Gujarat Weather Update: ગુજરાતમાં ઘણા દિવસોથી ચાલી રહેલા હળવો વરસાદ ગરમીથી રાહત આપી રહ્યો છે. છેલ્લા કેટલાક દિવસોથી, પ્રિમોનસૂન એક્ટિવિટીના ભાગ રૂપે પણ વરસાદ વરસી રહ્યો છે. આજે અને કાલે હવામાન કેવું રહેશે, ચાલો જાણીએ IMDનું તાજા અપડેટ્સ
છેલ્લા કેટલાક દિવસોથી ગુજરાતમાં સર્જાયેલ વેસ્ટર્ન ડિસ્ટબર્ન્સ અને સૌરાષ્ટ્રમા સર્જાયેલા સિસ્ટમના કારણે વરસાગ વરસી રહ્યો છે. એક તરફ રાજ્યના કેટલાક ભાગોમાં ભારે ગરમી પડી રહી છે, તો બીજી તરફ છૂટાછવાયા વિસ્તારોમાં વરસાદ પડી રહ્યો છે. હવામાન વિભાગના જણાવ્યા અનુસાર, દક્ષિણ પશ્ચિમ ચોમાસુ આંદામાન અને નિકોબાર ટાપુઓ સુધી પહોંચી ગયું છે, જે આગામી દસ દિવસમાં કેરળ કિનારે પહોંચશે. સામાન્ય રીતે ચોમાસુ ૧ જૂનની આસપાસ કેરળના દરિયાકાંઠે પહોંચે છે, પરંતુ આ વખતે ચોમાસુ ચાર દિવસ વહેલું કેરળ પહોંચવાની ધારણા છે. તેવી જ રીતે, સામાન્ય રીતે ચોમાસુ ગુજરાતમાં 15 જૂનની આસપાસ આવે છે, પરંતુ જો ચોમાસુ આ ગતિએ ચાલુ રહેશે, તો તે વહેલું દસ્તક દેશે. એટલે કે 22 મેથી વરસાદ શરૂ થઇ શકે છે.
હાલમાં, રાજ્યમાં વરસાદી માહોલ યથાવત છે. આજે પણ દક્ષિણ ગુજરાતના નર્મદા, વલસાડ, તાપી અને ડાંગ જેવા જિલ્લાઓમાં વરસાદ પડી શકે છે. આ સાથે જ ગઈકાલે નર્મદા જિલ્લાના સાગબારા તાલુકામાં (2 ઈંચ) વરસાદ નોંધાયો હતો. આ ઉપરાંત તાપીના નિઝરમાં 20 મીમી વરસાદ પડ્યો હતો. હવામાન વિભાગે રાજકોટ, બોટાદ, અરવલ્લી, સાબરકાંઠા, ભાવનગર અને મહિસાગરમાં પણ વરસાદની આગાહી કરી છે.
હવામાન વિભાગની આગાહી મુજબ અરબી સમુદ્રમાં એક સાયક્લોનિક સિસ્ટમ સર્જાઇ શકે છે. જેના કારણે વાવઝોડાની શક્યતા સેવાઇ રહી છે. જો વાવાઝોડું ગુજરાત તરફ ફંટાશે તો ભારે પવન સાથે વરસાદનું અનુમાન છે પરંતુ જો અન્ય જગ્યા ફંટાઇ જાય તો પણ 22 મેની આસપાસ દક્ષિણ ગુજરાત અને સૌરાષ્ટ્રમાં વરસાદ વરસી શકે છે.