Gujarat Rain: ગુજરાતમાં અત્યાર સુધી સીઝનનો સરેરાશ 70.60 ટકા વરસાદ, દક્ષિણ ગુજરાત ઝોનમાં સૌથી વધુ

રાજ્યમાં ચાલુ વર્ષે ચોમાસાની સીઝન દરમિયાન અત્યાર સુધીમાં સરેરાશ ૭૦.૬૦ ટકા વરસાદ નોંધાઈ ચૂક્યો છે.

રાજ્યમાં ચાલુ વર્ષે ચોમાસાની સીઝન દરમિયાન અત્યાર સુધીમાં સરેરાશ 70.60 ટકા વરસાદ નોંધાઈ ચૂક્યો છે

Source : PTI

Show Quick Read

Key points generated by AI, verified by newsroom

• રાજ્યમાં સરેરાશ 70.60% વરસાદ, દક્ષિણ ગુજરાતમાં સૌથી વધુ નોંધાયો.
• 35 તાલુકામાં 40 ઇંચથી વધુ, જ્યારે 7માં ઓછો વરસાદ થયો.
• સરદાર સરોવર 82.55% ભરાયું; રાજ્યના 25 ડેમ ઓવરફ્લો થયા.

રાજ્યમાં ચાલુ વર્ષે ચોમાસાની સીઝન દરમિયાન અત્યાર સુધીમાં સરેરાશ 70.60 ટકા વરસાદ નોંધાઈ ચૂક્યો છે. રાજ્યભરમાં મેઘ મહેર જોવા મળી રહી છે, પરંતુ અલગ-અલગ ઝોનમાં વરસાદનું પ્રમાણ અલગ-અલગ નોંધાયું છે. અત્યાર સુધીના આંકડા મુજબ દક્ષિણ ગુજરાત ઝોનમાં સીઝનનો સૌથી વધુ 97.36 ટકા વરસાદ પડી ચૂક્યો છે, જે લગભગ 100 ટકાની નજીક પહોંચી ગયો છે. તેની સરખામણીએ કચ્છ ઝોનમાં સરેરાશ માત્ર 29.05 ટકા જેટલો જ વરસાદ નોંધાયો છે, જેથી ત્યાં હજુ પણ સારા વરસાદની રાહ જોવાઈ રહી છે.

બીજી તરફ મધ્ય ગુજરાતમાં પણ ચોમાસું જામ્યું છે અને ત્યાં અત્યાર સુધીમાં સીઝનનો 68.10 ટકા વરસાદ નોંધાઈ ચૂક્યો છે. સૌરાષ્ટ્ર ઝોનમાં પણ અત્યાર સુધીમાં 54.76 ટકા વરસાદ થયો છે, જ્યારે ઉત્તર ગુજરાત ઝોનમાં અત્યાર સુધીમાં સીઝનનો સરેરાશ 51.65 ટકા વરસાદ નોંધાયો છે. આમ, દક્ષિણ અને મધ્ય ગુજરાતમાં વરસાદની સ્થિતિ ખૂબ જ સારી છે, જ્યારે ઉત્તર ગુજરાત અને સૌરાષ્ટ્રમાં પણ અડધાથી વધુ સીઝનનો વરસાદ વરસી ચૂક્યો છે.

તાલુકાવાર વરસાદની વિગતો પર નજર કરીએ તો રાજ્યમાં ભારે વરસાદવાળા વિસ્તારોનું પ્રમાણ મોટું છે. રાજ્યના 35 તાલુકામાં અત્યાર સુધીમાં સીઝનનો 40 ઈંચથી વધુ વરસાદ ખાબકી ચૂક્યો છે, જ્યારે 80 તાલુકામાં 20થી 40 ઈંચ સુધીનો નોંધપાત્ર વરસાદ થયો છે. આ ઉપરાંત 121 તાલુકા એવા છે જ્યાં 10થી 20 ઈંચ સુધીનો વરસાદ નોંધાયો છે. આમ, રાજ્યના મોટાભાગના વિસ્તારોમાં પાણીની સમસ્યા હળવી થઈ છે.

