Ahmedabad News: હવે પોલીસની જેમ AMC અધિકારીઓ કરશે નાઈટ ડ્યુટી, રાત્રે રાઉન્ડ પર નીકળવું પડશે
Ahmedabad News: અમદાવાદ મ્યુનિસિપલ કોર્પોરેશનના અધિકારીઓએ હવે રાત્રે ઊંઘવાના બદલે રાઉન્ડ પર નીકળવું પડશે
અમદાવાદ મ્યુનિસિપલ કોર્પોરેશનના અધિકારીઓએ હવે રાત્રે ઊંઘવાના બદલે રાઉન્ડ પર નીકળવું પડશે. શાખા અધિકારીઓ અને ઈજનેરોને મ્યુનિસિપલ કમિશનરે જવાબદારી સોંપી છે. અમદાવાદ મ્યુનિસિપલ કોર્પોરેશનમાં અધિકારીઓ અને કર્મચારીઓની મોટી ફૌજ હોવા છતાં મોટાભાગની કામગીરી સુપરવિઝન વગર જ ચાલી રહી છે. ત્યારે હવે મનપા કમિશનરે તારીખ મુજબ અધિકારીઓ અને વિભાગીય વડાઓને નાઈટ રાઉન્ડની જવાબદારી સોંપી છે.
જેમાં જે-તે દિવસે અધિકારીઓએ તેની ટીમ સાથે રાત્રીના સમયે રાઉન્ડમાં નીકળીને મ્યુનિસિપાલિટી મિલકતોની ચકાસણી, સ્ટાફની હાજરી, રાત્રે ચાલતી સફાઈ અને રસ્તા સહિતની કામગીરીનું નિરીક્ષણ સિક્યોરિટી અને ન્યૂસન્સ પોઈન્ટની ચકાસણી સફાઈ, બંધ સ્ટ્રીટ લાઈટ, બાગ- બગીચા જેવા જાહેર સ્થળો પરિવહન સેવાઓ વગેરેની તપાસ કરીને ખામી અંગે ઓનલાઈન એપ્લિકેશનમાં નોંધ કરવાની રહેશે.
આ રાત્રિ પેટ્રોલિંગ 18 ફેબ્રુઆરીથી 2 એપ્રિલ સુધી થાય તેવી યોજના છે. શહેરના વિવિધ વિસ્તારોમાં અધિકારીઓ ઓચિંતી મુલાકાત લેશે અને જાહેર વિસ્તારોની સ્થિતિ ચકાસશે. પેટ્રોલિંગ માટે 30 જેટલા અધિકારીઓને ખાસ જવાબદારી સોંપવામાં આવી છે. તેઓ સફાઈ, લાઇટિંગ, રસ્તા અને અન્ય પ્રાથમિક સુવિધાઓનું નિરીક્ષણ કરશે અને જો ખામીઓ જોવા મળશે તો તરત કાર્યવાહી કરશે.કમિશનરે નાગરિકોને પણ સહકાર આપવા અપીલ કરી છે જેથી શહેરમાં સુવ્યવસ્થા અને સફાઈ સુનિશ્ચિત થઈ શકે.
સુરત મહાનગરપાલિકા કમિશનરનું નિરીક્ષણ
સુરત મહાનગરપાલિકા કમિશનર એમ.નાગરાજને સોમવારે સવારે સેંટ્રલ ઝોનમાં સ્વચ્છતા અભિયાનનું આકસ્મિક નિરીક્ષણ કર્યું હતુ. આ દરમિયાન ફરજમાં બેદરકારી અને ગેરહાજરી બદલ કડક પગલા લેતા નાયબ આરોગ્ય અધિકારી ડોક્ટર એ.પી.ભટ્ટને તાત્કાલિક અસરથી સસ્પેન્ડ કરી દેવામાં આવ્યા છે. ભાગળ ખાતે સ્વચ્છતા ઝૂંબેશનું આયોજન કરવામા આવ્યું હતુ. સવારે 8 વાગ્યે મ્યુનિસિપલ કમિશનર એમ.નાગરાજને પોતે સ્થળ પર સમીક્ષા કરવા પહોંચ્યા હતા. અગાઉથી સૂચના આપી હોવા છતા સેન્ટ્રલ ઝોનના જવાબદાર નાયબ આરોગ્ય અધિકારી ડોક્ટર એપી ભટ્ટ ગેરહાજર જણાયા હતા. મ્યુનિસિપલ કમિશ્નરની આ કાર્યવાહીથી પાલિકાના વહીવટી પ્રશાસનમાં ખળભળાટ મચી ગયો છે.
ટોપ સ્ટોરી
ટ્રેન્ડિંગ સમાચાર
