એક, બે નહીં પણ પૂરી 375 વસ્તુઓ સસ્તી થશે, 22 સપ્ટેમ્બરથી કઈ કઈ વસ્તુના ભાવ ઘટશે? જાણો સંપૂર્ણ યાદી

નાણામંત્રી નિર્મલા સીતારમણે GST સુધારાની જાહેરાત કરી, સામાન્ય અને મધ્યમ વર્ગને રાહત મળશે; રસોડાથી લઈને ઓટોમોબાઈલ અને દવાઓ સુધીના ભાવ ઘટશે.

Price Reduction September 22: કેન્દ્ર સરકાર દ્વારા 22 સપ્ટેમ્બરથી GST માળખામાં મોટા સુધારા લાગુ કરવામાં આવી રહ્યા છે. આ ફેરફારોને 'GST 2.0' તરીકે ઓળખવામાં આવે છે, જેનો મુખ્ય હેતુ સામાન્ય માણસ અને મધ્યમ વર્ગને મોંઘવારીમાંથી રાહત આપવાનો છે. આ સુધારા હેઠળ, રસોડાની વસ્તુઓથી લઈને ઇલેક્ટ્રોનિક્સ, દવાઓ અને સિમેન્ટ સહિત 375 થી વધુ વસ્તુઓ પરના GST દરોમાં ઘટાડો થશે, જેનાથી આ વસ્તુઓ સસ્તી થશે.

આવશ્યક વસ્તુઓ પર ભાવમાં ઘટાડો

વડાપ્રધાન નરેન્દ્ર મોદીની જાહેરાત બાદ નાણા મંત્રી નિર્મલા સીતારમણે GST કાઉન્સિલમાં થયેલા સુધારાની વિગતો આપી છે. આ સુધારાનો હેતુ લોકોના રોજિંદા ખર્ચમાં ઘટાડો કરવાનો છે, જેનાથી આર્થિક પ્રવૃત્તિને પણ વેગ મળશે. ચાલો જોઈએ કે કઈ કઈ વસ્તુઓ સસ્તી થવાની છે.

રસોઈ અને ખાદ્ય પદાર્થો: દૂધ, કોફી, કન્ડેન્સ્ડ મિલ્ક, બિસ્કિટ, માખણ, અનાજ, કોર્નફ્લેક્સ, 20-લિટર બોટલબંધ પીવાનું પાણી, સૂકા મેવા, ફળોનો પલ્પ, ઘી, આઈસ્ક્રીમ, જામ અને જેલી, કેચઅપ, નાસ્તો, ચીઝ, પેસ્ટ્રી, સોસેજ, માંસ અને નાળિયેર પાણીના ભાવમાં ઘટાડો થશે.

પર્સનલ કેર અને ઘરવપરાશની વસ્તુઓ: આફ્ટર-શેવ લોશન, ફેસ ક્રીમ, ફેસ પાવડર, હેર ઓઈલ, શેમ્પૂ, શેવિંગ ક્રીમ, ટેલ્કમ પાવડર, ટૂથબ્રશ અને ટોઈલેટ સોપ બાર જેવી રોજિંદા વપરાશની વસ્તુઓ પણ સસ્તી થશે.

ઇલેક્ટ્રોનિક્સ અને ઓટોમોબાઈલ: ઇલેક્ટ્રોનિક્સ સેગમેન્ટમાં, એર કંડિશનર (AC), ડીશવોશર, ટેલિવિઝન (TV) અને વોશિંગ મશીન જેવી વસ્તુઓ પરના ભાવ પણ ઘટશે. ઓટો સેક્ટરમાં, સેસ સહિતના કરમાં 35 થી 50 ટકાના ઘટાડા સાથે 40 ટકા પર લાવવામાં આવ્યા છે, જેનો લાભ ઓટો ઉદ્યોગને મળશે.

સ્વાસ્થ્ય સેવાઓ અને સિમેન્ટ: સામાન્ય માણસ માટે દવાઓના ભાવમાં ઘટાડો થશે. ડાયગ્નોસ્ટિક કીટ અને ગ્લુકોમીટર જેવા મેડિકલ ઉપકરણો પર GST ઘટાડીને 5 ટકા કરવામાં આવ્યો છે, જે સીધો લાભ દર્દીઓને આપશે. આ ઉપરાંત, વાળંદ, ફિટનેસ સેન્ટર, હેલ્થ ક્લબ, સલૂન અને યોગ જેવી સેવાઓ પરનો GST પણ ઓછો કરવામાં આવ્યો છે. બાંધકામ ક્ષેત્ર માટે, સિમેન્ટ પરનો GST 28 ટકાથી ઘટાડીને 18 ટકા કરવામાં આવ્યો છે, જેનાથી ઘરની કિંમતોમાં ઘટાડો થવાની સંભાવના છે અને રિયલ એસ્ટેટ સેક્ટરને વેગ મળશે.

GST દરોમાં ઘટાડાની જાહેરાત બાદ Amul, HUL, L'Oreal અને Himalaya જેવી અનેક બ્રાન્ડ્સે તેમના ઉત્પાદનોના ભાવમાં ઘટાડો કરવાનું શરૂ કરી દીધું છે. સરકારે ફાર્મસીઓને પણ નવા GST દર અનુસાર MRP બદલવા અથવા ઓછા ભાવે દવાઓ વેચવાનો નિર્દેશ આપ્યો છે. આશા છે કે આ સુધારાથી બજારમાં માંગ વધશે અને અર્થતંત્રને વેગ મળશે.