8th Pay Commission OPS Update: 8મા પગાર પંચની તૈયારીઓ અને બેઠકો વચ્ચે સરકારી કર્મચારીઓ માટે નિરાશાજનક સમાચાર સામે આવ્યા છે. લાંબા સમયથી જૂની પેન્શન યોજના (OPS) ફરીથી લાગુ કરવાની જે માંગ ચાલી રહી હતી, તે પૂરી થવી હવે મુશ્કેલ લાગી રહી છે. ખુદ આર્થિક નિષ્ણાતો અને હવે તો કર્મચારી સંગઠનો પણ એ વાત સ્વીકારી રહ્યા છે કે રાષ્ટ્રીય પેન્શન સિસ્ટમ (NPS) ને સાવ નાબૂદ કરીને OPSમાં પાછા ફરવું વ્યવહારુ નથી. તેનું સૌથી મોટું કારણ એ છે કે છેલ્લા બે દાયકામાં NPS ફંડમાં 16.5 લાખ કરોડ રૂપિયા જેટલી જંગી રકમ જમા થઈ ચૂકી છે, જે માર્કેટમાં રોકાયેલી છે. જો સરકાર જૂની સિસ્ટમમાં જાય, તો શેરબજાર અને અર્થતંત્રમાં મોટો ભૂકંપ આવી શકે છે. આથી હવે કર્મચારીઓ NPS કે UPS માં જ ગેરંટી માંગી રહ્યા છે.
OPS પર પાછા ફરવું કેમ છે મોટો પડકાર?
વાત એમ છે કે, દેશમાં NPS લાગુ થયાને લગભગ 20 વર્ષ જેટલો સમય વીતી ગયો છે. આટલા વર્ષોમાં કર્મચારીઓના પગારમાંથી કપાયેલા પૈસા અને સરકારના ફાળાને કારણે સિસ્ટમમાં 16.5 લાખ કરોડ રૂપિયાથી વધુનું મોટું ફંડ ભેગું થઈ ગયું છે. આ પૈસા સરકારી તિજોરીમાં બંધ નથી પડ્યા, પરંતુ LIC, SBI અને UTI જેવી સરકારી નાણાકીય સંસ્થાઓ મારફતે શેરબજાર, સરકારી બોન્ડ્સ અને અલગ-અલગ કોર્પોરેટ સેક્ટરમાં રોકવામાં આવ્યા છે.
જો સરકાર અચાનક NPS બંધ કરીને સંપૂર્ણપણે OPS લાગુ કરે, તો આટલી મોટી રકમ રાતોરાત શેરબજાર અને બોન્ડ માર્કેટમાંથી પાછી ખેંચવી પડે. જો આવું થાય, તો માર્કેટમાં મોટો કડાકો બોલી જાય અને દેશમાં રોકડની (તરલતાની) ભારે અછત ઊભી થાય, જે આર્થિક રીતે મોટું જોખમ છે.
કર્મચારી સંગઠનોએ બદલી રણનીતિ
માર્કેટના આ મોટા જોખમને સમજીને હવે ઘણા કર્મચારી યુનિયનોએ પણ પોતાની માંગમાં થોડો ફેરફાર કર્યો છે. તેઓ હવે સીધેસીધી OPS ની જ જીદ પકડી રાખવાને બદલે, હાલની NPS અથવા નવી આવેલી યુનિફાઇડ પેન્શન સ્કીમ (UPS) ના માળખામાં જ રહીને "OPS જેવી ગેરંટી" મળે તેવી માંગ કરી રહ્યા છે.
આ પણ વાંચોઃ નિવૃત્ત કર્મચારીઓ માટે મોટા સમાચાર: કેન્દ્ર સરકારે મોંઘવારી ભથ્થામાં કર્યો મોટો વધારો!
છતાં, કર્મચારીઓને OPS કેમ આટલી વહાલી છે?
આર્થિક બજારની આટલી મોટી મજબૂરીઓ હોવા છતાં, સરકારી કર્મચારીઓ જૂની પેન્શન યોજના (OPS) ની માંગ કેમ કરે છે? તેનું કારણ એ છે કે OPS કર્મચારીઓને 100% સુરક્ષિત અને મોંઘવારી સામે રક્ષણ આપતું ભવિષ્ય પૂરું પાડે છે. OPS માં પેન્શન માટે કર્મચારીના પગારમાંથી એક પણ રૂપિયો કપાતો નથી; આખો ખર્ચ સરકાર પોતાના બજેટમાંથી ઉપાડે છે.
જ્યારે અત્યારની NPS કે UPS માં કર્મચારીએ દર મહિને પોતાના બેઝિક પગારના 10% રકમ પેન્શન ફંડમાં કાપવા માટે આપવી પડે છે. કર્મચારીઓનું માનવું છે કે આ તેમની મહેનતની કમાણી પર સીધો કાપ છે અને તે અન્યાયી છે. બીજું મોટું કારણ એ છે કે, OPS માં જે રીતે મોંઘવારી વધે તેમ વર્ષમાં 2 વખત મોંઘવારી ભથ્થું (DA) વધારવામાં આવે છે, જ્યારે NPS માં આવી કોઈ સગવડ કે ગેરંટી મળતી નથી.