Gujarat weather forecast: ગુજરાતમાં ચોમાસાની ગતિ ધીમી હોવા છતાં હવામાન વિભાગ (IMD) દ્વારા રાજ્યમાં એકસાથે 3 મજબૂત વરસાદી સિસ્ટમ સક્રિય થઈ હોવાની પુષ્ટિ કરવામાં આવી છે. વેસ્ટર્ન ડિસ્ટર્બન્સ, સાયક્લોનિક સર્ક્યુલેશન અને સિઝનલ ટ્રફના પગલે આગામી 2 અને 3 જુલાઈએ રાજ્યના વિવિધ ભાગોમાં ખાસ કરીને દક્ષિણ ગુજરાતમાં ભારે વરસાદની સંભાવના છે, જેને લઈને સ્થાનિક વહીવટી તંત્રને પણ એલર્ટ મોડ પર મૂકવામાં આવ્યું છે.
3 સિસ્ટમ સક્રિય થતાં પવનની ગતિ વધશે
હવામાન વિભાગના સત્તાવાર નિવેદન અનુસાર, હાલમાં મધ્યપ્રદેશ આસપાસ સાયક્લોનિક સર્ક્યુલેશન, પંજાબથી બિહાર સુધી સિઝનલ ટ્રફ અને એક વેસ્ટર્ન ડિસ્ટર્બન્સ એમ 3 સિસ્ટમ સક્રિય છે. આ સિસ્ટમોના પ્રભાવથી રાજ્યમાં ચોમાસું ધીમે ધીમે આગળ વધી રહ્યું છે. વરસાદી સિસ્ટમ સક્રિય થતાં દરિયાકાંઠાના વિસ્તારોમાં 40 થી 60 કિમી પ્રતિ કલાકની ઝડપે ભારે પવન ફૂંકાવાની શક્યતા છે. દરિયામાં ભારે કરંટ જોવા મળી શકે તેમ હોવાથી આગામી 1 અને 2 જુલાઈએ માછીમારોને દરિયો ન ખેડવા કડક સૂચના આપવામાં આવી છે.
કયા જિલ્લાઓમાં કેવો રહેશે વરસાદી માહોલ?
આજે 28 જૂને ઉત્તર અને મધ્ય ગુજરાતના બનાસકાંઠા, સાબરકાંઠા, થરાદ, પાટણ, અરવલ્લી, પંચમહાલ, દાહોદ અને મહીસાગરમાં હળવો વરસાદી માહોલ રહેશે. જ્યારે સૌરાષ્ટ્ર અને કચ્છના રાજકોટ, સુરેન્દ્રનગર, જૂનાગઢ, અમરેલી, ભાવનગર, મોરબી, ગીર સોમનાથ, બોટાદ અને દીવમાં છૂટાછવાયા વરસાદની આગાહી કરવામાં આવી છે. ખાસ કરીને દક્ષિણ ગુજરાતના સુરત, ડાંગ, તાપી, વલસાડ અને નવસારી જિલ્લામાં ભારેથી અતિભારે વરસાદ પડી શકે છે.
હવામાન વિભાગે આગામી 2 થી 4 જુલાઈ દરમિયાન દક્ષિણ ગુજરાતના નવસારી, સુરત, વલસાડ અને ડાંગમાં 40 થી 50 કિમી પ્રતિ કલાકની ઝડપે પવન અને ગાજવીજ સાથે ભારે વરસાદની આગાહી કરી 'યલો એલર્ટ' (Yellow Alert) જાહેર કર્યું છે.
આ પણ વાંચોઃ હવામાન નિષ્ણાતની મોટી આગાહી: આ તારીખે આખું ગુજરાત ચોમાસાથી ઘમરોળાશે
વરસાદ વચ્ચે અસહ્ય ગરમી અને બફારાનો અહેસાસ
રાજ્યમાં એક તરફ વરસાદી માહોલ બંધાઈ રહ્યો છે, તો બીજી તરફ નાગરિકોને અસહ્ય ગરમી અને બફારાનો સામનો પણ કરવો પડી રહ્યો છે. હવામાં ભેજનું પ્રમાણ સતત વધી રહ્યું હોવાથી ગરમીની તીવ્રતા વધુ અનુભવાય છે. આગામી દિવસોમાં રાજ્યનું મહત્તમ તાપમાન 38 થી 40 ડિગ્રી આસપાસ નોંધાઈ શકે છે. આજે 28 જૂને અમદાવાદમાં પારો 41 ડિગ્રી સુધી પહોંચે તેવી પૂરેપૂરી શક્યતા છે. દરિયાકાંઠાના વિસ્તારો અને સૌરાષ્ટ્ર-કચ્છમાં ભારે ભેજને કારણે લોકોને વાતાવરણમાં ડબલ ઋતુનો અહેસાસ થશે; એક તરફ પવન અને વરસાદી ઝાપટાં, તો બીજી તરફ ભેજયુક્ત ગરમીનો ઉકળાટ લોકોને અકળાવશે.
આ પણ વાંચોઃ અંબાલાલ પટેલની નવી આગાહી: જુલાઈમાં આ તારીખો વચ્ચે આવશે પૂર, જાણી લો એલર્ટ