Rain Update: વેસ્ટર્ન ડિસ્ટર્બન્સની અસરથી રાજ્યના અનેક જિલ્લામાં હળવાથી મધ્યમ વરસાદ વરસ્યો છે. લોકોને અસહ્ય ગરમી અને ઉકળાટમાંથી રાહત મળી છે. બીજી તરફ સારા વરસાદથી ખેડૂતોમાં ખુશીની લહેર ફરી વળી છે અને વાવણીની તૈયારીઓને વેગ મળ્યો છે. હવામાન વિભાગે આગામી કલાકોમાં પણ અનેક જિલ્લાઓમાં ગાજવીજ સાથે વરસાદની આગાહી વ્યક્ત કરી છે.
સૌરાષ્ટ્રમાં વરસાદી માહોલ
રાજકોટ જિલ્લાના ગોંડલ બાદ જસદણ શહેર તેમજ ગ્રામ્ય વિસ્તારોમાં પણ વરસાદ નોંધાયો હતો. દ્વારકા જિલ્લાના ખંભાળિયા પંથક અને આસપાસના ગ્રામ્ય વિસ્તારોમાં ઝરમર વરસાદ વરસ્યો હતો. રાવલ ગામમાં વહેલી સવારે ધીમીધારે વરસાદ શરૂ થતાં ખેડૂતોમાં ખુશીનો માહોલ જોવા મળી રહ્યો છે.
અરવલ્લીમાં સાર્વત્રિક વરસાદ
અરવલ્લી જિલ્લામાં સાર્વત્રિક વરસાદ વરસ્યો હતો. ભિલોડા તાલુકામાં સૌથી વધુ 3 ઈંચ વરસાદ નોંધાયો હતો. ધનસુરામાં 2 ઈંચ, સાઠંબામાં 1.38 ઈંચ, બાયડ અને મેઘરજમાં 1-1 ઈંચ જ્યારે માલપુર અને મોડાસામાં પોણો ઈંચ વરસાદ નોંધાયો હતો.
ખેડા જિલ્લામાં ધોધમાર વરસાદ
ખેડા જિલ્લામાં રાત્રિના સમયે ગાજવીજ સાથે વરસાદ ખાબક્યો હતો. ગળતેશ્વરમાં 2.34 ઈંચ અને કપડવંજમાં 2.17 ઈંચ વરસાદ નોંધાયો હતો. કઠલાલમાં 1.16 ઈંચ વરસાદ પડ્યો હતો. ઠાસરા, મહુધા, ડાકોર, મહેમદાવાદ અને નડિયાદ સહિતના વિસ્તારોમાં પણ વરસાદ વરસ્યો હતો. ડાકોરમાં અનેક સ્થળોએ પાણી ભરાઈ જતાં સ્થાનિકોને મુશ્કેલીનો સામનો કરવો પડ્યો હતો.
મહીસાગરમાં પોણા છ ઈંચ વરસાદ
મહીસાગર જિલ્લાના બાલાસિનોરમાં રાત્રે 10 વાગ્યાથી સવારે 4 વાગ્યા દરમિયાન પોણા છ ઈંચ જેટલો ભારે વરસાદ નોંધાયો હતો. વીજળીના કડાકા-ભડાકા સાથે પડેલા વરસાદના કારણે અનેક વિસ્તારોમાં પાણી ભરાઈ ગયા હતા. લુણાવાડા શહેર અને ગ્રામ્ય વિસ્તારોમાં પણ સારો વરસાદ વરસ્યો હતો.
પંચમહાલ અને છોટાઉદેપુરમાં મેઘમહેર
પંચમહાલ જિલ્લામાં ઘોઘંબામાં 2.05 ઈંચ અને જાંબુઘોડામાં 2.01 ઈંચ વરસાદ નોંધાયો હતો. ગોધરામાં પણ 1 ઈંચ વરસાદ વરસ્યો હતો. છોટાઉદેપુર જિલ્લાના કદવાલ તાલુકામાં 1.93 ઈંચ વરસાદ નોંધાયો હતો. બોડેલી, શિવજીપુરા, વાલોઠી અને બામરોલી સહિતના વિસ્તારોમાં વરસાદથી વાતાવરણ ખુશનુમા બન્યું હતું.
મહેસાણા અને બનાસકાંઠામાં વરસાદી ઝાપટાં
મહેસાણા જિલ્લાના સતલાસણા તાલુકામાં 2.87 ઈંચ વરસાદ નોંધાયો હતો. ખેરાલુ અને વિજાપુરમાં પણ વરસાદ વરસ્યો હતો. બનાસકાંઠાના અમીરગઢ, ઈકબાલગઢ, વેરા, ગાટા, ધનપુરા, કપાસિયા, ઢોલિયા, વિરમપુર અને રબારીયા ગામોમાં વરસાદી ઝાપટાં પડતાં લોકોને ગરમીમાંથી રાહત મળી હતી.
વડોદરા અને નવસારીમાં પણ વરસાદ
વડોદરા શહેર અને ગ્રામ્ય વિસ્તારોમાં વરસાદ વરસ્યો હતો. ડભોઈના ફરતીકુઈ, વેગા, કજાપુર, તરસાના અને હંસાપુરા ગામોમાં પણ વરસાદ નોંધાયો હતો. બીજી તરફ નવસારી શહેરના મંકોડિયા, સ્ટેશન રોડ અને ડેપો સહિતના વિસ્તારોમાં વરસાદી ઝાપટાં પડતાં વાતાવરણમાં ઠંડક પ્રસરી હતી.
પાલનપુરમાં પાણી ભરાયા
પાલનપુરમાં સામાન્ય વરસાદમાં જ ગઠામણ પાટિયાથી ગામને જોડતા મુખ્ય માર્ગ પર ઘૂંટણસમા પાણી ભરાઈ ગયા હતા. રાત્રિ દરમિયાન પાલનપુર અને અમીરગઢમાં વરસાદ વરસ્યો હતો.
આગામી 3 કલાક માટે હવામાન વિભાગની આગાહી
હવામાન વિભાગે આગામી 3 કલાક દરમિયાન સાબરકાંઠા, અરવલ્લી, ખેડા, આણંદ, મહીસાગર, પંચમહાલ, દાહોદ, વડોદરા અને છોટાઉદેપુર જિલ્લામાં ગાજવીજ સાથે હળવા વરસાદની આગાહી કરી છે. આ ઉપરાંત પ્રતિ કલાક 40 કિલોમીટરની ઝડપે પવન ફૂંકાવાની પણ શક્યતા વ્યક્ત કરવામાં આવી છે.