Gujarat Rain Forecast: 3 સિસ્ટમ સક્રિય છતાં ગુજરાતમાં કેમ નહીં વરસે ભારે વરસાદ? વાંચો અપડેટ

હવામાન વિભાગની આગાહી મુજબ ભારે વરસાદની શક્યતા નહિવત્; રાજ્યમાં અત્યાર સુધી 14 ટકા વરસાદની ઘટ નોંધાઈ.

Gujarat Monsoon September Weather Forecast Saurashtra Kutch Deficit

Source : ai

Show Quick Read

Key points generated by AI, verified by newsroom

• ચોમાસાના અંતિમ ચરણમાં, સપ્ટેમ્બરમાં ઓછો વરસાદ પડશે.
• રાજ્યમાં સરેરાશ ૧૪%, સૌરાષ્ટ્ર-કચ્છમાં ૩૫% વરસાદની ઘટ.
• દ્વારકા, પોરબંદર જેવા જિલ્લાઓ કોરા, ડેમ ૬૬% ભરાયા.

Gujarat monsoon forecast: ગુજરાતમાં ચોમાસાની સિઝન તેના અંતિમ ચરણમાં પ્રવેશી ચૂકી છે, ત્યારે ખેડૂતો માટે ચિંતાજનક અને માઠા સમાચાર સામે આવ્યા છે. હવામાન વિભાગની લેટેસ્ટ આગાહી મુજબ, ઓગસ્ટ મહિનામાં રાજ્યના મોટાભાગના વિસ્તારો કોરાધાકોર રહ્યા બાદ હવે સપ્ટેમ્બર મહિનામાં પણ સામાન્ય કરતાં ઓછો વરસાદ પડવાની પૂરેપૂરી શક્યતાઓ રહેલી છે. હાલમાં 3 જેટલી અલગ-અલગ વરસાદી સિસ્ટમ સક્રિય હોવા છતાં, કોઈ ભારે વરસાદની આશા જણાતી નથી. આગામી 7 દિવસ સુધી ગુજરાતના અમુક છૂટાછવાયા સ્થળોએ માત્ર હળવો વરસાદ વરસી શકે છે. જો અમદાવાદ શહેરની વાત કરીએ તો, ત્યાં વાદળછાયું વાતાવરણ બની રહેશે અને કેટલાક વિસ્તારોમાં સામાન્ય ઝાપટાં પડી શકે છે.

રાજ્યમાં વરસાદી આંકડાઓ પર નજર કરીએ તો અત્યાર સુધીમાં સરેરાશ 514.1 મીમી વરસાદ નોંધાયો છે, જે સામાન્ય રીતે પડવા જોઈતા 600.9 મીમી વરસાદ કરતાં 14 ટકા ઓછો છે. ખાસ કરીને સૌરાષ્ટ્ર અને કચ્છના ખેડૂતોની હાલત કફોડી બની છે, કારણ કે ત્યાં વરસાદની ઘટ વધીને 35 ટકા સુધી પહોંચી ગઈ છે. રાજ્યભરમાં અત્યાર સુધીમાં સરેરાશ 26.84 ઈંચ વરસાદ વરસ્યો છે, જે કુલ ચોમાસાની સિઝનનો માત્ર 75 ટકા જેટલો જ છે.

ગુજરાતના વિવિધ ઝોન પ્રમાણે વરસાદની વિગતો જોઈએ તો, દક્ષિણ ગુજરાતને બાદ કરતાં તમામ વિસ્તારોમાં વરસાદની અછત વર્તાઈ રહી છે. ઉત્તર ગુજરાતમાં 16.42 ઈંચ (સરેરાશના 56.23 ટકા), મધ્ય ગુજરાતમાં 24.54 ઈંચ (સરેરાશના 74.60 ટકા), સૌરાષ્ટ્રમાં 17.06 ઈંચ (સરેરાશના 56.03 ટકા) અને કચ્છમાં માત્ર 5.8 ઈંચ (સરેરાશના 29.49 ટકા) વરસાદ નોંધાયો છે. માત્ર દક્ષિણ ગુજરાતમાં જ મેઘરાજાએ મહેર કરી છે અને ત્યાં 63.94 ઈંચ સાથે સરેરાશના 103.67 ટકા વરસાદ પડી ચૂક્યો છે.

સૌથી વિકટ પરિસ્થિતિ દેવભૂમિ દ્વારકા જિલ્લાની છે. દ્વારકા જિલ્લામાં સિઝનનો સૌથી ઓછો એટલે કે માત્ર 2.16 ઈંચ (6.41 ટકા) વરસાદ વરસ્યો છે. તેના તાલુકાઓની વાત કરીએ તો ભાણવડમાં 3 ઈંચ, દ્વારકામાં 0.6 ઈંચ, કલ્યાણપુરમાં 1.32 ઈંચ અને ખંભાળિયામાં 3.64 ઈંચ વરસાદ પડ્યો છે. પોરબંદર જિલ્લામાં પણ માત્ર 6.12 ઈંચ (18.12 ટકા) વરસાદ છે, જેમાં કુતિયાણામાં 10.68 ઈંચ, પોરબંદરમાં 3 ઈંચ અને રાણાવાવમાં 4.68 ઈંચ વરસાદ નોંધાયો છે. કચ્છ જિલ્લાની પણ આ જ હાલત છે, જ્યાં સરેરાશ 5.8 ઈંચ (29.27 ટકા) જળવર્ષા થઈ છે. કચ્છના વિવિધ તાલુકાઓ પૈકી અબડાસામાં 1.88 ઈંચ, અંજારમાં 3.88 ઈંચ, ભચાઉમાં 7.6 ઈંચ, ભુજમાં 6.24 ઈંચ, ગાંધીધામમાં 6.36 ઈંચ, લખપતમાં 3 ઈંચ, માંડવીમાં 3.68 ઈંચ, મુન્દ્રામાં 5.92 ઈંચ, નખત્રાણામાં 5.4 ઈંચ અને રાપર તાલુકામાં 14.56 ઈંચ વરસાદ પડ્યો છે.

જોકે, જળાશયોની સ્થિતિ થોડી રાહતરૂપ છે. રાજ્યના કુલ 207 ડેમ અને જળાશયોમાં હાલ 66.32 ટકા જેટલો જળસંગ્રહ થયેલો છે. દક્ષિણ અને મધ્ય ગુજરાતમાં થયેલા નોંધપાત્ર વરસાદના પ્રતાપે રાજ્યના કેટલાક મહત્વના ડેમોમાં અત્યાર સુધીમાં 73 ટકા જેટલું પાણી ભરાઈ ગયું છે. ગુજરાતની જીવાદોરી સમાન સરદાર સરોવર નર્મદા ડેમ પણ 88.15 ટકા ભરાઈ ચૂક્યો છે. ચોમાસું હજુ પૂરું ન થયું હોવાથી આ જળસંગ્રહમાં વધુ વધારો થવાની આશા છે.

હાલમાં રાજ્યના ડેમોની ભરાયેલી ક્ષમતાની વિગતો નીચે મુજબ છે:

100 ટકા પૂરેપૂરા ભરાયેલા ડેમ: 27

70 થી 100 ટકા સુધી ભરાયેલા ડેમ: 31

50 થી 70 ટકા સુધી ભરાયેલા ડેમ: 29

25 થી 50 ટકા સુધી ભરાયેલા ડેમ: 44

25 ટકાથી ઓછા ભરાયેલા ડેમ: 75