epfo edli scheme benefits: જો તમે નોકરી કરો છો અને દર મહિને તમારા પગારમાંથી ફંડ (EPF) કપાય છે, તો તમારા માટે એક બહુ જ અગત્યના સમાચાર છે. મોટાભાગના કર્મચારીઓને એ ખબર જ નથી હોતી કે EPF ખાતાની સાથે જ તેમને મફતમાં એક મોટો જીવન વીમો પણ મળે છે. EPFO ની 'એમ્પ્લોયી ડિપોઝિટ લિંક્ડ ઇન્શ્યોરન્સ' (EDLI) સ્કીમ હેઠળ, જો કોઈ પણ સક્રિય કર્મચારીનું નોકરી દરમિયાન દુઃખદ મૃત્યુ થાય છે, તો તેના પરિવાર અથવા નોમિનીને 7 લાખ રૂપિયા સુધીની આર્થિક સહાય મળે છે. સૌથી મહત્વની વાત એ છે કે આ રકમ તમારા PF બેલેન્સ અને પેન્શન (EPS) ના લાભો કરતાં બિલકુલ અલગથી આપવામાં આવે છે.
શું છે EDLI યોજના અને કોણ ભરે છે પ્રીમિયમ?
EDLI એ સરકાર દ્વારા ચાલતી એક એવી સામાજિક સુરક્ષા યોજના છે, જે ખાસ કરીને સંગઠિત ક્ષેત્રમાં (પ્રાઇવેટ સેક્ટરમાં) કામ કરતા લોકોના પરિવારને આર્થિક સુરક્ષા આપવા માટે બનાવવામાં આવી છે. આ યોજનાની સૌથી મોટી ખાસિયત એ છે કે આ વીમા કવચ માટે કર્મચારીએ પોતાના ખિસ્સામાંથી એક પણ રૂપિયો પ્રીમિયમ તરીકે ભરવાનો હોતો નથી. EPF સભ્ય બનતાની સાથે જ તમે આ યોજનામાં આપમેળે જોડાઈ જાવ છો અને તેનું પૂરેપૂરું પ્રીમિયમ તમારી કંપની (એમ્પ્લોયર) દ્વારા જમા કરવામાં આવે છે.
વીમામાં કેટલી રકમ મળે છે?
આ યોજના હેઠળ મૃતક કર્મચારીના પરિવારને ઓછામાં ઓછા 2.5 લાખ રૂપિયા અને વધુમાં વધુ 7 લાખ રૂપિયા સુધીનો વીમા લાભ મળે છે. કોવિડ-19 મહામારી પછી સરકારે આ વીમાની મહત્તમ રકમ વધારીને 7 લાખ રૂપિયા કરી દીધી હતી. આ રકમ કર્મચારીના છેલ્લા પગાર અને તેના EPF ખાતાને લગતા અમુક માપદંડોના આધારે નક્કી કરવામાં આવે છે.
આ પણ વાંચોઃ શું તમે પણ ખોટું બહાનું બનાવી પીએફના રૂપિયા ઉપાડો છો? PF ઉપાડવાના નવા નિયમો જાણો, નહીંતર ભરાઈ જશો!
ક્યારે અને કોને મળે છે આ પૈસા?
આ વીમાનો લાભ માત્ર ત્યારે જ મળે છે જ્યારે કર્મચારીનું નોકરીના સમયગાળા (સક્રિય રોજગાર) દરમિયાન મૃત્યુ થાય. પછી ભલે તે મૃત્યુ કોઈ બીમારીના કારણે થયું હોય કે આકસ્મિક રીતે. ઘરના મુખ્ય કમાનાર વ્યક્તિના અચાનક અવસાનથી પરિવાર પર જે આર્થિક સંકટ આવે છે, તેને થોડું હળવું કરવા માટે આ તાત્કાલિક નાણાકીય સહાય પૂરી પાડવામાં આવે છે.
ખાતામાં નોમિની હોવું કેમ છે સૌથી જરૂરી?
જો કર્મચારીએ પોતાના EPF ખાતામાં નોમિનીનું નામ પહેલેથી જ ઉમેરેલું હોય, તો વીમાની રકમ સીધી એ જ વ્યક્તિને કોઈપણ અડચણ વગર મળી જાય છે. પરંતુ જો નોમિનીનું નામ અપડેટ ન હોય, તો કાનૂની વારસદારને પૈસા લેવા માટે લાંબી પ્રક્રિયામાંથી પસાર થવું પડે છે. આથી જ નિષ્ણાતો હંમેશા સલાહ આપે છે કે તમારા EPF ખાતામાં નોમિનીની વિગતો અને બેંક એકાઉન્ટ વગેરે હંમેશા અપડેટ રાખો, જેથી મુશ્કેલ સમયમાં પરિવારને હેરાન ન થવું પડે.
આ પણ વાંચોઃ PF Withdrawal Rules 2025: હવે પીએફના પૈસા ઉપાડવા બન્યા આસાન, EPFOએ આપ્યા બે સરળ વિકલ્પ