અમરેલી: અમરેલી જિલ્લામાં આજે વહેલી સવારથી જ ધોધમાર વરસાદ વરસી રહ્યો છે. અમરેલીના સાવરકુંડલા અને રાજુલામાં આજે મેઘરાજા મહેરબાન થયા છે. રાજુલા શહેર અને ગ્રામ્ય વિસ્તારોમાં ધોધમાર વરસાદ વરસ્યો છે. આ દરમિયાન પીપાવાવ ધામ નજીક ભારે વરસાદને કારણે સર્જાયેલા પાણીના પ્રવાહમાં કેટલાક લોકો ફસાયા હતા. ફસાયેલા લોકોનું કોસ્ટગાર્ડ દ્વારા રેસ્ક્યૂ કરવામાં આવ્યું છે.
22 જેટલા લોકોને સુરક્ષિત બહાર કાઢવા માટે રેસ્ક્યુ
પીપાવાવ ઇન્ડિયન કોસ્ટગાર્ડ, પ્રાંત અધિકારી, તાલુકા વિકાસ અધિકારી સહિતની ટીમો ઘટનાસ્થળે પહોંચી હતી. પીપાવાવ ઇન્ડિયન કોસ્ટગાર્ડની ટીમ દ્વારા પાણીના પ્રવાહમાંથી આશરે 22 જેટલા મજૂરોને સુરક્ષિત બહાર કાઢવા માટે રેસ્ક્યુ ઓપરેશન હાથ ધરવામાં આવ્યું હતું. ભારે વરસાદને કારણે ફસાયેલા તમામ 22 માણસોને ભારતીય કોસ્ટ ગાર્ડ દ્વારા સલામત રીતે રેસ્કયુ કરવામાં આવ્યું છે. આ તમામની પ્રાથમિક શાળામાં રહેવાની વ્યવસ્થા કરવામાં આવી છે.
રાજુલા પંથકમાં ધોધમાર વરસાદ
ધારીમાં વરસાદ
અમરેલી જિલ્લાના ધારી પંથકમાં પણ વરસાદી માહોલ જામ્યો છે. અમરેલીના ધારી શહેર સહિત ગ્રામ્ય વિસ્તારોમાં સવારથી ધીમીધારે વરસાદ વરસી રહ્યો છે. ધારીના ઝર, મોરજર, ખીચા, વીરપુર, દૂધાળા, પાતળા સહિતના ગામોમાં વરસાદ વરસ્યો છે. ધીમીધારે વરસાદથી જગતના તાતમાં ખુશીનો માહોલ છે.
અમરેલી જિલ્લામાં ચોમાસાના પહેલા વરસાદ આફત રૂપ બન્યો છે. અહીં થોરાડી નદી પરનો ચેકડેમ ઓવરફ્લો થતા પિતા-પુત્ર તણાયા હતા. જાબાળ ગામ પાસે બળદ ગાડું લઈને આવતા પિતા-પુત્ર તણાયા હતા. જેમાં પિતાનું મોત થયું છે.જ્યારે ફાયરની ટીમે પુત્રને બચાવી લીધો હતો.
આગામી 5 દિવસમાં વરસાદની ભારે આગાહી
ગુજરાતમાં આખરે ચોમાસાએ એન્ટ્રી કરી દીધી છે. તોફાની બેટિંગ સાથે ચોમાસાની શરૂઆત થઇ છે. આગામી 5 દિવસ ગુજરાતમાં વરસાદનું અનુમાન છે. ખાસ કરીને દક્ષિણ ગુજરાત અને સૌરાષ્ટ્રમાં ભારેથી અતિભારે વરસાદ ખાબકી શકે છે. નવસારી, વલસાડ, દમણ, દાદરાનગર હવેલી, સુરત,અમરેલી, ભાવનગર, રાજકોટમાં ભારે વરસાદને લઇને વરસાદનું ઓરેન્જ એલર્ટ જાહેર કરવામાં આવ્યું છે. રાજય પર એક સાથે 4 સિસ્ટમ સક્રિય થતાં ભેજવાળા પવનનું પ્રમાણ વધ્યું છે. જેના કારણે ચોમાસાએ એટ્રી સાથે જ વરસાદે જમાવટ કરી છે.