Gujarat heavy rain nowcast: જો તમે અત્યારે ઘરની બહાર છો અથવા ઓફિસેથી ઘરે જવા નીકળવાનું વિચારી રહ્યા છો, તો થોડા સાવધાન થઈ જજો. અમદાવાદ હવામાન વિભાગે (IMD) સાંજે 4 વાગ્યે એક તાત્કાલિક નાઉકાસ્ટ (Nowcast) બુલેટિન જારી કર્યું છે, જેમાં આગામી 3 કલાક એટલે કે સાંજે 4 થી 7 વાગ્યા સુધી સમગ્ર ગુજરાતમાં વરસાદનું જોરદાર એલર્ટ આપવામાં આવ્યું છે. આગાહી મુજબ, રાજ્યના 8 જિલ્લાઓમાં વીજળીના કડાકા-ભડાકા સાથે ભારે વરસાદનું રેડ એલર્ટ છે. આ ઉપરાંત 15 જિલ્લાઓમાં મધ્યમ વરસાદ સાથે ઓરેન્જ એલર્ટ અને 12 જિલ્લાઓમાં હળવા વરસાદની આગાહી સાથે યલો એલર્ટ જાહેર કરાયું છે. આ 3 કલાક દરમિયાન 41 કિલોમીટર પ્રતિ કલાકની ઝડપે તોફાની પવન ફૂંકાવાની પણ શક્યતા છે, તેથી લોકોને કામ વગર બહાર ન નીકળવા ખાસ સલાહ આપવામાં આવી છે.
ક્યાં કયું એલર્ટ છે? જુઓ તમારા જિલ્લાની સ્થિતિ:
આ 8 જિલ્લાઓમાં છે રેડ એલર્ટ (ભારે વરસાદનો ખતરો):
આગામી 3 કલાક (સાંજે 7 વાગ્યા સુધી) દરમિયાન 8 જિલ્લાઓમાં મેઘરાજા ધમાકેદાર બેટિંગ કરી શકે છે. અહીં 15 mm/કલાક કરતા વધુ વરસાદ પડી શકે છે અને 30% થી 60% જેટલી વીજળી પડવાની પૂરેપૂરી સંભાવના છે.
ઉત્તર અને મધ્ય ગુજરાત: અરવલ્લી, મહીસાગર, પંચમહાલ અને દાહોદ.
દક્ષિણ ગુજરાત અને સંઘપ્રદેશ: નવસારી, વલસાડની સાથે દમણ અને દાદરા નગર હવેલી.
આ 15 જિલ્લાઓમાં ઓરેન્જ એલર્ટ (મધ્યમ વરસાદની આગાહી):
જો તમે આ જિલ્લાઓમાં છો, તો અહીં પણ 41 કિમી/કલાકની ઝડપે પવન ફૂંકાવાની સાથે ગાજવીજ અને મધ્યમ વરસાદ (5 થી 15 mm/કલાક) પડી શકે છે. જોકે અહીં વીજળી પડવાની શક્યતા 30% કરતા ઓછી છે.
મધ્ય અને ઉત્તર ગુજરાત: સાબરકાંઠા, ગાંધીનગર, ખેડા, અમદાવાદ, આણંદ, વડોદરા અને છોટાઉદેપુર.
દક્ષિણ ગુજરાત: ભરૂચ, નર્મદા, સુરત, તાપી અને ડાંગ.
સૌરાષ્ટ્ર અને દીવ: ભાવનગર, અમરેલી, ગીર સોમનાથ અને દીવ.
આ પણ વાંચોઃ ગુજરાતમાં કાલથી 7 દિવસ ભારે વરસાદનું એલર્ટ: 24 કલાકમાં 173 તાલુકામાં વરસાદ, કપરાડામાં સૌથી વધુ 15.63 ઈંચ
આ 12 જિલ્લાઓમાં યલો એલર્ટ (હળવા વરસાદની શક્યતા):
આ વિસ્તારોમાં પવન અને ગાજવીજ સાથે હળવા વરસાદી ઝાપટાં (5 mm/કલાકથી ઓછો) પડવાની શક્યતા છે (વીજળી પડવાની શક્યતા 30% થી ઓછી).
ઉત્તર ગુજરાત: બનાસકાંઠા, પાટણ અને મહેસાણા.
સૌરાષ્ટ્ર-કચ્છ: સુરેન્દ્રનગર, બોટાદ, મોરબી, રાજકોટ, જામનગર, દેવભૂમિ દ્વારકા, પોરબંદર, જૂનાગઢ અને કચ્છ.
આ પણ વાંચોઃ ગુજરાતમાં 4 સિસ્ટમ સક્રિય: આગામી 2 દિવસ અત્યંત ભારે વરસાદની આગાહી, જાણો તમારા જિલ્લાનું એલર્ટ
શું અસર થઈ શકે છે? (સંભવિત જોખમો)
હવામાન વિભાગની ચેતવણી મુજબ, આ ખરાબ હવામાનને કારણે કેટલાક જોખમો ઊભા થઈ શકે છે:
વીજળીનો ખતરો: ગાજવીજ વખતે ખુલ્લા વિસ્તારોમાં વીજળી પડવાનું મોટું જોખમ રહેલું છે.
જળબંબાકાર: ભારે વરસાદથી નીચાણવાળા વિસ્તારોમાં પાણી ભરાવાની (Water Logging) સમસ્યા સર્જાઈ શકે છે.
ઝાડ કે બોર્ડ પડવા: 41 કિમીની સ્પીડે ફૂંકાતા પવનને કારણે નબળા ઝાડ અને હોર્ડિંગ્સ કે સાઈન બોર્ડ ધરાશાયી થવાની પૂરી શક્યતા છે.
ટ્રાફિક જામ: રસ્તા પર વરસાદી પાણી ભરાવાથી અને વિઝિબિલિટી (દ્રશ્યતા) ઘટવાના કારણે વાહનવ્યવહાર પ્રભાવિત થઈ શકે છે.
આટલી સાવચેતી ચોક્કસ રાખજો:
અકસ્માત અને નુકસાનથી બચવા માટે હવામાન વિભાગે લોકોને આ મુજબની અપીલ કરી છે:
ઘરમાં જ રહો: અત્યારે હવામાન ખરાબ હોવાથી બિનજરૂરી રીતે ઘરની બહાર નીકળવાનું ટાળો અને કોઈ સુરક્ષિત મકાનમાં જ રહો.
સુરક્ષિત આશરો લો: જો તમે બહાર રસ્તા પર હોવ તો તરત જ કોઈ પાકા મકાન કે સુરક્ષિત આશ્રયસ્થાને જતા રહો. ખુલ્લા મેદાનો, ખેતરો કે જળાશયોની આસપાસ ઊભા ન રહેવું.
ઝાડ નીચે ઊભા ન રહેવું: વરસાદ કે ગાજવીજ વખતે ક્યારેય પણ ઝાડની નીચે આશરો લેવાની ભૂલ ન કરવી, કારણ કે આવા સમયે ઝાડ પર વીજળી પડવાનું જોખમ સૌથી વધારે હોય છે.