મોંઘવારીનો બોમ્બ ફૂટ્યો, સરકારે મે મહિનનાના ફુગાવાના આંકડા કર્યા જાહેર, જાણો શું થયું મોંઘું?

WPI Inflation May 2026: ઇંધણ અને વીજળીના ભાવ ભડકે બળ્યા; સરકારે ડેટા જાહેર કરવા માટે નવું આધાર વર્ષ લાગુ કર્યું.

wpi inflation may 2026 wholesale price data fuel prices rise

Source : ai

Show Quick Read

Key points generated by AI, verified by newsroom

• મે 2026 માં WPI ફુગાવો 9.68% થયો, નવા આધાર વર્ષે.
• ઇંધણ-વીજળીના ભાવ વધતા ફુગાવો 30.33% પહોંચ્યો.
• ઉત્પાદિત ચીજો, ખેતી અને ખાદ્યપદાર્થો પણ મોંઘા થયા.

WPI Inflation May 2026: દેશમાં મોંઘવારી સામાન્ય જનતા અને અર્થતંત્રનો પીછો છોડવાનું નામ નથી લઈ રહી. મે 2026 માં જથ્થાબંધ ફુગાવાનો દર (WPI) વધીને 9.68% ની ચિંતાજનક સપાટીએ પહોંચી ગયો છે, જે એપ્રિલ મહિનામાં 8.26% હતો. વાણિજ્ય અને ઉદ્યોગ મંત્રાલય દ્વારા સોમવારે જાહેર કરાયેલા આંકડા મુજબ, મોંઘવારી વધવાનું સૌથી મોટું કારણ ઇંધણ અને વીજળીના ભાવમાં થયેલો તોતિંગ વધારો છે. આ વખતે મંત્રાલયે એક મહત્વનો બદલાવ કરતા, જૂના આધાર વર્ષ 2011-12 ને બદલીને નવા આધાર વર્ષ 2022-23 ના આધારે આ આંકડા જાહેર કર્યા છે.

ઇંધણ અને વીજળીએ આપ્યો સૌથી મોટો આંચકો

આ વખતે જથ્થાબંધ ફુગાવામાં સૌથી મોટો ઉછાળો ઇંધણ અને વીજળી ક્ષેત્રમાં જોવા મળ્યો છે. એપ્રિલમાં આ ક્ષેત્રનો ફુગાવો 24.89% હતો, જે મે મહિનામાં વધીને 30.33% થઈ ગયો છે. તેમાં પણ ખનિજ તેલના ભાવમાં 49.82% અને ક્રૂડ ઓઇલ તેમજ કુદરતી ગેસના ફુગાવામાં 61.51% નો મોટો વધારો નોંધાયો છે. નિષ્ણાતોના મતે, પશ્ચિમ એશિયામાં ચાલી રહેલા સંઘર્ષને કારણે વૈશ્વિક તેલ બજારમાં જે ઉથલપાથલ મચી છે, આ તેની જ સીધી અસર છે.

ખેતી અને ઉત્પાદિત ચીજવસ્તુઓ પણ મોંઘી થઈ

ખેતી અને ખાણકામ સાથે જોડાયેલી પ્રાથમિક ચીજવસ્તુઓનો ફુગાવો પણ મે મહિનામાં વધીને 4.99% થયો છે, જે એપ્રિલમાં 3.78% હતો. આ ઉપરાંત બિન-ખાદ્ય ચીજવસ્તુઓમાં 9.49% નો વધારો જોવા મળ્યો છે. ફેક્ટરીઓમાં બનતી ચીજવસ્તુઓ (મેન્યુફેક્ચર્ડ પ્રોડક્ટ્સ) નો ફુગાવો પણ એપ્રિલના 6.68% થી વધીને મે મહિનામાં 7.48% એ પહોંચ્યો છે. ખાસ કરીને કેમિકલ્સ, બેઝિક મેટલ્સ (ધાતુઓ) અને કાપડના ભાવમાં મોટો વધારો થયો છે.

આ પણ વાંચોઃ 8મું પગાર પંચ: મોંઘવારી નહીં, હવે આ મુજબ નક્કી થશે પગાર? જાણો અપડેટ

ખાદ્યપદાર્થોના ભાવમાં મિશ્ર પ્રતિસાદ

મે 2026 માં 'WPI ફૂડ ઇન્ડેક્સ' મુજબ ખાવા-પીવાની ચીજોનો ફુગાવો 3.11% થી વધીને 4.49% થયો છે. ખાદ્ય તેલ, ઇંડા, માંસ, માછલી અને અન્ય ડેરી પ્રોડક્ટ્સ મોંઘી થવાને કારણે આ સ્થિતિ સર્જાઈ છે. જોકે, સામાન્ય માણસ માટે રાહતના સમાચાર એ છે કે કઠોળ, બટાકા અને ડુંગળીના ભાવ ગયા વર્ષની સરખામણીએ હજુ પણ નીચા સ્તરે છે.

આજથી નવી WPI શ્રેણી અમલમાં આવી

સરકારે જથ્થાબંધ ફુગાવાની ગણતરીને વધુ સચોટ બનાવવા માટે મોટો ફેરફાર કર્યો છે. હવે આધાર વર્ષ 2011-12 ના બદલે 2022-23 કરવામાં આવ્યું છે અને લિસ્ટમાં વસ્તુઓની સંખ્યા પણ 697 થી વધારીને 957 કરી દેવાઈ છે. આ સાથે જ સરકારે આજે 'આઉટપુટ પ્રોડ્યુસર પ્રાઇસ ઇન્ડેક્સ' અને 'સર્વિસ પ્રોડ્યુસર પ્રાઇસ ઇન્ડેક્સ' પણ જાહેર કર્યા છે, જેમાં બેંકિંગ, વીમા, ટેલિકોમ, રેલ્વે અને હવાઈ મુસાફરી જેવી સેવાઓનો સમાવેશ થાય છે. હવે પછીનો એટલે કે જૂન 2026 નો ફુગાવાનો રિપોર્ટ 14 જુલાઈના રોજ જાહેર કરવામાં આવશે.

આ પણ વાંચોઃ મોંઘવારીનો માર: ઘરેલુ LPG સિલિન્ડરના ભાવ 942 રૂપિયાને પાર, જાણો કેટલી સબસિડી મળશે?