નવી દિલ્હીઃ કેન્દ્ર સરકારે આવનારા સમયમાં સરકારી નોકરીની તૈયારી કરતા યુવાનોને વધુને વધુ નોકરીઓ આપવાનો મૂડ બનાવ્યો છે. જ્યારથી વડાપ્રધાન નરેન્દ્ર મોદીએ જાહેરાત કરી છે કે આગામી 1.5 વર્ષમાં 10 લાખ જગ્યાઓ માટે યુવાનોની ભરતી કરવામાં આવશે, ત્યારથી વિવિધ સરકારી વિભાગોએ ખાલી જગ્યાઓ પર ઝડપથી ભરતી પૂર્ણ કરવાની તૈયારી શરૂ કરી દીધી છે.
આ ક્રમમાં, સ્ટાફ સિલેકશન કમિશન (SSC) એ પણ 15,247 જગ્યાઓ માટે ચાલી રહેલી ભરતી પ્રક્રિયાને ટૂંક સમયમાં પૂર્ણ કરવાનો નિર્ણય લીધો છે. પીઆઈબી દ્વારા જાહેર કરવામાં આવેલી માહિતીમાં કહેવામાં આવ્યું છે કે કેન્દ્ર સરકારમાં વધુ નોકરીની તકો ઉપલબ્ધ થવા જઈ રહી છે. SASC ટૂંક સમયમાં 15,247 જગ્યાઓ માટે ચાલુ ભરતી પ્રક્રિયા પૂર્ણ કરશે. આ પોસ્ટ્સ માટે નિમણૂક પત્રો આગામી થોડા મહિનામાં જારી કરવામાં આવશે.
PIB એ એમ પણ કહ્યું છે કે, "42,000 ભરતી ડિસેમ્બર 2022 પહેલા પૂર્ણ કરવામાં આવશે. SSC એ તેની આગામી પરીક્ષાઓ માટે તરત જ 67,768 ખાલી જગ્યાઓ ભરવાની યોજના તૈયાર કરી છે."
નોંધનીય છે કે, 14 જૂન, 2022 ના રોજ વડા પ્રધાન નરેન્દ્ર મોદીએ જાહેરાત કરી હતી કે આગામી 1.5 વર્ષમાં કેન્દ્ર સરકારના વિવિધ મંત્રાલયો અને વિભાગોમાં 10 લાખ પદો માટે ભરતી પ્રક્રિયા પૂર્ણ કરવામાં આવશે. આ ક્રમમાં રક્ષા મંત્રી રાજનાથ સિંહે યુવાનોને વધુ તક આપવા માટે આર્મી, એરફોર્સ અને નેવી ત્રણેય સેનાઓમાં યુવાનોની ભરતી માટે અગ્નિપથ નામની યોજના પણ શરૂ કરી છે. આ યોજના હેઠળ અગ્નિવીરોની 4 વર્ષ માટે ભરતી કરવામાં આવશે.