Gujarat Local Body Election 2026 Results: રાજ્યમાં સ્થાનિક સ્વરાજ્યની ચૂંટણી 2026 ના પરિણામો સામે આવી રહ્યા છે. સમગ્ર ગુજરાતમાં મોટાભાગે ભારતીય જનતા પાર્ટીની શાનદાર જીત થઈ છે. મતદારોએ ફરી એક વખત ભાજપ પર ભરોસો મૂક્યો છે. કોંગ્રેસના ધારાસભ્ય જિગ્નેશ મેવાણીના ગઢમાં મોટું ગાબડું પડ્યું છે. વડગામ વિધાનસભા વિસ્તારમાં આવતી બેઠકો પર ભાજપે પહેલીવાર જીત નોંધાવી છે. છાપી અને જલોદરા જિલ્લા પંચાયત બેઠકો પર ભાજપે કબજો જમાવ્યો છે. લઘુમતી સમાજના મતદાતાઓ મિજાજ આ વખતે ભાજપ તરફી જોવા મળ્યો છે.
અમદાવાદ મનપામાં આ વિસ્તારોમાં ભાજપની પેનલ જીતી
અમદાવાદ મનપામાં જોધપુર, વેજલપુર, અમરાઈવાડી, ચાંદખેડા, નિકોલ, નવા વાડજ, ઈસનપુર, ગોતા, ચાંદલોડિયા, મણિનગર, સાબરમતીમાં ભાજપની પેનલની જીત થઈ છે.
આ નગરપાલિકાઓમાં ભાજપનું શાસન
કેશોદ, તાલાલા, વિસનગર, ગોંડલ, ઈડર,સિદ્ધપુર, હિંમતનગર બાબરા નગરપાલિકાઓમાં ભાજપનું શાસન નિશ્વિત થઈ ગયું છે. તો દ્વારકાની રાવલ નગરપાલિકામાં કોંગ્રેસનો કબજો થયો હતો.
રાજુ કરપડાની જીત
આમ આદમી પાર્ટીમાંથી ભાજપમાં આવેલા રાજુ કરપડાની જીત થઈ છે. સુરેંદ્રનગરની મૂળી-2 બેઠક પર રાજુ કરપડાની જીત થઈ છે. મૂળી-2 બેઠક પર રાજુ કરપડાની 2502 મતથી જીત થઈ છે.
ગણદેવી નગરપાલિકાનું પ્રથમ પરિણામ જાહેર
સ્થાનિક સ્વરાજ્યની ચૂંટણીમાં ગણદેવી નગરપાલિકાનું પ્રથમ પરિણામ જાહેર થયું છે, જેમાં ભાજપનો ભવ્ય વિજય થયો છે. ગણદેવી નગરપાલિકાની તમામ 24 બેઠકો પર કમળ ખીલ્યું છે અને ભાજપે ક્લિનસ્વીપ કરી લીધી છે. ઉલ્લેખનીય છે કે, આ ચૂંટણીમાં ભાજપનો દબદબો એટલો મજબૂત હતો કે કુલ 24 બેઠકોમાંથી 22 ઉમેદવારો તો અગાઉ જ બિનહરીફ ચૂંટાઈ આવ્યા હતા.
15 મનપાની 43 બેઠકો પર ભાજપના ઉમેદવાર બિનહરીફ જાહેર થયા હતા
15 મહાનગરપાલિકાની ચૂંટણીમાં 11 મનપામાં ભાજપના 43 ઉમેદવારો પહેલા જ બિનહરીફ જાહેર થઈ ગયા છે. જેમાં આણંદમાં 12, પોરંબદરમાં 11, મહેસાણા 5, અમદાવાદ 2, સુરેન્દ્રનગર 3,જામનગર 1, નડિયાદ 3, વડોદરા 2, નવસારી 2, ગાંધીધામ 1 અને વાપી મનપામાં ભાજપના 1 ઉમેદવાર બિનહરીફ થયા છે.
52 માંથી 52 બેઠકો પર ભગવો
ગુજરાત સ્થાનિક સ્વરાજની ચૂંટણી 2026 ના પરિણામોમાં પોરબંદર જિલ્લો સંપૂર્ણપણે 'કેસરીયા' રંગે રંગાયો છે. નવનિર્મિત પોરબંદર મહાનગરપાલિકા હોય કે જિલ્લા પંચાયત, ભાજપે વિપક્ષના સૂપડા સાફ કરી નાખ્યા છે. ખાસ કરીને પોરબંદર મનપામાં કોંગ્રેસ અને અન્ય પક્ષોનો શરમજનક પરાજય થયો છે. નવી બનેલી પોરબંદર મહાનગરપાલિકામાં ભાજપે ઐતિહાસિક પ્રદર્શન કર્યું છે. કુલ 52 બેઠકોમાંથી તમામ 52 બેઠકો પર ભાજપના ઉમેદવારો વિજેતા બન્યા છે. કોંગ્રેસ અહીં એક પણ બેઠક મેળવવામાં નિષ્ફળ રહી છે, જેને વિશ્લેષકો કોંગ્રેસનો સંપૂર્ણ 'વ્હાઈટવોશ' ગણાવી રહ્યા છે.