Gujarat Weather Update:હવામાન વિભાગે રાજ્યમાં 15 મે સુધી આકરી ગરમી પડવાની આગાહી વ્યક્ત કરી છે. 10 મેથી એટલે કે કાલથી રાજ્યના મોટાભાગના શહેરોમાં હીટવેવની શક્યતાને પગલે યલો એલર્ટ પણ જાહેર કરવામાં આવ્યું છે. આજે કચ્છ, સુરેન્દ્રનગર, રાજકોટ અને પોરબંદરમાં ગરમીનું યલો એલર્ટ જાહેર કરાયું છે. હવામાન વિભાગ મુજબ આગામી ચાર દિવસમાં મહત્તમ તાપમાનમાં બેથી ત્રણ ડિગ્રીનો વધારો થઈ શકે છે.. કચ્છ-સૌરાષ્ટ્રમાં 15 મે સુધી હીટવેવની અસર રહી શકે છે.. આવતીકાલે કચ્છની સાથે સૌરાષ્ટ્રના દ્વારકા, પોરબંદર, રાજકોટ, ગીર સોમનાથ, અમરેલી, ભાવનગર અને સુરેન્દ્રનગરમાં ગરમીનું યલો એલર્ટ જાહેર કરાયુ છે તો ઉત્તર ગુજરાતના પાટણ,બનાસકાંઠા, મધ્ય ગુજરાતના વડોદરા અને દક્ષિણ ગુજરાતના સુરતમાં ગરમીનું યલો એલર્ટ જાહેર કરાયું છે. સંઘ પ્રદેશ દીવમાં પણ ગરમીનું યલો એલર્ટ જાહેર કરાયું છે. આકરી ગરમીને પગલે હવામાન વિભાગે બપોરના સમયે નાગરિકોને કામ વગર બહાર ન નીકળવાની સલાહ આપી છે..
ગુજરાતમાં હાલ ગરમીનો પારો સતત ઊંચો જઈ રહ્યો છે અને તેના કારણે જનજીવન પર ગંભીર અસર જોવા મળી રહી છે. વિવિધ મીડિયા અહેવાલો મુજબ રાજ્યમાં કાળઝાળ ગરમીનો પ્રકોપ યથાવત છે અને 6થી વધુ શહેરોમાં તાપમાન 40 ડિગ્રી સેલ્સિયસને પાર પહોંચી ગયું છે.
તાજા આંકડા મુજબ વડોદરા રાજ્યનું સૌથી ગરમ શહેર રહ્યું છે, જ્યાં તાપમાન 43.8 ડિગ્રી સેલ્સિયસ નોંધાયું છે. રાજકોટમાં 41.3 ડિગ્રી, સુરતમાં 39.5 ડિગ્રી અને અમદાવાદમાં 39 ડિગ્રી તાપમાન નોંધાયું છે. સુરેન્દ્રનગર સતત બીજા દિવસે રાજ્યનું સૌથી ગરમ શહેર બની રહ્યું છે.
આકાશમાંથી વરસી અગનવર્ષા
સુરેન્દ્રનગર- 44.3 ડિગ્રીઅમદાવાદ- 43.1 ડિગ્રીરાજકોટ - 42.8 ડિગ્રીગાંધીનગર- 42.8 ડિગ્રીઅમરેલી- 42.7 ડિગ્રીડીસા - 41.8 ડિગ્રીવડોદરા- 41.6 ડિગ્રીવલ્લભવિદ્યાનગર- 41.5 ડિગ્રીભૂજ - 41.2 ડિગ્રીકેશોદ- 40.6 ડિગ્રીભાવનગર- 40.0 ડિગ્રી
હવામાન વિભાગે આગામી દિવસોને લઈને ગંભીર ચેતવણી આપી છે. 10 મે થી રાજ્યમાં ગરમીનો પ્રકોપ વધુ વધવાની શક્યતા છે અને હીટવેવની સ્થિતિ સર્જાઈ શકે છે. ખાસ કરીને અમદાવાદ, રાજકોટ, કચ્છ અને સુરેન્દ્રનગર જેવા વિસ્તારોમાં યલો એલર્ટ જાહેર કરવામાં આવ્યું છે. કેટલાક વિસ્તારોમાં તાપમાન 44 ડિગ્રી સુધી પહોંચી શકે તેવી શક્યતા વ્યક્ત કરવામાં આવી છે.
બીજી તરફ, રાજ્યના હવામાનમાં અચાનક ફેરફાર પણ જોવા મળી રહ્યો છે. ગરમી વચ્ચે જ એક નવી વરસાદી સિસ્ટમ સક્રિય થતાં પાંચ જિલ્લાઓમાં કમોસમી વરસાદની આગાહી કરવામાં આવી છે. ગીર વિસ્તારમાં મિની વાવાઝોડા સાથે વરસાદ વરસ્યો છે, જેના કારણે વૃક્ષો પડવાની ઘટનાઓ પણ નોંધાઈ છે. કચ્છમાં પણ કમોસમી વરસાદ પડ્યો છે, જ્યારે અમદાવાદમાં વીજળીના કડાકા સાથે ભારે પવન અને વરસાદી માહોલ સર્જાયો હતો.
આ કઠિન પરિસ્થિતિને ધ્યાનમાં રાખીને વહીવટીતંત્ર પણ સજ્જ બન્યું છે. અમદાવાદના કાંકરિયા ઝૂમાં વન્યજીવોને ગરમીથી બચાવવા માટે ખાસ એર કૂલર અને ગ્રીન નેટની વ્યવસ્થા કરવામાં આવી છે.ઉનાળાની આ સીઝનમાં લીંબુના ભાવમાં પણ મોટો ઉછાળો જોવા મળ્યો છે, જેના કારણે સામાન્ય જનતાના ખિસ્સા પર વધારાનો ભાર પડી રહ્યો છે. હવામાન વિભાગ અને તંત્ર દ્વારા લોકોને પૂરતું પાણી પીવા, બપોરના સમયે બહાર ન નીકળવા અને સુરક્ષિત રહેવા માટે સતત અપીલ કરવામાં આવી રહી છે