ધોલેરા બનશે ભારતનું ‘AI હબ’: L&T વ્યોમાના ₹25,000 કરોડના રોકાણથી ગુજરાતમાં ડેટા ક્રાંતિના મંડાણ!
ગુજરાત સરકાર અને L&T વ્યોમા વચ્ચે ₹25,000 કરોડના ઐતિહાસિક એમ.ઓ.યુ. થયા છે. ધોલેરા SIR માં 250 MW ગ્રીન AI ડેટા સેન્ટર સ્થપાશે, જે 2028 સુધીમાં કાર્યરત થશે.
ગાંધીનગર:વડાપ્રધાન નરેન્દ્ર મોદીના 'ડિજિટલ ઇન્ડિયા' ના સ્વપ્નને સાકાર કરવા તરફ ગુજરાતે એક મોટું ડગલું ભર્યું છે. નવી દિલ્હીમાં આયોજિત 'ઇન્ડિયા AI ઇમ્પેક્ટ સમિટ 2026' દરમિયાન, ગુજરાત સરકારના વિજ્ઞાન અને ટેકનોલોજી વિભાગે L&T (લાર્સન એન્ડ ટ્રુબ્રો) વ્યોમા સાથે એક સીમાચિહ્નરૂપ એમ.ઓ.યુ. (MoU) કર્યા છે. આ કરાર હેઠળ, ગુજરાતના ધોલેરા SIR (Special Investment Region) ખાતે 250 મેગાવોટ ની ક્ષમતા ધરાવતું અત્યાધુનિક 'ગ્રીન AI રેડી ડેટા સેન્ટર કેમ્પસ' સ્થાપવામાં આવશે. સાયન્સ અને ટેકનોલોજી મંત્રી અર્જુન મોઢવાડિયાની વિશેષ ઉપસ્થિતિમાં થયેલા આ કરારનો મુખ્ય ઉદ્દેશ્ય ગુજરાતને વૈશ્વિક આર્ટિફિશિયલ ઇન્ટેલિજન્સ (AI) અને ક્લાઉડ કમ્પ્યુટિંગનું કેન્દ્ર બનાવવાનો છે. આ પ્રોજેક્ટ દ્વારા રાજ્યમાં હજારો નવી રોજગારીની તકો ઉભી થશે અને આર્થિક વિકાસને વેગ મળશે.
પ્રોજેક્ટની મુખ્ય વિગતો અને રોકાણનું કદ
આ પ્રોજેક્ટ માત્ર ગુજરાત માટે જ નહીં પરંતુ સમગ્ર ભારત માટે ટેકનોલોજી ક્ષેત્રે ગેમ ચેન્જર સાબિત થશે.
- કુલ રોકાણ: L&T વ્યોમા આ મેગા પ્રોજેક્ટમાં અંદાજે ₹25,000 કરોડ નું જંગી રોકાણ કરશે.
- ક્ષમતા: આ ડેટા સેન્ટર 250 MW ના હાઇપર સ્કેલ મોડલ પર આધારિત હશે, જે ખાસ કરીને AI પ્રોસેસિંગ માટે સજ્જ હશે.
- સમયમર્યાદા: આ પ્રોજેક્ટ સંભવતઃ વર્ષ 2028 સુધીમાં સંપૂર્ણપણે કાર્યરત થઈ જવાની અપેક્ષા છે.
- પર્યાવરણ પૂરક (Green AI): આ સેન્ટર 'ગ્રીન' ટેકનોલોજી પર આધારિત હશે, જેનો અર્થ છે કે તેમાં ઉર્જાનો વપરાશ પર્યાવરણને નુકસાન પહોંચાડ્યા વગર ન્યૂનતમ રાખવામાં આવશે.
વડાપ્રધાનનું 'MANAV' વિઝન અને ગુજરાતનું બજેટ
સમિટ દરમિયાન વડાપ્રધાન નરેન્દ્ર મોદીએ AI માટે ભારતના દૂરંદેશી "MANAV" વિઝનની રૂપરેખા આપી હતી. આ વિઝન પાંચ સ્તંભો પર આધારિત છે:
- M (Moral & Ethical): નૈતિક અને નીતિગત પ્રણાલી.
- A (Accountable): જવાબદાર શાસન વ્યવસ્થા.
- N (National Sovereignty): ડેટા સાર્વભૌમત્વ પર ભાર.
- A (Accessible): દરેક માટે સુલભ અને સમાવિષ્ટ ટેકનોલોજી.
- V (Valid): માન્ય અને કાયદેસર પ્રણાલીઓ.
ગુજરાત સરકારના વિજ્ઞાન અને ટેક્નોલોજી વિભાગ અને L&T વ્યોમા વચ્ચેના આ એમ.ઓ.યુ. ગુજરાતમાં વિશ્વ કક્ષાના AI-રેડી ડિજિટલ ઈન્ફ્રાસ્ટ્રક્ચરના નિર્માણ તરફ એક મહત્વપૂર્ણ પગલું છે. એટલું જ નહિં, ભારતની AI ક્રાંતિમાં મોખરે રહેવા તેમજ નવીનતા, ટકાઉપણું અને સમાવિષ્ટ વિકાસને આગળ ધપાવવામાં ગુજરાતને વધુ સજ્જ બનાવતું કદમ છે.
ટોપ સ્ટોરી
ટ્રેન્ડિંગ સમાચાર
