ખાદ્ય તેલ કંપનીઓની ચાલાકી બંધ: 850 કે 900 ગ્રામના પેકિંગ પર સરકારે મૂક્યો મોટો પ્રતિબંધ

Edible oil packaging new rules 2026: હવે 1 કિલોના નામે 900 ગ્રામ તેલ પકડાવતી કંપનીઓની છેતરપિંડી નહીં ચાલે, સરકારે માત્ર 9 સ્ટાન્ડર્ડ સાઇઝ નક્કી કરી; નિયમ પાળવા 3 મહિનાની મહેતલ.

government bans non standard edible oil packaging packaging fraud 2026

Source : ai

Show Quick Read

Key points generated by AI, verified by newsroom

• કેન્દ્ર સરકારે ખાદ્ય તેલના પેકિંગમાં વજનની છેતરપિંડી અટકાવી.
• ખાદ્ય તેલના ફક્ત 9 સ્ટાન્ડર્ડ વજનના પેકેટ્સ જ બજારમાં મળશે.
• પેકેટ પર લિટર સાથે ફરજિયાતપણે ચોખ્ખું વજન ગ્રામ/કિલોમાં દર્શાવવું પડશે.
• નિયમો લાગુ કરવા 3 મહિનાનો સમય, જેનાથી પારદર્શકતા સુનિશ્ચિત થશે.

Edible oil packaging new rules 2026: સામાન્ય માણસ માટે એક મોટા અને ખૂબ જ રાહતના સમાચાર છે. અત્યાર સુધી બજારમાં તેલના ડબ્બા કે પાઉચ ખરીદતી વખતે ગ્રાહકોને 1 કિલોના નામે 850 કે 900 ગ્રામ તેલ પકડાવી દેવામાં આવતું હતું. તેલ કંપનીઓની આ સ્માર્ટ છેતરપિંડી અટકાવવા માટે કેન્દ્ર સરકારે એક ઐતિહાસિક નિર્ણય લીધો છે. સરકારે હવે ખાદ્ય તેલના પેકિંગ માટે મનસ્વી વજન પર પ્રતિબંધ મૂકીને માત્ર 9 ચોક્કસ સાઇઝ જ નક્કી કરી છે. હવે કોઈ પણ કંપની પોતાની મરજીથી ગમે તેવા વજનના પેકેટ બજારમાં વેચી શકશે નહીં.

કિંમત ન વધારીને વજન ઘટાડવાની રમત પર બ્રેક

છેલ્લા કેટલાક સમયથી ખાદ્ય તેલ બનાવતી કંપનીઓએ નફો કમાવવા માટે એક નવી ચાલાકી શરૂ કરી હતી. તેઓ તેલના ભાવ સીધા વધારવાને બદલે ગ્રાહકોને ખબર ન પડે તે રીતે પેકેટનું વજન ઘટાડી દેતા હતા. એટલે કે, તમે દુકાનેથી 1 કિલો સમજીને જે પેકેટ લાવતા, તેમાં 850 ગ્રામ, 900 ગ્રામ કે 910 ગ્રામ જ તેલ નીકળતું. અલગ-અલગ કંપનીઓના આવા આડાઅવળા વજનના કારણે ગ્રાહકોને સાચો ભાવ સમજવો મુશ્કેલ બની જતો અને સીધું તેમના ખિસ્સાને નુકસાન થતું. આ 'પેકેજિંગ છેતરપિંડી' રોકવા હવે આવા તમામ વચગાળાના પેકેટ્સ પર સરકારે પ્રતિબંધ લગાવી દીધો છે.

હવે બજારમાં માત્ર આ 9 સાઇઝના જ પેકેટ મળશે

કેન્દ્ર સરકારના ગ્રાહક બાબતોના મંત્રાલયે લીગલ મેટ્રોલોજી ફ્રેમવર્ક હેઠળ આ નવો નિયમ બહાર પાડ્યો છે. હવેથી પામ ઓઇલ, સોયાબીન, સૂર્યમુખી, સરસવ કે મગફળીનું તેલ હોય - તમામ કંપનીઓએ નીચે મુજબની માત્ર 9 સ્ટાન્ડર્ડ સાઇઝમાં જ તેલ વેચવું પડશે:

200 ગ્રામ, 500 ગ્રામ, 1 કિલો, 2 કિલો, 3 કિલો, 4 કિલો, 5 કિલો, 15 કિલો, 20 કિલો

(નોંધ: 200 ગ્રામ કે 200 મિલીલીટરથી નાના પેકેટોને આ નિયમમાંથી છૂટ આપવામાં આવી છે.)

આ પણ વાંચોઃ યુદ્ધની અસર સીધી રસોડા પર! ખાદ્યતેલોના ભાવમાં ભડકો, ગૃહિણીઓનું બજેટ ખોરવાયું!

નવો નિયમ: લિટરની સાથે ગ્રામ/કિલોમાં પણ વજન લખવું પડશે

આ ઉપરાંત એક બીજો કડક નિયમ પણ બનાવાયો છે. જો કોઈ કંપની પેકેટ પર તેલનું માપ મિલીલીટર કે લિટરમાં લખશે, તો તેણે એ જ સાઇઝના અક્ષરો અને અંકોમાં તેનું ચોખ્ખું વજન (ગ્રામ કે કિલોગ્રામમાં) પણ ફરજિયાતપણે લખવું પડશે. જેથી ગ્રાહકોને એક્ઝેક્ટ ખબર પડે કે તેમને કેટલું તેલ મળી રહ્યું છે.

દેશની તમામ તેલ ઉત્પાદક કંપનીઓ, પેકર્સ અને આયાતકારોને આ નવા નિયમોનો અમલ કરવા માટે 3 મહિનાનો સમય (ટ્રાન્ઝિશન પિરિયડ) આપવામાં આવ્યો છે. આ 3 મહિના પૂરા થતાં જ બજારમાં સંપૂર્ણ પારદર્શિતા આવી જશે અને ગ્રાહકો પૂરા પૈસા આપીને પૂરો માલ મેળવી શકશે.

આ પણ વાંચોઃ ખાદ્ય તેલનો ઓછો વપરાશ એ જ સાચી દેશભક્તિ! પીએમ મોદીએ રાષ્ટ્રના હિતમાં નાગરિકોને કરી ખાસ અપીલ