સોના બાદ હવે ચાંદી પર સરકારની કડક કાર્યવાહી, સરકારે લગાવ્યો પ્રતિબંધ, ખરીદતા પહેલા જાણો નવા નિયમો

કેન્દ્ર સરકારે ચાંદીના વેપાર અંગે મોટો નિર્ણય લેતા ચાંદીના બારની સીધી આયાત પર પ્રતિબંધ મૂક્યો છે. દેશની વધતી વેપાર ખાધ અને રૂપિયા પરના દબાણને ઘટાડવા માટે સરકારે આ કડક પગલું ભર્યું છે.

silver import ban india: દેશમાં વધી રહેલી વેપાર ખાધ અને વિદેશી હૂંડિયામણને બચાવવાના હેતુથી કેન્દ્ર સરકારે સોના બાદ હવે ચાંદીની આયાત પર પણ કડક નિયંત્રણો લાદ્યા છે. સરકારે તાત્કાલિક અસરથી ચાંદીના બારની સીધી આયાત પર પ્રતિબંધ મૂકી દીધો છે. આનો સીધો અર્થ એ છે કે હવે કોઈપણ સામાન્ય વેપારી વિદેશથી સીધી ચાંદી મંગાવી શકશે નહીં. માત્ર 4 દિવસ પહેલાં જ સરકારે સોના અને ચાંદી પરની આયાત ડ્યૂટી 6% થી વધારીને 15% કરી હતી. આર્થિક બોજ ઘટાડવા અને રૂપિયાને મજબૂત કરવા માટે લેવાયેલા આ નિર્ણયથી બુલિયન માર્કેટમાં મોટી અસર જોવા મળશે.

શું છે નવો નિયમ?

ડિરેક્ટોરેટ જનરલ ઓફ ફોરેન ટ્રેડ (DGFT) એ આજે ચાંદીના બે બાર કોડ, 71069221 અને 71069229 ને 'ફ્રી' (મુક્ત) કેટેગરીમાંથી હટાવીને 'પ્રતિબંધિત' (restricted) શ્રેણીમાં મૂકી દીધા છે. આ નિર્ણય તાત્કાલિક અસરથી લાગુ કરવામાં આવ્યો છે, જેના કારણે હવે ખાનગી વેપારીઓ માટે વિદેશથી ચાંદીની આયાત કરવાના દરવાજા બંધ થઈ ગયા છે.

તો હવે ચાંદીની આયાત કેવી રીતે થશે?

આ નવા નિયમ બાદ, હવે દેશમાં ચાંદી માત્ર ત્રણ જ અધિકૃત માધ્યમો દ્વારા આયાત કરી શકાશે:

રિઝર્વ બેંક ઓફ ઇન્ડિયા (RBI) દ્વારા નક્કી કરવામાં આવેલી બેંકો.

DGFT દ્વારા નિયુક્ત કરવામાં આવેલી ખાસ એજન્સીઓ.

ઇન્ટરનેશનલ ફાઇનાન્શિયલ સર્વિસીસ સેન્ટર ઓથોરિટી (IFSA) દ્વારા મંજૂર કરાયેલા લાયક ઝવેરીઓ, જેઓ માત્ર ઇન્ડિયા ઇન્ટરનેશનલ બુલિયન એક્સચેન્જ (IIBX) દ્વારા જ આયાત કરી શકશે.

આ પણ વાંચોઃ એક વર્ષ સુધી સોનું ન ખરીદવાથી દેશમાં શું થશે? પીએમ મોદીની અપીલ પાછળ છે $72 બિલિયનનો ખેલ

સરકારને આ નિર્ણય કેમ લેવો પડ્યો?

છેલ્લા કેટલાક સમયથી દેશની અર્થવ્યવસ્થા પર આયાતનું મોટું દબાણ જોવા મળી રહ્યું છે. આંકડાઓ પર નજર કરીએ તો:

વર્ષ 2025 માં ભારતે $9.2 બિલિયન ની ચાંદીની આયાત કરી હતી, જે વર્ષ 2024 ની સરખામણીમાં 44% વધુ છે.

માત્ર એક જ વર્ષમાં ચાંદીના ભાવ લગભગ ત્રણ ગણા વધીને ₹2.43 લાખ પ્રતિ કિલોગ્રામને પાર કરી ગયા છે.

દેશની વેપાર ખાધ $333 બિલિયન ના રેકોર્ડ ઉચ્ચ સ્તરે પહોંચી ગઈ છે, જેના કારણે ભારતીય રૂપિયા પર ભારે દબાણ ઊભું થયું છે.

આ જ કારણોસર સરકાર કોઈપણ ભોગે ચાંદીની આયાત ઘટાડવા માંગે છે. વિદેશી હૂંડિયામણનો ખર્ચ બચાવવા માટે જ ગયા અઠવાડિયે વડાપ્રધાન નરેન્દ્ર મોદીએ દેશવાસીઓને અપીલ કરી હતી કે તેઓ એક વર્ષ સુધી સોનાની ખરીદી કરવાનું ટાળે.