ગુજરાત PSI ભરતી: બિન હથિયારી PSI પ્રોવિઝનલ મેરિટ લિસ્ટ જાહેર, જાણો કટ ઓફ સાથે સંપૂર્ણ વિગતો

ગુજરાત પોલીસ ભરતી બોર્ડે બિન હથિયારી PSI નું પ્રોવિઝનલ મેરિટ લિસ્ટ જાહેર કર્યું છે. 472 જગ્યાઓ માટે પસંદગી પામેલ ઉમેદવારો અને કેટેગરી વાઈઝ કટ ઓફની વિગતો અહીં જુઓ.

Gujarat Police PSI Recruitment

Source : social media

Show Quick Read

Key points generated by AI, verified by newsroom

ગુજરાત પોલીસમાં કારકિર્દી બનાવવા માંગતા અને ખાખીનું સપનું જોતા હજારો યુવાનો માટે આજે મહત્વના સમાચાર સામે આવ્યા છે. ગુજરાત પોલીસ ભરતી બોર્ડ દ્વારા આજે, 23 ફેબ્રુઆરી, 2026 ના રોજ બિન હથિયારી પોલીસ સબ ઇન્સ્પેક્ટરની ભરતી પ્રક્રિયા અંતર્ગત કામચલાઉ અને હંગામી પ્રોવિઝનલ મેરિટ લિસ્ટ જાહેર કરી દેવામાં આવ્યું છે. આ જાહેરાત ક્રમાંક GPRB/202324/1 હેઠળ કુલ 472 જગ્યાઓ ભરવા માટે યોજાયેલી પરીક્ષાના આધારે તૈયાર કરવામાં આવી છે. ગાંધીનગર સ્થિત ભરતી બોર્ડે દસ્તાવેજ ચકાસણીની પ્રક્રિયા પૂર્ણ કર્યા બાદ આ યાદી પ્રસિદ્ધ કરી છે, જેથી સફળ ઉમેદવારોમાં ખુશીની લહેર જોવા મળી રહી છે.

ભરતી પ્રક્રિયાની સફર: 1.02 લાખ ઉમેદવારો વચ્ચે હતો જંગ

ઉલ્લેખનીય છે કે, 13 એપ્રિલ, 2025 ના રોજ બિન હથિયારી PSI ની 472 જગ્યાઓ માટે લેખિત પરીક્ષાનું આયોજન કરવામાં આવ્યું હતું, જેમાં કુલ 1,02,935 ઉમેદવારોએ પોતાની કિસ્મત અજમાવી હતી. આ લાંબી અને પારદર્શક પ્રક્રિયા બાદ, પેપર 1 (પાર્ટ A અને B) માં ક્વોલિફાય થયેલા અને પેપર 2 માં હાજર રહેલા 49,269 ઉમેદવારોના ગુણ અગાઉ જાહેર કરાયા હતા. આ તમામ તબક્કાઓ બાદ, આજે જાહેર થયેલા મેરિટ લિસ્ટમાં 472 મુખ્ય ઉમેદવારો અને 95 ઉમેદવારોનો પ્રતીક્ષા યાદી (Waiting List) માં સમાવેશ કરવામાં આવ્યો છે.

દસ્તાવેજ ચકાસણી અને જાતિ પ્રમાણપત્રોનું સ્ટેટસ

ભરતી બોર્ડ દ્વારા ગત 05 ફેબ્રુઆરી, 2026 થી 10 ફેબ્રુઆરી, 2026 દરમિયાન ઉમેદવારોના દસ્તાવેજોની ઝીણવટભરી તપાસ કરવામાં આવી હતી. જોકે, બોર્ડે સ્પષ્ટતા કરી છે કે આ યાદી માત્ર કામચલાઉ છે. ખાસ કરીને SC, ST અને SEBC કેટેગરીના ઉમેદવારોના જાતિના પ્રમાણપત્રોની ખરાઈ કરવાની પ્રક્રિયા હાલમાં સામાજિક ન્યાય અને અધિકારીતા વિભાગ તેમજ આદિજાતિ વિકાસ વિભાગ હેઠળ ચાલુ છે. આ તપાસના અંતિમ નિર્ણય બાદ જ આખરી પસંદગી યાદી પ્રસિદ્ધ કરવામાં આવશે.

કેટેગરી વાઈઝ કટ ઓફ ગુણ (Provisional Cut off)

ભરતી બોર્ડ દ્વારા જાહેર કરવામાં આવેલા મુખ્ય પસંદગી યાદીના કટ ઓફ આંકડા નીચે મુજબ છે:

કેટેગરી	પુરુષ ઉમેદવાર (Male)	મહિલા ઉમેદવાર (Female)
જનરલ (General)	229.75	216.25
EWS	227.75	211.25
SEBC	225.25	211.25
SC	221.75	209.25
ST	206.25	189.25

તેવી જ રીતે પ્રતીક્ષા યાદી માટે જનરલ પુરુષોમાં 225.75 અને મહિલાઓમાં 210.75 કટ ઓફ રહ્યું છે. સમાન ગુણ ધરાવતા કિસ્સામાં વધુ વય ધરાવતા ઉમેદવાર અને ત્યારબાદ વધુ ઊંચાઈ ધરાવતા ઉમેદવારને પ્રાધાન્ય આપવામાં આવ્યું છે.

ઉમેદવારો વધુ માહિતી માટે અધિકૃત વેબસાઈટ gprb.gujarat.gov.in ની મુલાકાત લઈ શકે છે.