સુરેન્દ્રનગર: ચુડા તાલુકાના સમઢીયાળા‌ ગામે ડબલ મર્ડર મામલે પોલીસને મહત્વી સફળતા મળી છે. રાજકોટ સ્પેશિયલ ઇન્વેસ્ટીગેશન ટીમ (SIT) દ્વારા ચુડા તાલુકાના સમઢીયાળા‌ ગામે થયેલ ડબલ મર્ડરના આરોપીઓને ઝડપી પાડવામાં આવ્યા છે. હત્યા નીપજાવનાર આરોપીઓ પૈકી ૦૫ આરોપીઓને ઝડપી પાડી કાયદેસરની કાર્યવાહી હાથ ધરી છે. તમને જણાવી દઈએ કે, જામનગર એસ.પી. પ્રેમસુખ ડેલુની અધ્યક્ષતામાં SIT ની રચના કરવામાં આવી છે. અલગ અલગ ટીમો બનાવી ગણતરીના દિવસોમાં ડબલ મર્ડર નીપજાવનાર ૦૫ આરોપીઓને ઝડપી પાડયા છે. તમને જણાવી દઈએ કે, સમઢીયાળા‌માં જમીન વિવાદમાં બે સગા ભાઈઓ આલજીભાઈ પરમાર અને મનોજભાઈ પરમારની હત્યા કરવામાં આવી હતી.


ઝડપાયેલ આરોપીઓ


(૧) અમરાભાઇ ખાચર,ઉ.વ.૬૫ 
(૨) જીલુભાઇ ઉર્ફે ઘુઘાભાઇ અમરાભાઇ ખાચર, ઉ.વ.૩૨ 
(૩) મંગળુભાઇ ખાચર, ઉ.વ.૨૩ 
(૪) ભીખુભાઇ ખાચર,ઉ.વ.૬૪ 
(૫) રણજીતભાઇ ઉર્ફે ભાણભાઇ ભાંભળા,ઉ.વ.૩૯ 


કોંગ્રેસના નેતાઓએ કરી રતી પીડિત પરિવાર સાથે મુલાકાત



ગુજરાત કોગ્રેસના પ્રમુખ શક્તિસિંહ ગોહિલ પીડિત પરિવારની મુલાકાતે પહોંચ્યા હતા. તેમની સાથે દાણીલીમડાના ધારાસભ્ય શૈલેષ પરમાર પણ હાજર રહ્યા હતા. શક્તિસિંહ ગોહિલે પરિવારજનો સાથે સાંત્વના આપી અને યોગ્ય ન્યાય મળે તે માટે રાજકોટ રેન્જ આઇજી સાથે મુલાકાત કરી હતી. આ મામલે કોંગ્રેસ પ્રદેશ પ્રમુખ શક્તિસિંહ ગોહિલે સરકાર સામે નિશાન સાધ્યું હતું. તેમણે જણાવ્યું કે, આ ઘટના પહેલા પીડિત પરિવારે ગૃહમંત્રી હર્ષસંઘવીને અરજી કરીને લેખિતમાં પોલીસનું રક્ષણ માગ્યું હતું પરંતુ રક્ષણ  ન મળતા આખરે બંને સગા ભાઇઓ આ દુશ્મનીનો ભોગ બન્યા. તેમણે જણાવ્યું કે, સામાજિક સમરસતા ડોહળાઇ રહી છે. જો ગુજરાત પોલીસને આદેશ અપાયા હોત અને  થોડી સતર્કતા દાખવવામાં આવી હોત તો આ ઘટના ન બની હોત અને બંને ભાઇની જિંદગી બચી જાત.


આ ઘટનાને લઇને  હોસ્પિટલ પહોંચેલા ભાજપના ધારાસભ્યનો પરિવારજનો અને સમાજના લોકોએ વિરોધ કર્યો હતો. વિધાનસભાના નાયબ મુખ્ય દંડક અને વઢવાણના ધારાસભ્ય જગદીશભાઇ મકવાણા તેમજ પાટડીના ધારાસભ્ય પી.કે.પરમાર, જિલ્લા પોલીસ વડા સાથે હોસ્પિટલ પહોંચ્યા હતા. પીડિત પરિજનોએ રોષ પ્રગટ કર્યો હતો.     હત્યાના તમામ આરોપીઓ સામે કડક કાર્યવાહી હાથ ધરી મૃતકના પરિવારજનોએ ન્યાય આપવાની રાજકોટ રેન્જ આઇજી અશોકકુમાર યાદવે ખાતરી આપી હતી અને અલગ અલગ ટીમો બનાવી ખૂબ જ ઝડપથી તમામ આરોપીઓને ઝડપી પાડવા તપાસ હાથ ધરવામાં આવી હોવાની વાત કરી હતી.



Join Our Official Telegram Channel: https://t.me/abpasmitaofficial