Kalu Bharwad: અમદાવાદના લાંભા વિસ્તારમાં અપક્ષ ઉમેદવાર તરીકે ચૂંટણી લડી રહેલા કાળુ ભરવાડનો એક વિવાદિત વીડિયો સોશિયલ મીડિયામાં ભારે વાયરલ થયો છે. આ વીડિયોમાં તેઓ ખુલ્લેઆમ સ્વીકારી રહ્યા છે કે તેમણે અગાઉની ચૂંટણીમાં મતો મેળવવા માટે અને મંદિર બનાવવા માટે પૈસા વહેંચ્યા હતા. જોકે, આ વખતે સ્થાનિક મતદારોએ તેમને બરાબરનો પાઠ ભણાવ્યો છે અને રોકડ રકમ મોઢા પર પરત આપીને તેમને પોતાના વિસ્તારમાંથી ભગાડી મૂક્યા છે. આ સમગ્ર ઘટના દર્શાવે છે કે હવે જાગૃત મતદારો ચૂંટણીમાં લાલચમાં આવવાને બદલે નેતાઓને રોકડા જવાબો આપી રહ્યા છે.
"પૈસા આપ્યા તોય 17 જ મત મળ્યા"
વાયરલ થઈ રહેલા વીડિયોની વિગતો મુજબ, લાંભા વોર્ડના અપક્ષ ઉમેદવાર કાળુ ભરવાડ જ્યારે પ્રચાર માટે નીકળ્યા ત્યારે મતદારો સાથે તેમની ઉગ્ર બોલાચાલી થઈ હતી. વાતવાતમાં તેમણે જ કબૂલાત કરી લીધી કે ગત ચૂંટણીમાં પણ તેમણે લોકોને પૈસા આપ્યા હતા. તેમણે બળાપો કાઢતા કહ્યું કે, "પૈસા આપ્યા હોવા છતાં મને તે વખતે માત્ર 17 જ મત મળ્યા હતા." આ ઉપરાંત તેમણે મંદિર બનાવવા માટે પણ પોતે પૈસા આપ્યા હોવાનો સ્વીકાર કરીને લોકો પર અહેસાન જતાવવાનો પ્રયાસ કર્યો હતો.
મતદારોએ કહ્યું પૈસા પાછા લઈ લો!
જોકે, આ વખતે સ્થાનિક લોકોનો મિજાજ કંઈક અલગ જ હતો. મતદારોએ કાળુ ભરવાડને ચોખ્ખું સંભળાવી દીધું કે, "અમને આપેલા તમારા પૈસા પરત લઈ લો, અમારે નથી જોઈતા." લોકોનો આક્ષેપ હતો કે કાળુ ભરવાડ સ્થાનિકો સાથે ગેરવર્તન કરે છે અને ગાળો બોલે છે. કેટલાક જાગૃત નાગરિકોએ તો એવો પણ દાવો કર્યો હતો કે નેતાજી જે ગાળો બોલે છે તેના ઓડિયો રેકોર્ડિંગ પણ તેમણે સાચવી રાખ્યા છે.
લોકોની વાત સાંભળ્યા વગર જ ભાગ્યા
લોકોનો આવો પ્રચંડ વિરોધ જોઈને કાળુ ભરવાડ સમજી ગયા હતા કે હવે અહીં દાળ ગળવાની નથી. લોકો તેમને આપેલા પૈસા પરત આપી રહ્યા હતા, પરંતુ કાળુ ભરવાડ લોકોની વાત સાંભળ્યા વગર અને પૈસા લીધા વિના જ ત્યાંથી રફુચક્કર થઈ ગયા હતા. અત્રે ઉલ્લેખનીય છે કે, કાળુ ભરવાડ અગાઉ પણ લાંભા વોર્ડમાંથી અપક્ષ તરીકે ચૂંટાઈ ચૂક્યા છે અને આ વખતે ફરી મેદાનમાં છે. પરંતુ, પોતાના જ વિસ્તારમાં થયેલા આ ઉગ્ર વિરોધને કારણે તેમના ચૂંટણી પ્રચાર પર હવે માઠી અસર પડી શકે છે. આ ઘટના સાબિત કરે છે કે હવે મતદારો પક્ષ કે ચહેરાને બદલે પાયાની સુવિધાઓ અને કામગીરીને વધુ મહત્વ આપી રહ્યા છે.