ઓછા વરસાદવાળા વિસ્તારોની વાત કરીએ તો રાજ્યના 22 તાલુકામાં સીઝનનો 5થી 10 ઈંચ અને 7 તાલુકામાં 2થી 5 ઈંચ સુધીનો વરસાદ થયો છે. સૌથી ચિંતાજનક બાબત એ છે કે રાજ્યના ત્રણ તાલુકામાં હજુ પણ બે ઈંચથી ઓછો વરસાદ નોંધાયો છે, જેના કારણે આ વિસ્તારોમાં ખેડૂતો અને સ્થાનિક લોકો ચોમાસાના આગામી રાઉન્ડમાં સારા વરસાદની આશા રાખીને બેઠા છે.

આ પણ વાંચોઃ Gujarat Rain: વરસાદનું જોર વધશે, અમદાવાદથી લઇ પંચમહાલ સુધી ભારે વરસાદ ખાબકવાની અંબાલાલ પટેલની આગાહી

રાજ્યના 25 ડેમ સંપૂર્ણપણે ભરાયા

છેલ્લા 24 કલાક દરમિયાન રાજ્યના 134 તાલુકાઓમાં નોંધપાત્ર વરસાદ વરસ્યો છે. આ વરસાદી રાઉન્ડમાં સૌથી વધુ વરસાદ મહિસાગર જિલ્લાના ગોધરમાં 2.28 ઈંચ નોંધાયો છે, જ્યારે નવસારીના ખેરગામમાં 2.54  ઈંચ વરસાદ ખાબક્યો છે. સતત થઈ રહેલા વરસાદને કારણે રાજ્યના જળાશયોમાં પાણીની આવક વધી રહી છે. ગુજરાતની જીવાદોરી સમાન સરદાર સરોવર ડેમમાં અત્યાર સુધીમાં 82.55 ટકા જેટલો જળસંગ્રહ થઈ ચૂક્યો છે. આ સિવાય રાજ્યના કુલ 206 જળાશયો પણ સરેરાશ 64.08 ટકા ભરાઈ ચૂક્યા છે. સારા નીર આવવાના કારણે રાજ્યના 25 ડેમ સંપૂર્ણપણે ભરાઈને ઓવરફ્લો થયા છે.

જળાશયોની વર્તમાન સ્થિતિને ધ્યાનમાં રાખીને તંત્ર દ્વારા એલર્ટ જાહેર કરવામાં આવ્યા છે. હાલમાં 39 ડેમ હાઈએલર્ટ પર, પાંચ ડેમ એલર્ટ પર અને 10 ડેમ વોર્નિંગ લેવલ પર રાખવામાં આવ્યા છે. આંકડાકીય વિગતો મુજબ રાજ્યના 29 જળાશયોમાં 70થી 100 ટકા જેટલો જળજથ્થો ઉપલબ્ધ છે, જ્યારે 34 જળાશયોમાં 50થી 70 ટકા સુધીનો જળસંગ્રહ થયો છે. રાજ્યના 47 જળાશયોમાં 25થી 50 ટકા સુધી પાણીનો સંગ્રહ થયો છે, જ્યારે 71 જળાશયો એવા છે જ્યાં હજુ પણ 25 ટકાથી ઓછું પાણી ઉપલબ્ધ છે. 

આ પણ વાંચો

Rain Forecast: ગુજરાતમાં આગામી બે દિવસ ભારે વરસાદની આગાહી, 4 સિસ્ટમ સક્રિય થતા રાજ્યભરમાં મેઘમહેર

Gujarat Rain: વરસાદનું જોર વધશે, અમદાવાદથી લઇ પંચમહાલ સુધી ભારે વરસાદ ખાબકવાની અંબાલાલ પટેલની આગાહી