Gujarat solar panel subsidy: આજના સમયમાં વધતા જતા વીજળીના બિલ માત્ર ઉનાળામાં જ નહિ, પરંતુ શિયાળામાં પણ લોકોના ખિસ્સા ખાલી કરી રહ્યા છે. શિયાળામાં ગીઝર અને હીટર જેવા ઉપકરણોના સતત ઉપયોગને કારણે વીજળીનું બિલ ઘણું વધારે આવે છે.
આ સમસ્યામાંથી કાયમી રાહત મેળવવા માટે હવે મોટાભાગના લોકો પોતાના ઘરની છત પર સોલાર પેનલ લગાવી રહ્યા છે. જો તમે પણ ગુજરાતના રહેવાસી છો અને સોલાર પેનલ લગાવવાનું વિચારી રહ્યા છો, તો તમારા માટે એક ખૂબ જ ખાસ અને ઉપયોગી અપડેટ છે.
ગુજરાત સરકારે પ્રધાનમંત્રી સૂર્ય ઘર મફત વીજળી યોજના અંતર્ગત 1,000 કરોડ રૂપિયાની વધારાની સબસિડી આપવાની મોટી જાહેરાત કરી છે. સરકારના આ નિર્ણયનો સીધો અર્થ એ છે કે, સોલાર પેનલ લગાવવા પાછળ થતા લોકોના ખર્ચમાં હવે નોંધપાત્ર ઘટાડો થશે.
આ નવી સહાયથી રાજ્યના લાખો પરિવારોને સીધો આર્થિક ફાયદો થવાની પૂરી અપેક્ષા છે. ચાલો વિગતવાર જાણીએ કે સોલાર પેનલ લગાવવા માટે સરકાર તરફથી કયા વર્ગને કેટલી સબસિડી મળશે.
સામાન્ય અને SC/ST વર્ગ માટે સબસિડીની વિગતો
ગુજરાત સરકારની આ નવી સિસ્ટમ હેઠળ દરેક વર્ગને એકસરખી સબસિડી મળશે નહીં. સામાન્ય શ્રેણી (General Category) ના પરિવારોએ સૌર સિસ્ટમની નક્કી કરેલી કિંમતના માત્ર 10 ટકા રકમ પોતાના ખિસ્સામાંથી ચૂકવવાની રહેશે.
1 કિલોવોટ સોલાર સિસ્ટમ: આ સિસ્ટમની નિશ્ચિત કિંમત 54,000 રૂપિયા છે. જેમાં સામાન્ય શ્રેણીના પરિવારે માત્ર 5,400 રૂપિયા ચૂકવવા પડશે.
2 કિલોવોટ સોલાર સિસ્ટમ: આ મોટી સિસ્ટમની નિશ્ચિત કિંમત 1,07,200 રૂપિયા છે. જેમાં સામાન્ય શ્રેણીના પરિવારે 10,720 રૂપિયાની ચૂકવણી કરવાની રહેશે.
અનુસૂચિત જાતિ અને અનુસૂચિત જનજાતિ (SC/ST) વર્ગના પરિવારોને સરકાર તરફથી વિશેષ રાહત આપવામાં આવી છે. આ વર્ગના પરિવારોએ સિસ્ટમની કિંમતના માત્ર 5 ટકા જ ચૂકવવાના રહેશે.
1 કિલોવોટ સોલાર સિસ્ટમ: આ સિસ્ટમની નિશ્ચિત કિંમત 54,000 રૂપિયા છે. પરંતુ SC/ST પરિવારે પોતાના ખિસ્સામાંથી માત્ર 2,700 રૂપિયા જ આપવા પડશે.
2 કિલોવોટ સોલાર સિસ્ટમ: આ સિસ્ટમની કિંમત 1,07,200 રૂપિયા છે. જેની સામે SC/ST પરિવારે માત્ર 5,360 રૂપિયા ચૂકવવાના રહેશે.
અહીં સૌથી મોટો પ્રશ્ન એ થાય કે બાકીની રકમ કોણ ચૂકવશે? તો તમને જણાવી દઈએ કે, સોલાર પેનલનો બાકીનો તમામ ખર્ચ કેન્દ્ર સરકાર અને ગુજરાત સરકાર દ્વારા અપાતી સબસિડીમાંથી આવરી લેવામાં આવશે.
અરજી કરવા માટે જરૂરી દસ્તાવેજો અને પ્રક્રિયા
આ યોજનાનો લાભ લેવા માટે તમારી પાસે કેટલાક જરૂરી દસ્તાવેજો હોવા ફરજિયાત છે. જેમાં તમારું તાજેતરનું વીજળી બિલ, આધાર કાર્ડ, બેંક પાસબુક અને ચાલુ હોય તેવો મોબાઈલ નંબર હોવો જરૂરી છે. આ ઉપરાંત અન્ય કયા દસ્તાવેજોની જરૂર પડશે, તેની સચોટ માહિતી તમે સત્તાવાર પોર્ટલ પર જઈને ચકાસી શકો છો.
અરજી કેવી રીતે કરવી?
સૌ પ્રથમ તમારે કેન્દ્ર સરકારના સત્તાવાર 'પીએમ સૂર્ય ઘર પોર્ટલ' પર જવાનું રહેશે.
ત્યાં તમારા રાજ્યનું નામ, વીજળી કંપનીનું નામ અને તમારો વીજ ગ્રાહક નંબર (કન્ઝ્યુમર નંબર) દાખલ કરો.
ત્યારબાદ તમારા મોબાઈલ નંબર પર એક OTP આવશે, તેને દાખલ કરીને રજિસ્ટ્રેશન પૂરું કરો.
ફોર્મમાં માંગેલી બધી જ વિગતો ધ્યાનથી ભરો અને તમારી અરજી સબમિટ કરો.
અરજી કર્યા બાદ તમારે વીજળી કંપની તરફથી ટેકનિકલ મંજૂરી (Technical Approval) મળવાની રાહ જોવી પડશે.
મંજૂરી મળી ગયા પછી, પોર્ટલ પર નોંધાયેલા અધિકૃત વિક્રેતા (Vendor) પાસેથી નિયમો અનુસાર સોલાર સિસ્ટમ ઈન્સ્ટોલ કરાવો.
સોલાર સિસ્ટમ લાગી ગયા પછી, નેટ મીટર લગાવવા માટે ફરીથી અરજી કરો.
અંતે, કમિશનિંગ સર્ટિફિકેટ મળી ગયા બાદ તમારી બેંકની વિગતો પોર્ટલ પર સબમિટ કરો.