખેતી બરબાદ.
• ખેડૂતોએ ગુલાબના છોડ ઉખેડ્યા, લાખોની આવક ગુમાવી.
• ફેક્ટરીઓ-પાલિકાનું ગંદુ પાણી નર્મદા કેનાલમાં ઠલવાય છે.
• દૂષિત પાણીથી આરોગ્ય જોખમ, ગ્રામજનો 11 દિવસથી આંદોલન.

Dholka Flower Farming: અમદાવાદના ધોળકા તાલુકાનું ભેટાવાડા ગામ એક સમયે ગુલાબ અને અન્ય ફૂલોની ખેતી માટે જાણીતું હતું, પરંતુ આજે અહીંના ખેડૂતો કેમિકલયુક્ત અને ગંદા પાણીના કારણે ખેતી બરબાદ થવાનો આક્ષેપ કરી રહ્યા છે. ભેટાવાડાના ખેડૂત સતીશ મકવાણાએ ગુલાબના છોડમાંથી મહિને લગભગ 1 લાખ રૂપિયાની આવક મેળવતા હોવા છતાં કેમિકલયુક્ત પાણીની સમસ્યાના કારણે આખરે ખેતરમાંથી ગુલાબના છોડ ઉખેડી નાખ્યા છે. ખેડૂતનો દાવો છે કે એક છોડ પર સતત 7 વર્ષ સુધી ફૂલો આવતા હતા, પરંતુ દૂષિત પાણીના કારણે છોડ માત્ર બે વર્ષમાં જ સુકાઈ જતા તેમણે આ ખેતી બંધ કરવાની ફરજ પડી છે.

 પાંચ ગામના ખેડૂતો બરબાદ

દૂષિત કેમિકલયુક્ત પાણીની સમસ્યાએ ભેટાવાડા, ત્રાસદ, નેસડા, પાલડી સહિતના પાંચ ગામના ખેડૂતોની મુશ્કેલી વધારી છે. દૂષિત પાણીના કારણે ખેતી અને ભૂગર્ભ જળને નુકસાન થઈ રહ્યું હોવાના આક્ષેપ સાથે ગ્રામજનો છેલ્લા 11 દિવસથી આંદોલન કરી રહ્યા છે. સ્થાનિકોનો દાવો છે કે કેમિકલયુક્ત પાણીના કારણે બોરનું પાણી પણ દૂષિત થયું છે અને વિસ્તારમાં કેન્સર તથા ચામડીના રોગનું પ્રમાણ વધ્યું છે. કેન્સરના કારણે અત્યાર સુધીમાં 11 લોકોના મોત થયા હોવાનો પણ ગ્રામજનો દાવો કરી રહ્યા છે. જોકે, આ આરોગ્યસંબંધિત આંકડાઓની સત્તાવાર પુષ્ટી થવી બાકી છે.

ફૂલોની ખેતી બરબાદ

ધોળકાનું ભેટાવાડા ગામ એક સમયે ગુલાબ સહિતના વિવિધ ફૂલોની ખેતી માટે જાણીતું હતું. અહીં વર્ષોથી ખેડૂતો ફૂલોની ખેતી કરીને પરિવારનું ગુજરાન ચલાવતા હતા. જોકે, હવે દૂષિત અને કેમિકલયુક્ત પાણીના કારણે ફૂલોની ખેતી નિષ્ફળ જઈ રહી હોવાનો ખેડૂતોનો આક્ષેપ છે. ખેડૂતોના જણાવ્યા પ્રમાણે, ગુલાબની ખેતીમાંથી મહિને 50 હજાર રૂપિયા સુધીની આવક થતી હતી. કેટલાક ખેડૂતો તો મહિને એક લાખ રૂપિયા સુધીની કમાણી કરતા હતા. પરંતુ ખેતીમાં સતત નુકસાન થવાને કારણે હવે ખેડૂતો ગુલાબના છોડ ખેતરમાંથી ઉખાડી ફેંકવા મજબૂર બન્યા છે.

ખેડૂતોનો દાવો છે કે અગાઉ ગુલાબનો એક છોડ લગભગ સાત વર્ષ સુધી ફૂલો આપતો હતો. પરંતુ હવે દૂષિત પાણીના કારણે છોડ માત્ર બે વર્ષમાં જ સુકાઈ જતા હોવાનું ખેડૂતો જણાવી રહ્યા છે. પાણીની ગુણવત્તા અને ખેતીને થઈ રહેલા નુકસાનથી કંટાળીને કેટલાક ખેડૂતોએ પોતાના ખેતરમાંથી ગુલાબના છોડ જ ઉખેડી નાખ્યા છે. જેના કારણે વર્ષોથી ફૂલોની ખેતી પર નિર્ભર ખેડૂતો સામે હવે રોજગારી અને આવકનું સંકટ ઊભું થયું છે.

સ્થાનિક ખેડૂતોનો વધુ એક ગંભીર આક્ષેપ છે કે આશરે 15થી 17 વર્ષ પહેલાં નર્મદાનું પાણી ખેતરો સુધી પહોંચશે તેવા દાવા સાથે વિસ્તારમાં કેનાલ બનાવવામાં આવી હતી. નર્મદાનું પાણી મળશે તેવી આશાએ ખેડૂતોએ કેનાલ માટે પોતાની જમીન પણ આપી હતી અને જમીનનું વળતર લીધું ન હોવાનો એક ખેડૂતનો દાવો છે. પરંતુ હવે આ જ કેનાલમાં નર્મદાના પાણીના બદલે ફેક્ટરીઓમાંથી નીકળતું કેમિકલયુક્ત પાણી અને ગંદુ પાણી છોડવામાં આવતું હોવાનો ખેડૂતો આક્ષેપ કરી રહ્યા છે. ખેડૂતોના જણાવ્યા પ્રમાણે, આસપાસની કંપનીઓમાંથી કેમિકલયુક્ત પાણી અને ધોળકા નગરપાલિકાનું ગંદુ પાણી કેનાલમાં ઠલવવામાં આવે છે. આ પાણી ખેતરો અને ભૂગર્ભ જળ સુધી પહોંચવાના કારણે ખેતીની જમીન તથા બોરના પાણી પર ગંભીર અસર થઈ રહી હોવાનો સ્થાનિકોનો દાવો છે.

આરોગ્યને પણ ખતરો હોવાનો દાવો

સ્થાનિકોના જણાવ્યા પ્રમાણે, પાણીની સમસ્યાની અસર માત્ર ખેતી પૂરતી સીમિત નથી રહી, પરંતુ લોકોના આરોગ્ય પર પણ તેની અસર જોવા મળી રહી છે. વિસ્તારમાં કેન્સર અને ચામડીના રોગોનું પ્રમાણ વધ્યું હોવાનો ગ્રામજનોનો દાવો છે. પાંચેય ગામોમાં અત્યાર સુધીમાં 11 લોકોના કેન્સરના કારણે મોત થયા હોવાનો પણ આક્ષેપ કરવામાં આવ્યો છે.