ગાયોના હિતમાં સીએમ ભૂપેન્દ્ર પટેલનો મોટો નિર્ણય: 'મુખ્યમંત્રી ગૌમાતા પોષણ યોજના'નો વ્યાપ વધારાયો

હવે 31 ડિસેમ્બર 2025 સુધી નોંધાયેલી તમામ ગૌશાળા અને પાંજરાપોળને મળશે આર્થિક સહાય, જૂના નિયમોમાં ફેરફારથી ગૌસેવા કરતી નવી સંસ્થાઓને થશે મોટો ફાયદો.

gujarat cm gaumata poshan yojana deadline extended 2025

Source : @CMOGuj

Show Quick Read

Key points generated by AI, verified by newsroom

• મુખ્યમંત્રી ગૌમાતા પોષણ યોજનાનો લાભ વિસ્તૃત કરાયો.
• નવી સંસ્થાઓ માટે નોંધણીની સમયમર્યાદા લંબાવવામાં આવી.
• 4.50 લાખથી વધુ પશુઓને આ યોજનાનો લાભ મળ્યો.
• ગૌશાળાઓને પશુ દીઠ દૈનિક 30 રૂપિયા સહાય મળશે.

ગુજરાતની ગૌશાળાઓ અને પાંજરાપોળો માટે એક ખૂબ જ રાહતરૂપ સમાચાર છે. મુખ્યમંત્રી ભૂપેન્દ્રભાઈ પટેલની સરકારે ગાયોના નિભાવ અને પોષણ માટે ચાલતી 'મુખ્યમંત્રી ગૌમાતા પોષણ યોજના'નો વ્યાપ વધારવાનો મહત્વપૂર્ણ નિર્ણય લીધો છે. અત્યાર સુધી આ યોજનાનો લાભ માત્ર જૂની નોંધાયેલી સંસ્થાઓને જ મળતો હતો, પરંતુ હવે સરકારે નિયમોમાં ઉદારતા દાખવીને પબ્લિક ટ્રસ્ટ એક્ટ હેઠળ નોંધણીની સમયમર્યાદા 31 ડિસેમ્બર 2025 સુધી લંબાવી દીધી છે. આ નિર્ણયથી ગૌસેવા સાથે જોડાયેલી રાજ્યની અનેક નવી સંસ્થાઓને પશુઓના નિભાવ માટે દૈનિક આર્થિક સહાય મળશે, જેનાથી ગૌવંશની જાળવણી વધુ સારી રીતે થઈ શકશે.

નિયમોમાં શું ફેરફાર થયો?

પશુપાલન અને ગૌસંવર્ધન મંત્રી જીતુભાઈ વાઘાણીએ આ નિર્ણયની વિગતો આપતા જણાવ્યું હતું કે, અગાઉના નિયમ પ્રમાણે જે ગૌશાળા કે પાંજરાપોળની નોંધણી 31 માર્ચ 2022 પહેલાં થઈ હોય તેમને જ આ યોજનાનો લાભ મળવાપાત્ર હતો. આ કારણે નાણાકીય વર્ષ 2023-24 પછી શરૂ થયેલી અનેક નવી ગૌશાળાઓ સહાયથી વંચિત રહી જતી હતી. આ મુદ્દે વિવિધ સંસ્થાઓ દ્વારા સતત રજૂઆતો કરવામાં આવી રહી હતી. આ રજૂઆતોને હકારાત્મક પ્રતિસાદ આપતા મુખ્યમંત્રીએ ટ્રસ્ટ નોંધણીની મર્યાદા વધારવાનો મોટો નિર્ણય લીધો છે.

હવે નવા નિયમ મુજબ, આગામી નાણાકીય વર્ષ એટલે કે 1 એપ્રિલ 2026 થી, જે સંસ્થાઓની નોંધણી 31 ડિસેમ્બર 2025 સુધીમાં થઈ ગઈ હશે, તેવી તમામ ગૌશાળા અને પાંજરાપોળ આ સહાય મેળવવા માટે હકદાર ગણાશે.

4.50 લાખથી વધુ પશુઓને મળ્યો લાભ

તમને જણાવી દઈએ કે, વડાપ્રધાન નરેન્દ્રભાઈ મોદીએ વર્ષ 2022-23 માં અંબાજી ખાતેથી આ 'મુખ્યમંત્રી ગૌમાતા પોષણ યોજના'ની શરૂઆત કરાવી હતી. આ યોજના હેઠળ ગૌશાળાઓને એક પશુ દીઠ રોજના 30 રૂપિયાની આર્થિક સહાય આપવામાં આવે છે.

મંત્રી જીતુભાઈ વાઘાણીના જણાવ્યા અનુસાર, સરકાર ગૌસેવાના આ કામમાં કોઈ કસર છોડી રહી નથી. વર્ષ 2022-23 થી લઈને સપ્ટેમ્બર 2025 સુધીમાં રાજ્યની 1600 થી વધુ સંસ્થાઓમાં રહેલા 4.50 લાખથી વધુ પશુઓ માટે અત્યાર સુધીમાં કુલ 1364 કરોડ રૂપિયા જેટલી માતબર રકમ ચૂકવવામાં આવી છે.

સરકારના આ નિર્ણયથી ગૌશાળા અને પાંજરાપોળ ચલાવતી સેવાભાવી સંસ્થાઓને મોટો આર્થિક ટેકો મળશે. મંત્રીએ અંતમાં ઉમેર્યું હતું કે, નોંધણીની તારીખ લંબાવાને કારણે હવે રાજ્યની અનેક નવી ગૌસેવી સંસ્થાઓ આ યોજના હેઠળ આવરી લેવાશે. ગાયોની જાળવણીની જે સેવાભાવી પ્રવૃત્તિ થઈ રહી છે, તેને આર્થિક બળ પૂરું પાડવાનો રાજ્ય સરકારનો મુખ્ય ઉદ્દેશ્ય આ નિર્ણયથી સાચા અર્થમાં સાર્થક થયો છે.

આ પણ વાંચો

સાવરકુંડલાથી મહેસાણા સુધી 'ગેસ' માટે હાહાકાર! આકરી ગરમીમાં સિલિન્ડર લેવા વહેલી સવારથી લાગી લાંબી કતારો