દેવભૂમિ દ્વારકા : દેવભૂમિ દ્વારકા જિલ્લામાં ગઈકાલે મૂશળધાર વરસાદ ખાબક્યો હતો.  10 ઈંચ વરસાદ વરસતા ખંભાળિયા જળબંબાકાર થયું હતું.  2 ઈંચ વરસાદથી ભાણવડ પણ પાણી-પાણી થયું હતું. દ્વારકા જિલ્લામાં મેઘરાજાની ધમાકેદાર એન્ટ્રીથી ખેડૂતો ખુશખુશાલ થયા છે. કાચું સોનું રૂપી વરસાદ વરસતા ખેડૂતોએ વાવણી શરૂ કરી દીધી છે. આજે ભીમ અગિયારસનો પવિત્ર દિવસ હોવાથી ખંભાળિયા તાલુકાના ખેડૂતોએ વાવણીના શ્રીગણેશ કર્યા છે.  




વાવણી કરતાં પહેલાં પારંપરિક રીતે જમીન પર સ્વસ્તિક એટલે કે સાથિયો બનાવી તેની પૂજા કરી હતી. આ સાથે જ ટ્રેક્ટર અને બળદગાડાની પણ પૂજા કરી હતી.  આ વર્ષ સારું રહે તે માટે ધરતીપુત્રોએ ભગવાન દ્વારકાધીશ પાસે કામના કરી છે. 


દ્વારકા જિલ્લાનાં ખંભાળિયા પંથકમાં ભારે વરસાદને કારણે જળબંબાકારની સ્થિતિ સર્જાઈ હતી.  માત્ર 6 કલાકમાં ખંભાળિયામાં 10 ઇંચ વરસાદ ખાબક્યો હતો, જે આ વર્ષનો સૌથી વધુ વરસાદ છે. આ સાથે જ ખંભાળિયામાં પ્રથમ વરસાદમાં જ મોસમનો 32.5 ટકા વરસાદ પડી ગયો છે. 


અમરેલી જિલ્લામાં મેઘમહેર


અમરેલી જિલ્લાના સાવરકુંડલા, લાઠી, લીલીયા બાદ બાબરા તાલુકામાં પણ વરસાદ વરસ્યો છે. અમરેલી જિલ્લામાં વરસાદી માહોલ જામ્યો છે. લોકોને પણ ગરમીથી રાહત મળી છે. 


અમરેલી જિલ્લા સાવરકુંડલા, લાઠી, લીલીયા બાદ બાબરા પંથકમાં પણ વરસાદી માહોલ જામ્યો છે.  બાબરા શહેર અને ગ્રામ્ય વિસ્તારોમાં ધોધમાર વરસાદ વરસ્યો છે.  ગાજવીજ સાથે બાબરા શહેર અને ગ્રામ્ય વિસ્તારોમાં વરસાદ ખાબકતા લોકો ખુશખુશાલ થયા છે.  બાબરાના ચરખા, ચમારડી, નીલવડા, વાવડી સહિતના ગામડાઓમાં ધોધમાર વરસાદ વરસ્યો છે. અસહ્ય ગરમી અને બફારા બાદ વાતાવરણ પલટાયું હતું. ખેડૂતોમાં ખુશીનો માહોલ છે.  વરસાદ પડતાં લોકોને ગરમીથી રાહત મળી છે. 


આગામી ત્રણ કલાક ગાજવીજ સાથે વરસાદની આગાહી


રાજ્યના હવામાન વિભાગ દ્વારા વરસાદને લઈ આગાહી કરવામાં આવી છે. હવામાન વિભાગના જણાવ્યા અનુસાર, આગામી ત્રણ કલાકમાં ગાજવીજ સાથે સામાન્ય છુટા છવાયા વરસાદની આગાહી કરવામાં આવી છે.  હવામાન વિભાગના અનુસાર,  ગાજ વીજ અને ભારે પવન સાથે વરસાદ વરસી શકે છે. ગુજરાતના  નર્મદા, ડાંગ, વલસાડ, દાદરા નગર હવેલી, સુરેન્દ્રનગર, જામનગર, અમરેલી, ભાવનગર, અને દ્વારકામાં સામાન્ય વરસાદની આગાહી કરવામાં આવી છે. 


અમદાવાદ અને વડોદરામાં પણ હવામાન વિભાગ દ્વારા સામાન્ય વરસાદની આગાહી કરાઈ છે. અમદાવાદ, વડોદરા, છોટાઉદેપુર, ભરૂચ, સુરત, તાપી, નવસારી, દમણ, રાજકોટ, મોરબી, બોટાદ  અને કચ્છમાં વરસાદની આગાહી કરવામાં આવી છે.