Stock Market Holiday 15 January: શેરબજારમાં નાણાં રોકતા ટ્રેડર્સ અને ઈન્વેસ્ટર્સ (Investors) માટે આ અઠવાડિયે એક મહત્વના સમાચાર છે. જો તમે ગુરુવારે ટ્રેડિંગ કરવાનું વિચારી રહ્યા હોવ, તો તમારે તમારો પ્લાન બદલવો પડી શકે છે. ભારતીય શેરબજારના બંને મુખ્ય એક્સચેન્જ, બોમ્બે સ્ટોક એક્સચેન્જ (BSE) અને નેશનલ સ્ટોક એક્સચેન્જ (NSE) એ આગામી 15 જાન્યુઆરી, 2026 (ગુરુવાર) ના રોજ બજારમાં રજા (Stock Market Holiday) જાહેર કરી છે. આ દિવસે ઇક્વિટી, ડેરિવેટિવ્ઝ અને SLB સેગમેન્ટમાં કોઈ કામકાજ થશે નહીં.
બજાર બંધ રહેવાનું મુખ્ય કારણ
શેરબજાર બંધ રાખવા પાછળનું મુખ્ય કારણ મુંબઈમાં યોજાનારી બૃહદ મુંબઈ મ્યુનિસિપલ કોર્પોરેશનની ચૂંટણી (BMC Election) છે. BSE અને NSE બંને એક્સચેન્જના વડામથકો મુંબઈમાં આવેલા હોવાથી, ચૂંટણીના દિવસે મતદાનની સુવિધા માટે વહીવટીતંત્ર દ્વારા રજા જાહેર કરવામાં આવી છે. અગાઉ મહારાષ્ટ્ર વિધાનસભાની ચૂંટણી સમયે પણ બજારો બંધ રાખવાનો નિર્ણય લેવામાં આવ્યો હતો. આ દિવસે શેરબજારમાં ટ્રેડિંગ સંપૂર્ણપણે સ્થગિત (Trading Suspended) રહેશે.
કોમોડિટી માર્કેટ માટે શું છે નિયમ?
જોકે, કોમોડિટી ટ્રેડર્સ માટે થોડી રાહત છે. મલ્ટી કોમોડિટી એક્સચેન્જ (MCX) પર સવારનું સત્ર બંધ રહેશે, પરંતુ સાંજના સત્રમાં ટ્રેડિંગ રાબેતા મુજબ ચાલુ રહેશે. એટલે કે, સાંજે 5:00 વાગ્યા પછી કોમોડિટી માર્કેટમાં કામકાજ થઈ શકશે.
આગામી રજા અને માર્કેટનું ગણિત
વર્ષ 2026 ના હોલિડે કેલેન્ડર મુજબ, આ મહિનામાં શેરબજારની બીજી રજા 26 જાન્યુઆરીએ 'પ્રજાસત્તાક દિવસ' (Republic Day) નિમિત્તે રહેશે. સેબી (SEBI) ના જણાવ્યા અનુસાર, ભારતમાં BSE (Bombay Stock Exchange) અને NSE (National Stock Exchange) ઉપરાંત કોલકાતા સ્ટોક એક્સચેન્જ (CSE) અને મેટ્રોપોલિટન સ્ટોક એક્સચેન્જ (MSE) એમ કુલ 4 એક્સચેન્જ કાર્યરત છે.
સોમવારે બજારમાં જોવા મળી હતી તેજી
સપ્તાહની શરૂઆત બજાર માટે સારી રહી હતી. છેલ્લા અઠવાડિયાના સતત પાંચ દિવસના ઘટાડા બાદ સોમવારે બજારમાં બાઉન્સ બેક જોવા મળ્યું હતું. શરૂઆતી ઘટાડા બાદ નીચલા મથાળેથી ખરીદી નીકળતા બજાર ગ્રીન ઝોનમાં બંધ રહ્યું હતું.
સેન્સેક્સ (Sensex): 301.93 પોઈન્ટ (0.36%) વધીને 83,878.17 ની સપાટીએ બંધ રહ્યો.
નિફ્ટી (Nifty 50): 106.95 પોઈન્ટ (0.42%) ના ઉછાળા સાથે 25,790.25 પર બંધ થયો.
આમ, 15 જાન્યુઆરીએ રજા હોવાથી ટ્રેડર્સે પોતાની પોઝિશન તે મુજબ એડજસ્ટ કરવાની સલાહ આપવામાં આવે છે.