રાજ્યમાં 5 જૂન સુધી આ જિલ્લામાં વરસશે ગાજવીજ સાથે વરસાદ, અંબાલાલ પટેલની ચેતવણી
Gujarat Weather Forecast: રાજ્યમાં હાલ વાતાવરણમાં પલટો જોવા મળી રહયો છે,. પૂર્વ ગુજરાત, દક્ષિણ ગુજરાત અને મધ્ય ગુજરાતના કેટલાક વિસ્તારમાં પ્રિમોનસૂન એક્ટિવિટીના ભાગરૂપે વરસાદ વરસી રહ્યો છે. અંબાલાલ પટેલે પણ 5 જૂન સુધી રાજ્યમાં છૂટછવાયા વરસાદની આગાહી કરી છે
ગુજરાતમાં પ્રિ-મોન્સૂન એક્ટિવિટી વચ્ચે હવામાન નિષ્ણાંત અંબાલાલ પટેલે આગામી દિવસોને લઈને મહત્વની આગાહી વ્યક્ત કરી છે. અંબાલાલ પટેલના જણાવ્યા અનુસાર રાજ્યના અનેક વિસ્તારોમાં હજુ પણ ગાજવીજ અને તેજ પવન સાથે વરસાદી માહોલ યથાવત રહી શકે છે. અંબાલાલ પટેલે જણાવ્યું છે કે ઉત્તર ગુજરાત, પૂર્વ ગુજરાત અને દક્ષિણ ગુજરાતના વિવિધ જિલ્લાઓમાં આગામી દિવસોમાં વરસાદની સંભાવના છે. સાથે જ દક્ષિણ સૌરાષ્ટ્ર અને કચ્છના કેટલાક વિસ્તારોમાં પણ વરસાદી ઝાપટાં પડી શકે છે.
તેમણે વધુમાં જણાવ્યું કે 7 અને 8 જૂન દરમિયાન રાજ્યના અનેક ભાગોમાં વરસાદી પ્રવૃત્તિ જોવા મળી શકે છે. એટલું જ નહીં, 15થી 20 જૂન વચ્ચે પણ વાતાવરણ અનુકૂળ બનતા વરસાદની શક્યતા રહેલી છે.ચોમાસાની ગતિ અંગે અંબાલાલ પટેલે જણાવ્યું કે આગામી 72 કલાકમાં કેરળમાં દક્ષિણ-પશ્ચિમ ચોમાસાનું આગમન થવાની સંભાવના છે. કેરળમાં ચોમાસું બેસ્યા બાદ તેની અસર ધીમે ધીમે પશ્ચિમ ભારત તરફ આગળ વધશે, જેના કારણે ગુજરાતમાં પણ વરસાદી માહોલ વધુ સક્રિય બની શકે છે. હાલમાં રાજ્યના અનેક વિસ્તારોમાં વાદળછાયું વાતાવરણ અને ગાજવીજ સાથે વરસાદી ઝાપટાં જોવા મળી રહ્યા છે. હવામાન વિભાગ તેમજ નિષ્ણાતોની આગાહીના આંકલન મુજબ 5 જૂન સુધી પ્રિમોનસૂન એક્ટિવિટીના ભાગરૂપે વરસાદ વરસી શકે છે પરંતુ મોનસૂન પણ સારી ગતિથી આગળ વઘતું હોવાથી તેની અસરથી ગુજરાતમા બિલકુલ વરસાદ બંધ થાય તેવી કોઇ શક્યતા નથી પરંતુ વાદળછાયા વાતાવરણ વચ્ચે છૂટછવાયો વરસાદ વરસતો રહશે. અને 15 જૂનથી ગુજરાતમાં ચોમાસાની વિધવત એન્ટ્રી થઇ શકે છે જેથી 15 જૂન બાદ ચોમાસાનું વરસાદ શરૂ થઇ જાય તેવી શકયતા છે. મોનસૂન એક્ટિવિટિ અને સારી ગતિથી આગળ વધતા મોનસૂનના કારણે હાલ રાજ્યના તાપમાનમાં 3થી4 ડિગ્રીનો ઘટાડો જોવા મળ્યો છે. જેથી લોકોને કાળઝાળ ગરમીથી રાહત મળી છે.
આ પણ વાંચો: ગુજરાતમાં પ્રિમોન્સૂન એક્ટિવિટી એક્ટિવ, બનાસકાંઠા સહિત આ જિલ્લાઓમાં ભારે પવન સાથે ધોધમાર વરસાદ
ગુજરાતમાં પ્રિમોન્સૂન એક્ટિવિટી વધુ સક્રિય બનતાં રાજ્યના ઉત્તર, મધ્ય અને દક્ષિણ ગુજરાતના અનેક જિલ્લાઓમાં રાત્રિ દરમિયાન ધોધમાર વરસાદ નોંધાયો હતો. ભારે પવન, ગાજવીજ અને વીજળીના કડાકા-ભડાકા સાથે વરસેલા વરસાદથી લોકોને કાળઝાળ ગરમીમાંથી રાહત મળી હતી, જોકે કેટલાક વિસ્તારોમાં વીજ પુરવઠો ખોરવાયો અને જનજીવન પણ પ્રભાવિત બન્યું હતું.
ઉત્તર ગુજરાતમાં વરસાદથી ખેડૂતોમાં ચિંતા
પાટણ જિલ્લાના રૂની, માતરવાડી, ગોલાપુર અને અનાવાડા સહિતના વિસ્તારોમાં ભારે પવન અને વીજળીના કડાકા-ભડાકા સાથે વરસાદ વરસ્યો હતો.
બનાસકાંઠા જિલ્લામાં ધોધમાર વરસાદ
બનાસકાંઠા જિલ્લાના ડીસા, ધાનેરા, લાખણી, પાલનપુર, અમીરગઢ, વડગામ અને કાંકરેજ પંથકના થરા તથા શિહોરી સહિતના વિસ્તારોમાં વાવાઝોડા જેવા પવન સાથે વરસાદ પડ્યો હતો. ભારે પવનને કારણે જનજીવન પ્રભાવિત બન્યું હતું. બાજરી, જુવાર અને મકાઈના પાકને નુકસાન થવાની ભીતિ વચ્ચે ખેડૂતોમાં ચિંતા જોવા મળી હતી.
મહેસાણા જિલ્લામાં ભારે વરસાદ
મહેસાણા જિલ્લાના બહુચરાજીમાં પણ ગાજવીજ અને પવન સાથે વરસાદ ખાબકતા લોકોને ગરમીમાંથી રાહત મળી હતી.
મધ્ય ગુજરાતમાં વરસાદી માહોલ
મહીસાગર જિલ્લામાં લુણાવાડા, કડાણા, વિરપુર, ખાનપુર, સંતરામપુર અને કોઠંબા સહિતના વિસ્તારોમાં ભારે પવન સાથે ધોધમાર વરસાદ વરસ્યો હતો. પવનના કારણે અનેક સ્થળોએ મંડપ ઉડી ગયા હતા અને વૃક્ષો ધરાશાયી થયા હતા. બાલાસિનોરમાં કથાના પંડાલને પણ નુકસાન પહોંચ્યું હોવાનું સામે આવ્યું છે.
દાહોદ અને આસપાસના વિસ્તારોમાં વાવાઝોડા જેવા પવન બાદ વરસાદ વરસતા વાતાવરણમાં ઠંડક પ્રસરી હતી. જોકે તૈયાર પાકને નુકસાન થવાની ભીતિ વ્યક્ત કરવામાં આવી રહી છે.
ટોપ સ્ટોરી
ટ્રેન્ડિંગ સમાચાર
