કેન્દ્ર સરકારનો મોટો નિર્ણય: જો તમારા ઘરે PNG પાઇપલાઇન છે, તો હવે નહીં મળે LPG સિલિન્ડર!

14 માર્ચ 2026 ના નવા સરકારી આદેશ મુજબ, પાઈપવાળો ગેસ વાપરતા ગ્રાહકો માટે LPG બાટલો રાખવા પર પ્રતિબંધ મુકાયો છે. બંને કનેક્શન ધરાવનારાઓએ તાત્કાલિક પોતાનો ગેસ સિલિન્ડર જમા કરાવવો પડશે.

Central Govt Order, LPG Cylinder Ban for PNG Pipeline Users 2026

Source : ai

Show Quick Read

Key points generated by AI, verified by newsroom

• PNG કનેક્શન ધરાવતા ઘરોમાં LPG સિલિન્ડર રાખી શકાશે નહીં.
• એક જ ઘરમાં બે અલગ ગેસ કનેક્શન રાખવા પર પ્રતિબંધ મૂકાયો.
• PNG ધરાવતા ગ્રાહકોને LPG સિલિન્ડર રિફિલ નહીં મળે.
• નિયમ ભંગ કરનાર ગેસ એજન્સીઓ સામે કડક કાર્યવાહી થશે.

કેન્દ્ર સરકારે ઘરેલું ગેસ કનેક્શનને લઈને એક બહુ મોટો અને મહત્વનો નિર્ણય લીધો છે. પેટ્રોલિયમ અને કુદરતી ગેસ મંત્રાલય દ્વારા 14 માર્ચ 2026 ના રોજ બહાર પાડવામાં આવેલા સત્તાવાર ગેઝેટ મુજબ, જો તમારા ઘરમાં પાઈપ્ડ નેચરલ ગેસ (PNG) નું કનેક્શન છે, તો હવે તમે ઘરેલું ગેસનો બાટલો એટલે કે એલપીજી (LPG) સિલિન્ડર રાખી શકશો નહીં. સરકારે સ્પષ્ટ કરી દીધું છે કે એક જ ઘરમાં બે અલગ-અલગ ગેસ કનેક્શન નહીં ચાલે. જે ગ્રાહકો પાસે આ બંને કનેક્શન છે, તેમણે પોતાનું LPG કનેક્શન તાત્કાલિક પરત (સરન્ડર) કરવું પડશે. સરકારી તેલ કંપનીઓને પણ આવા ગ્રાહકોને ગેસ રિફીલ ન આપવા માટે કડક સૂચનાઓ આપી દેવામાં આવી છે.

ગ્રાહકો માટે નવા નિયમો શું છે?

ભારત સરકારે આવશ્યક ચીજવસ્તુ અધિનિયમ અંતર્ગત નવો સુધારો લાગુ કર્યો છે. રોજબરોજની ભાષામાં કહીએ તો, જે લોકોના ઘરમાં ગેસની પાઇપલાઇન (PNG) આવી ગઈ છે, તેમને હવે નવું LPG કનેક્શન મળશે નહીં અને જો તેમની પાસે પહેલેથી બાટલો હશે તો તે ચાલુ રાખી શકાશે નહીં.

ઘણા લોકો પાઇપલાઇન હોવા છતાં ઈમરજન્સી કે બેકઅપ માટે ગેસનો બાટલો રાખતા હોય છે, પરંતુ હવે એ શક્ય નથી. આ આદેશમાં સ્પષ્ટપણે જણાવવામાં આવ્યું છે કે આવા ગ્રાહકોને કોઈપણ સરકારી તેલ કંપની કે ગેસ એજન્સી દ્વારા ગેસનો બાટલો ભરી આપવામાં આવશે નહીં.

ગેસ એજન્સીઓ અને તેલ કંપનીઓને કડક ચેતવણી

આ નવો નિયમ માત્ર ગ્રાહકો માટે જ નથી, પરંતુ ગેસ વિતરકો અને સરકારી તેલ કંપનીઓ માટે પણ એટલો જ કડક છે. સરકારે પોતાના ગેઝેટની 'પ્રતિબંધિત પ્રવૃત્તિઓ' ની યાદીમાં કડક સુધારો કર્યો છે.

આ સુધારા મુજબ ગેસ એજન્સીઓને કડક આદેશ આપવામાં આવ્યો છે કે જો કોઈ ગ્રાહક પાસે પહેલેથી જ પીએનજી (PNG) કનેક્શન ચાલુ હોય, તો તેને ઘરેલું એલપીજી (LPG) કનેક્શન આપવું કે તેનો સિલિન્ડર રિફીલ કરી આપવો એ ગેરકાયદેસર ગણાશે. કંપનીઓ માટે આ એક પ્રતિબંધિત પ્રવૃત્તિ જાહેર કરવામાં આવી છે.

LPGની સમસ્યાને લઈને રાહતના સમાચાર: આગામી ૨-૩ દિવસમાં અછત દૂર થવાની શક્યતા

સૂત્રો દ્વારા પ્રાપ્ત માહિતી અનુસાર, દેશમાં વર્તમાન LPGની સમસ્યા આગામી ૨ થી ૩ દિવસમાં દૂર થઈ જશે. સરકારે ગેસની અછતને પહોંચી વળવા માટે અન્ય દેશો પાસેથી ગેસની સપ્લાયમાં નોંધપાત્ર વધારો કર્યો છે. આ અંતર્ગત અમેરિકા અને સઉદી અરબ તેમજ આફ્રિકન દેશો પાસેથી ગેસની આયાત વધારવામાં આવી છે. આ ઉપરાંત, આંતરરાષ્ટ્રીય સપ્લાયની સાથે સ્થાનિક સ્તરે પુરવઠો જાળવી રાખવા માટે ભારતની રિફાઈનરીઓમાં પણ ગેસનું ઉત્પાદન વધારવામાં આવ્યું હોવાનું સૂત્રો દ્વારા જાણવા મળ્યું છે.

આ પણ વાંચો

1 એપ્રિલથી FASTag નો વાર્ષિક પાસ થશે મોંઘો: હાઇવે પર મુસાફરી કરનારાઓ માટે મહત્વના સમાચાર