Gujarat Rain: ગુજરાતમાં છેલ્લા 24 કલાકમાં 181 તાલુકામાં વરસાદે કહેર વર્તાવ્યો છે. છેલ્લા 24 કલાકમાં 20 તાલુકામાં ત્રણથી આઠ ઈંચ સુધીનો વરસાદ ખાબકતા જનજીવન અસ્તવ્યસ્ત થઇ ગયુ છે. હવામાન વિભાગે આજે પણ ત્રણ જિલ્લામાં ભારે વરસાદનું એલર્ટ આપ્યુ છે, જેમાં અરવલ્લી, બનાસકાંઠા અને સાબરકાંઠાનો સમાવેશ છે. ગઇકાલના વરસાદમાં સૌથી વધુ બનાસકાંઠાના વડગામમાં 7.52 ઈંચ વરસાદ ખાબક્યો છે. જોકે અરવલ્લીમાં ભારે વરસાદથી લોકોને મોટી હાલાકી પહોંચી છે. મોડાસા સહિતના શહેરોમાં લોકોને ઘરો અને દુકાના પાણીમાં ગરકાવ થઇ ગઇ છે.
ગઇકાલથી ગુજરાતમાં મેઘરાજાએ કહેર વર્તાવવાનો શરૂ કરી દીધો છે. વરસાદના બીજા રાઉન્ડમાં ઉત્તર ગુજરાતમાં ભારે વરસાદ વરસી રહ્યો છે. તાજા અપડેટની વાત કરીએ તો, છેલ્લા 24 કલાકમાં ઉત્તર ગુજરાતમાં ત્રણ જિલ્લામાં ભારે વરસાદ વરસ્યો છે, જેમા અરવલ્લી જિલ્લામાં સાર્વત્રિક વરસાદ વરસ્યો છે. 24 કલાકમાં મોડાસામાં સૌથી વધુ 6.22 ઈંચ વરસાદ વરસતા લોકોને હાલાકી પહોંચી છે. આ ઉપરાંત જિલ્લાના અન્ય વિસ્તારોમાં જેમાં ધનસુરામાં 3.50 ઈંચ વરસાદ, બાયડમાં 3.19 ઈંચ વરસાદ વરસ્યો છે. ધોધમાર વરસાદથી મોડાસાના અનેક વિસ્તારોમાં પાણી ભરાયા છે, શહેરમાં ઝીલાની પાર્ક, ગરીબ નવાજ સોસાયટીમાં પાણી ભરાયા છે. મોડાસાના ડીપી રોડ, કેદારનાથ સોસાયટી અને મોડાસાની ઈનકમ ટેક્સ કચેરીમાં ભરાયા પાણી છે. મહત્ત્વનું છે કે, હવામાન વિભાગ દ્વારા આગામી 30 જુલાઈ સુધી રાજ્યમાં સાર્વત્રિક વરસાદની આગાહી કરવામાં આવી છે.
આજે વરસાદની આગાહી હવામાન વિભાગે આજે, 27 જુલાઈના રોજ ગુજરાતના વિવિધ વિસ્તારો માટે વરસાદની આગાહી કરી છે. અરવલ્લી, મહીસાગર અને સાબરકાંઠા જિલ્લાઓ માટે રેડ એલર્ટ જાહેર કરવામાં આવ્યું છે, જ્યાં ભારેથી અતિભારે વરસાદની સંભાવના છે. બનાસકાંઠા, પાટણ, મહેસાણા, સુરેન્દ્રનગર, દાહોદ, પંચમહાલ, છોટાઉદેપુર, નર્મદા, નવસારી, વલસાડ, દમણ અને દાદરા નગર હવેલીમાં છૂટાછવાયા સ્થળોએ અતિ ભારે વરસાદને કારણે ઓરેન્જ એલર્ટ આપવામાં આવ્યું છે. જ્યારે રાજકોટ, બોટાદ, અમરેલી, ભાવનગર, અમદાવાદ, ગાંધીનગર, ખેડા, આણંદ, વડોદરા, ભરૂચ, સુરત, તાપી અને ડાંગમાં છૂટાછવાયા સ્થળોએ ભારે વરસાદની શક્યતા હોવાથી યલો એલર્ટ જારી કરવામાં આવ્યું છે.
રાજ્યમાં સાર્વત્રિક વરસાદના પરીણામે ૨૦૬ ડેમો પૈકી કુલ ૨૮ ડેમ સંપૂર્ણ ભરાયા છે. આ ઉપરાંત ૪૮ ડેમને હાઈ એલર્ટ, ૧૯ ડેમને એલર્ટ તથા ૨૩ ડેમને વોર્નીંગ આપવામાં આવી છે. રાજ્યમાં કુલ ૨૦૬ ડેમો પૈકી ૬૨ ડેમ ૭૦ ટકાથી ૧૦૦ ટકા, ૪૧ ડેમ ૫૦ ટકાથી ૭૦ ટકા તથા ૩૮ ડેમ ૨૫ ટકાથી ૫૦ ટકા જેટલા ભરાયા છે. છેલ્લા ૨૪ કલાકમાં તાપી, વલસાડ અને નવસારી જિલ્લામાં સૌથી વધુ વરસાદ વરસ્યો છે.