crude oil price drop: સામાન્ય જનતા માટે મોંઘવારીના મોરચે એક ખૂબ જ સારા અને રાહતના સમાચાર આવી રહ્યા છે. આંતરરાષ્ટ્રીય બજારમાં ક્રૂડ ઓઇલ (કાચા તેલ) ના ભાવમાં મોટો ઘટાડો નોંધાયો છે. અમેરિકા અને ઈરાન વચ્ચેના કરાર બાદ 'હોર્મુઝ કટોકટી' નો અંત આવતા ક્રૂડના ભાવ 120 ડોલર પ્રતિ બેરલથી ગગડીને 76 ડોલર પર આવી ગયા છે. આ જંગી ઘટાડાને પગલે હવે ભારતમાં પણ આગામી દિવસોમાં પેટ્રોલ અને ડીઝલના ભાવ ઘટવાની પૂરેપૂરી શક્યતાઓ સેવાઈ રહી છે. જો ઈંધણ સસ્તું થશે તો સીધી રીતે ટ્રાન્સપોર્ટેશન ખર્ચ ઘટશે અને લોકોને જીવનજરૂરી ચીજવસ્તુઓના ભાવમાં મોટો ફાયદો થશે.
હોર્મુઝ કટોકટી ટળતા ક્રૂડના ભાવ કેમ ઘટ્યા?
તાજેતરમાં ઈરાન અને અમેરિકા વચ્ચેના યુદ્ધ જેવા તણાવને કારણે હોર્મુઝની ખાડીમાં કટોકટી સર્જાઈ હતી. બજારમાં ડર હતો કે દુનિયાભરમાં તેલનો સપ્લાય ખોરવાઈ જશે. આ ભયના લીધે ક્રૂડ ઓઇલના ભાવ આસમાને પહોંચી ગયા હતા અને 120 ડોલરને પાર થઈ ગયા હતા. આ જ સમયગાળા દરમિયાન ભારતમાં પણ તેલ કંપનીઓએ પેટ્રોલ અને ડીઝલના ભાવ વધાર્યા હતા. પરંતુ હવે પરિસ્થિતિ થાળે પડતા ગેસ અને ઓઇલના જહાજોની અવરજવર હોર્મુઝમાંથી ફરી રાબેતા મુજબ શરૂ થઈ ગઈ છે. સપ્લાય અંગેની ચિંતાઓ દૂર થતાં જ માંગ અને ઉપલબ્ધતા વચ્ચે સંતુલન સ્થપાયું છે અને ભાવ ઘટીને 76 ડોલરની આસપાસ આવી ગયા છે.
શું દેશમાં પેટ્રોલ-ડીઝલ તાત્કાલિક સસ્તા થશે?
કાચા તેલના ભાવ ઘટતાં જ સ્વાભાવિક રીતે લોકો એવી આશા રાખી રહ્યા છે કે પેટ્રોલ પંપ પર તરત જ ભાવ ઘટી જશે. પરંતુ વાસ્તવમાં આંતરરાષ્ટ્રીય બજારની અસર રિટેલ માર્કેટમાં તાત્કાલિક જોવા મળતી નથી, તેમાં થોડો સમય લાગે છે. તેલ કંપનીઓ માત્ર ક્રૂડ ઓઇલના ભાવ જ નહીં, પરંતુ ડોલર સામે રૂપિયાની સ્થિતિ અને રિફાઇનિંગ સહિતના અન્ય ખર્ચાઓને ધ્યાનમાં રાખીને ભાવ નક્કી કરે છે. જોકે, જો આગામી દિવસોમાં ક્રૂડ ઓઇલના ભાવ આ રીતે જ નીચા રહેશે, તો ચોક્કસથી પેટ્રોલ અને ડીઝલના ભાવમાં ઘટાડો જોવા મળશે.
આ પણ વાંચોઃ હોર્મુઝ વિવાદ: પેટ્રોલ ₹150ને પાર જશે? જાણો LPG અને ફસાયેલા જહાજોની આખી સ્થિતિ વિશે
પેટ્રોલ-ડીઝલના ભાવ અંગે સરકારનું શું કહેવું છે?
આ મુદ્દે થોડા દિવસો પહેલા જ પેટ્રોલિયમ મંત્રી હરદીપ સિંહ પુરીએ પરિસ્થિતિ સ્પષ્ટ કરતા જણાવ્યું હતું કે, હાલમાં તેલ કંપનીઓ પાસે અગાઉ ઊંચા ભાવે ખરીદેલા ક્રૂડ ઓઇલનો જૂનો સ્ટોક પડેલો છે. એકવાર આ મોંઘા ક્રૂડ ઓઇલનો સ્ટોક પ્રોસેસ થઈ જશે અને નવા સસ્તા ક્રૂડનો વારો આવશે, એટલે તરત જ રિટેલ માર્કેટમાં (પેટ્રોલ પંપ પર) પેટ્રોલ અને ડીઝલના ભાવમાં ઘટાડો કરવામાં આવી શકે છે.
સામાન્ય માણસને શું ફાયદો થશે?
હોર્મુઝ સ્ટ્રેટનો રસ્તો ખુલવાથી તેલ પુરવઠામાં મોટી રાહત મળી છે. જો આગામી દિવસોમાં દેશમાં પેટ્રોલ અને ડીઝલના ભાવ ઘટશે, તો તેની સીધી અને સકારાત્મક અસર સામાન્ય માણસના ખિસ્સા પર પડશે. ઈંધણ સસ્તું થવાથી ટ્રક અને ગુડ્સ ટ્રાન્સપોર્ટનો નૂર ખર્ચ ઘટશે, જેને લીધે રોજિંદા વપરાશની વસ્તુઓ, શાકભાજી અને અનાજ પણ સસ્તા થશે, પરિણામે દેશમાં ફુગાવો (મોંઘવારી) કંટ્રોલમાં આવશે.
આ પણ વાંચોઃ 100% ઇથેનોલ ઇંધણથી ગાડીમાં કેટલી માઇલેજ મળશે? પેટ્રોલ અને ડીઝલ કરતાં વધુ કે ઓછી?