Tata Motors Hikes Prices: મારુતિ સુઝુકી પછી ટાટા મોટર્સે નવા વર્ષમાં પણ પેસેન્જર કારના ભાવમાં વધારો કરવાની જાહેરાત કરી છે. નવી કિંમતો બુધવાર, 19 જાન્યુઆરી, 2022 થી લાગુ થશે.
ટાટા મોટર્સે જાહેરાત કરી છે કે કંપની 19 જાન્યુઆરીથી તેના પેસેન્જર વાહનોના ભાવમાં સરેરાશ 0.9 ટકાનો વધારો કરવા જઈ રહી છે. કયા વાહનોની કિંમતમાં વધારો મોડલ વેરિઅન્ટ પર નિર્ભર રહેશે. જો કે, ટાટા મોટર્સે કહ્યું છે કે 18 જાન્યુઆરી, 2022 પહેલા વાહનો ખરીદવા માટે બુકિંગ કરાવનારા ગ્રાહકોને ભાવ વધારાની અસર નહીં થાય. તે જ સમયે, ટાટા મોટર્સે ગ્રાહકોના પ્રતિસાદના આધારે કેટલાક વેરિયન્ટ્સની કિંમતોમાં રૂ. 10,000નો ઘટાડો કરવાનો નિર્ણય લીધો છે.
ખર્ચમાં વધારાને કારણે ભાવ વધાર્યા
ટાટા મોટર્સે પોતાના નિવેદનમાં કહ્યું છે કે વધતા ખર્ચને કારણે કંપનીએ કિંમત વધારવાનો નિર્ણય લેવો પડ્યો છે. કંપની પોતે વધેલા ખર્ચનો મોટો હિસ્સો ઉઠાવી રહી છે, પરંતુ કેટલોક હિસ્સો કિંમતોમાં વધારો કરીને પૂરો કરી રહી છે. ટાટા મોટર્સે 1 જાન્યુઆરી 2022થી તેના કોમર્શિયલ વાહનોની કિંમતોમાં વધારો કર્યો છે.
અગાઉ, મારુતિ સુઝુકી ઇન્ડિયાએ તેના ઘણા મોડલની કિંમતોમાં 4.3 ટકા સુધીનો વધારો કર્યો છે. ઉત્પાદન ખર્ચમાં વધારાના બોજને આંશિક રીતે ઘટાડવા માટે આ પગલું લેવામાં આવ્યું છે. કંપનીએ તેના વિવિધ મોડલની કિંમતોમાં 0.1 થી 4.3 ટકાનો વધારો કર્યો છે.
મારુતિએ કિંમતમાં કર્યો વધારો
નોંધનીય છે કે, દેશની સૌથી મોટી કાર કંપની મારુતિ સુઝુકીએ પોતાની સૌથી સસ્તી કારની કિંમત મોંઘી કરી દીધી છે. કંપનીએ તેની મારુતિ સુઝુકી અલ્ટોની કિંમત 12,000 રૂપિયા સુધી મોંઘી કરી છે. કંપનીએ તેના પેટ્રોલ અને CNG બંને મોડલની કિંમતોમાં વધારો કર્યો છે. વધેલી કિંમતો બાદ હવે મારુતિ સુઝુકી અલ્ટોની દિલ્હી એક્સ-શોરૂમ કિંમત 3.15 લાખને બદલે 3.25 લાખ રૂપિયા થઈ ગઈ છે. તે જ સમયે, તેના સીએનજીના ટોપ મોડલની કિંમત 4.83 લાખ રૂપિયાના બદલે 4.95 લાખ રૂપિયા થઈ ગઈ છે.