Accident:રાજકોટ રામાપીર ચોકડીનો પુલ પાસે વધુ એક હિટ એન્ડ રનની ઘટના બની છે. અહીં પૂરપાટ ઝડપે આવતી કારે રાહદારી યુવકને અડફેટે લેતાં તેનું મોત નિપજ્યું હતું.
રાજકોટ રીંગરોડ પર અવારનવાર હિટ એન્ડ રનની ઘટના બને છે. અહીં વધુ એક હિટ એન્ડ રનની ઘટના બની છે. રાજકોટના રામાપીર ચોકડી બ્રિજ ઉતરતા પૂરપાટ ઝડપે આવતી મર્સિડિઝ કારે રાહદારી યુવકને અડફેટે લીધો હતો. કારની સ્પીડ એટલી જોરદાર હતી કે, યુવક હવામાં ઉછળ્યો હતો અને ઘટનાસ્થળે જ યુવકનું મોત નિપજ્યું હતું. અકસ્માત બાદ કાર ચાલક ઘટનાસ્થળેથી નાસી ગયો હતો. કારમાં યુવતી પણ સવાર હોવાની માહિતી સામે આવી છે. ઘટના સ્થળેથી બંને રાતોરાત ભાગી ગયા હતા.મળતી માહિતી મુજબ કારનો ઇન્સ્યોરન્સ 7 ઓગસ્ટ 2022 ના રોજ પુરો થઇ ગયો છે. રાજકોટના બિલ્ડરની કાર હોવાની પ્રાથમિક માહિતી મળી છે. આરટીઓની વેબસાઈટ પર કાર વિરેન જસાણીના નામે છે. પોલીસે આ મામલે વધુ તપાસ હાથ ધરી છે.
Botad:બોટાદમાં તળાવમાં ડૂબી જતા 5 યુવાનોના મોતથી અરેરાટી
બોટાદના કૃષ્ણસાગર તળાવમાં ડૂબી જતા પાંચ યુવાનોના મોત થયા છે. નાહવા પડેલા યુવાનોના ડૂબી જવાથી કરુણ મોત થયા છે. નાહવા પડેલા યુવાનોને બચાવવા ગયેલ ત્રણ યુવાનોના પણ ડૂબી જતાં મોત થયા હતા. તમામ મૃતકો બોટાદના રહેવાસી હોવાનું સામે આવ્યું છે. ફાયર વિભાગે દોઢ કલાકની જહેમત બાદ ડેડ બોડી બહાર કાઢી છે. બોટાદ પોલીસ તેમજ પ્રાંત અધિકારી સહીતના અધિકારીઓ ઘટના સ્થળે પહોંચ્યા હતા.
ઘટનાની જાણ થતાં જ પોલીસ કાફલો ઘટનાસ્થળે પહોંચ્યો હતો. આ ઉપરાંત ફાયરવિભાગની ટીમને પણ ઘટનાની જાણ કરવામાં આવી હતી. ફાયરવિભાગની ટીમે ઘટનાસ્થળે પહોંચીને રેસ્ક્યૂ ઓપરેશન હાથ ધર્યું હતું. ત્યારે દોઢ કલાકની જહેમત બાદ પાંચેય યુવાનોના મૃતદેહ બહાર કાઢવામાં આવ્યા હતા.
Maharashtra: મહારાષ્ટ્રના અકોલામાં તણાવ, પથ્થરમારો બાદ અનેક વાહનો સળગ્યા, શહેરમાં કલમ 144 લાગુ
Akola Violence News: આ મામલાની માહિતી આપતા અકોલા કલેક્ટર નીમા અરોરાએ કહ્યું કે બે જૂથો વચ્ચે હિંસક અથડામણ બાદ શહેરમાં કલમ 144 લાગુ કરવામાં આવી છે. હાલમાં સ્થિતિ નિયંત્રણમાં છે.
મહારાષ્ટ્રના અકોલાના જૂના શહેરમાં વિવાદ થયો હતો. પરંતુ આ નજીવી તકરારને કારણે સ્થિતિ એટલી વણસી ગઇ કે, બંને જૂથો વચ્ચે હિંસા ફાટી નીકળી. આ હિંસાનો એક વીડિયો પણ સોશિયલ મીડિયા પર વાયરલ થઈ રહ્યો છે. આ વાયરલ વીડિયોમાં બે જૂથના લોકો એકબીજા પર પથ્થરમારો કરતા જોવા મળે છે. આ સાથે તેઓ વાહનોમાં તોડફોડ કરી હંગામો મચાવી રહ્યાં છે. બીજી તરફ પોલીસ અધિકારીઓનું કહેવું છે કે, સ્થિતિ હવે નિયંત્રણમાં છે.
હિંસક અથડામણ બાદ શહેરમાં કલમ 144
આ મામલાની માહિતી આપતા અકોલા કલેક્ટર નીમા અરોરાએ કહ્યું કે, બે જૂથો વચ્ચે હિંસક અથડામણ બાદ શહેરમાં કલમ 144 લાગુ કરવામાં આવી છે. પોલીસ અધિકારીઓના જણાવ્યા અનુસાર, હિંસક ટોળાએ કેટલાક વાહનોમાં તોડફોડ કરી હતી. આ પછી પોલીસે બળપ્રયોગ કરીને સ્થિતિને કાબૂમાં લીધી હતી. બીજી તરફ સૂત્રોનું કહેવું છે કે, નજીવી તકરાર બાદ હિંસક અથડામણ થઈ હતી. આ અથડામણ બાદ જૂના શહેર પોલીસ મથકે પણ ભારે ભીડ ઉમટી પડી હતી.
એસપી સંદીપ ઘુગેએ કહ્યું- સ્થિતિ નિયંત્રણમાં છે
બીજી તરફ અકોલાના એસપી સંદીપ ઘુગેએ કહ્યું કે, હાલ સ્થિતિ નિયંત્રણમાં છે. જિલ્લા કલેક્ટર નીમા અરોરાના આદેશ બાદ સમગ્ર અકોલા શહેરમાં કલમ 144 લાગુ કરવામાં આવી છે. તમને જણાવી દઈએ કે તાજેતરના સમયમાં ઓકલામાં આ બીજી મોટી ઘટના છે. થોડા દિવસો પહેલા અકોટ ફાઈલ વિસ્તારના શંકર નગર વિસ્તારમાંથી પણ હિંસક અથડામણના સમાચાર સામે આવ્યા હતા.