Multibagger stocks India 2026: શેરબજારમાં રોકાણકારો હંમેશા એવા શેરોની શોધમાં હોય છે જે લાંબા ગાળે તેમને માલામાલ કરી દે. મંગળવારે શેરબજારમાં સારી તેજી જોવા મળી હતી અને નિફ્ટી 50 ઇન્ડેક્સ 0.63 ટકા વધીને 23,269.35 ના સ્તરે પહોંચ્યો હતો. બજારના આ ઉતાર-ચઢાવ વચ્ચે છેલ્લા 10 વર્ષમાં કેટલાક એવા શેરો રહ્યા છે જેણે રોકાણકારોને કલ્પના બહારનો નફો કરાવ્યો છે. આજે આપણે એવા 5 સુપર મલ્ટિબેગર શેરો વિશે વાત કરીશું જેણે છેલ્લા 10 વર્ષમાં 6000% સુધીનું છપ્પરફાડ રિટર્ન આપ્યું છે. એટલે કે, જો કોઈએ 10 વર્ષ પહેલા આમાં માત્ર 1 લાખ રૂપિયા રોક્યા હોત, તો આજે તે રકમ લાખોમાં ફેરવાઈ ગઈ હોત. ચાલો જાણીએ આ 5 શેરો વિશે અને તેમની આ જબરદસ્ત પ્રગતિ પાછળના મુખ્ય કારણો.
1. પતંજલિ ફૂડ્સ લિમિટેડ (Patanjali Foods Ltd)
આ સમયગાળા દરમિયાન રોકાણકારોને સૌથી વધુ કમાણી કરાવવામાં પતંજલિ ફૂડ્સ મોખરે છે. છેલ્લા 10 વર્ષમાં આ શેરે લગભગ 6,156% નું જંગી વળતર આપ્યું છે. કંપની માત્ર ખાદ્ય તેલ પૂરતી સીમિત ન રહેતા ફૂડ, હોમ કેર અને પર્સનલ કેર સેગમેન્ટમાં પણ જબરદસ્ત એન્ટ્રી મારી ચૂકી છે. પતંજલિ આયુર્વેદ પાસેથી બિઝનેસ હસ્તગત કર્યા બાદ તેમનો FMCG પોર્ટફોલિયો ખૂબ મજબૂત બન્યો, જેના કારણે તેમની કમાણી અને નફામાં મોટો ઉછાળો આવ્યો છે.
2. ક્યુપિડ લિમિટેડ (Cupid Ltd)
ક્યુપિડ લિમિટેડે પણ રોકાણકારોને નિરાશ નથી કર્યા. છેલ્લા એક દાયકામાં આ શેરે આશરે 5,692% નું રિટર્ન આપ્યું છે. આ કંપની મેલ અને ફીમેલ કોન્ડોમ, પર્સનલ લુબ્રિકન્ટ્સ અને ડાયગ્નોસ્ટિક પ્રોડક્ટ્સ બનાવવામાં ગ્લોબલ લેવલે મોટું નામ બની ગઈ છે. વિદેશી બજારોમાં વધતી માંગ, ઇન્ટરનેશનલ હેલ્થ એજન્સીઓના ઓર્ડર અને નવી પ્રોડક્ટ્સ લાવવાને કારણે કંપનીએ આ લાંબી મજલ કાપી છે.
3. લોયડ્સ એન્જિનિયરિંગ વર્ક્સ (Lloyds Engineering Works)
એન્જિનિયરિંગ અને ઇન્ફ્રાસ્ટ્રક્ચર સેક્ટરમાં ધૂમ મચાવનાર લોયડ્સ એન્જિનિયરિંગ વર્ક્સે 10 વર્ષમાં લગભગ 4,704% નું વળતર આપ્યું છે. કંપનીએ મોટા અને હાઈ-વેલ્યુ ઔદ્યોગિક પ્રોજેક્ટ્સ હાથ ધર્યા અને એન્જિનિયરિંગ કોન્ટ્રાક્ટ્સ સમયસર પૂરા કર્યા. અલગ-અલગ સેક્ટરમાં કામ કરવાના લીધે તેમની ઓર્ડર બુક હંમેશા ભરેલી રહી અને નાણાકીય કામગીરી સતત મજબૂત થતી ગઈ.
4. ડાયમંડ પાવર ઇન્ફ્રાસ્ટ્રક્ચર લિમિટેડ (Diamond Power Infrastructure Ltd)
આ શેરે છેલ્લા 10 વર્ષમાં આશરે 4,290% રિટર્ન આપીને રોકાણકારોને ખુશ કરી દીધા છે. ભારતના પાવર ટ્રાન્સમિશન અને ડિસ્ટ્રિબ્યુશન સેક્ટરમાં વધેલી માંગનો કંપનીને સીધો ફાયદો મળ્યો છે. કંપનીના રિસ્ટ્રક્ચરિંગ બાદ તાજેતરના ક્વાર્ટરમાં તેના નફામાં જોરદાર સુધારો જોવા મળ્યો છે. ખાસ વાત એ છે કે માર્ચ 2026 સુધીમાં કંપનીમાં પ્રમોટર્સનું હોલ્ડિંગ 84% થી વધુ રહ્યું છે.
5. અદાણી પાવર લિમિટેડ (Adani Power Ltd)
ગૌતમ અદાણીની આ કંપનીએ છેલ્લા 10 વર્ષમાં રોકાણકારોને આશરે 3,587% નું તગડું વળતર આપ્યું છે. દેશમાં વીજળીની સતત વધતી માંગ, શાનદાર કામગીરી અને સતત નવા પાવર પ્લાન્ટ્સ ખરીદવાને કારણે અદાણી પાવર આજે ભારતની સૌથી મોટી ખાનગી થર્મલ પાવર કંપની બની ગઈ છે. નાણાકીય વર્ષ 2026 માં કંપનીએ 105 અબજ યુનિટ વીજળીનું ઉત્પાદન કર્યું હતું અને તેની કુલ ક્ષમતા 13.3 GW સુધી પહોંચી ગઈ છે.
(ડિસ્ક્લેમર: આ લેખ માત્ર માહિતી આપવાના હેતુથી લખવામાં આવ્યો છે. આ કોઈ રોકાણ માટેની સલાહ નથી. શેરબજારમાં રોકાણ બજારના જોખમોને આધીન છે, તેથી કોઈપણ રોકાણ કરતા પહેલા તમારા નાણાકીય સલાહકારની સલાહ ચોક્કસ લો.)
આ પણ વાંચોઃ સ્ટોક્સ અને મ્યુચ્યુઅલ ફંડમાં ગુમાવ્યા પૈસા, જાણો હવે રોકાણ માટે કયા વિકલ્પો છે