રાજ્યમાં અત્યાર સુધી સીઝનનો સરેરાશ 31.62 ટકા વરસાદ વરસ્યો છે. 10 વર્ષમાં જૂનમાં નોંધાયેલા વરસાદમાં સૌથી વધુ વરસાદ નોંધાયો હતો. કચ્છ ઝોનમાં સીઝનનો અત્યાર સુધી સરેરાશ 28.83 ટકા, ઉત્તર ગુજરાતમાં સીઝનનો અત્યાર સુધી 33.32 ટકા અને દક્ષિણ ગુજરાતમાં સીઝનનો સરેરાશ 34.25 ટકા વરસાદ વરસ્યો હતો.
રાજ્યમાં 16 જૂનથી સત્તાવાર ચોમાસાનો પ્રારંભ થયો છે. ચાલુ વર્ષે 29 જૂન સુધીમાં ચોમાસાની સીઝનનો 11 ઈંચ વરસાદ એટલે કે સીઝનનો સરેરાશ 31.62 ટકા વરસાદ વરસ્યો હતો. છેલ્લા 10 વર્ષમાં જૂનમાં નોંધાયેલા વરસાદમાં આ સૌથી વધુ વરસાદ છે. ચોમાસામાં અત્યાર સુધી વરસેલા વરસાદની વાત કરીએ તો કચ્છ ઝોનમાં સીઝનનો સરેરાશ 5.50 ઈંચ સાથે 28.83 ટકા વરસાદ વરસ્યો હતો.
તો ઉત્તર ગુજરાતમાં 6.65 ઈંચ સાથે 23.53 ટકા, પૂર્વ મધ્ય ઝોનમાં 10.56 ઈંચ સાથે 33.32 ટકા અને દક્ષિણ ગુજરાતમાં સિઝનનો 20.09 ઈંચ સાથે 34.25 ટકા વરસાદ વરસી ચૂક્યો છે. હાલમાં રાજ્યમાં 40 ઈંચથી વધુ વરસાદ વરસ્યો હોય તેવો માત્ર એક તાલુકો છે. તો 26 તાલુકામાં 20થી 40 ઈંચ, 89 તાલુકામાં 10થી 20 ઈંચ વરસાદ, 41 તાલુકામાં 5થી 10 ઈંચ વરસાદ અને પાંચ તાલુકામાં 1થી 5 ઈંચ જેટલો વરસાદ નોંધાયો હતો. ગુજરાતમાં ગત વર્ષે 29 જૂન સુધીમાં સરેરાશ 2.80 ઈંચ સાથે 8.05 ટકા વરસાદ વરસ્યો હતો.
રાજ્યમાં હજુ એક સપ્તાહ સુધી વરસાદ યથાવત રહેશે. હવામાન વિભાગના મતે દક્ષિણ ગુજરાતમાં અપર એર સાયક્લોનિક સર્કયુલેશન સક્રિય હોવાથી વરસાદ વરસી રહ્યો છે. હવામાન વિભાગે તો 2 અને 3 જૂલાઈના ભારે વરસાદની આગાહી કરી છે. આજે રાજ્યના ભાવનગર, અમરેલી, ગીર સોમનાથ, દીવ, આણંદ, વડોદરા, છોટાઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ અને દમણ તથા દાદરાનગરહવેલીમાં છૂટ્ટાછવાયા સ્થળે ભારે વરસાદને લઈ યલો એલર્ટ જાહેર કરાયું છે. તો 2 અને 3 જૂલાઈ દરમિયાન ગુજરાતમાં ભારે વરસાદનું અનુમાન વ્યકત કરાયું છે...જ્યારે બાકીના દિવસોમાં હવામાન વિભાગે યલો એલર્ટ જાહેર કર્યું છે.
બંગાળની ખાડીમાં એક લો પ્રેશર એરિયા સર્જાયું છે તો સૌરાષ્ટ્ર પર એક સિસ્ટમ એક્ટિવ છે. જેના કારણે ગુજરાતમાં અવિરત ક્યાંક ભારે તો ક્યાંક સામાન્ય વરસાદ વરસી રહ્યો છે. છેલ્લા 24 કલાકની સ્થિતિ વિશે વાત કરીએ તો છેલ્લા 24 કલાકમાં 189 તાલુકામાં મેઘરાજા મનમુકીને વરસ્યા છે. સૌથી વધુ મહેસાણાના કડીમાં 4 ઇંચ વરસાદ વરસ્યો છે.