Gujarat TRB Salary Hike: ટ્રાફિક બ્રિગેડ જવાનોના પગારમાં 50% નો મોટો વધારો, જાણો હવે રોજ કેટલા રૂપિયા મળશે?

TRB Jawan Salary Hike Gujarat: હવેથી દૈનિક ₹300 ના બદલે ₹450 ચૂકવાશે; રાજ્યના 10,000 થી વધુ પરિવારોમાં ખુશીની લહેર, નાયબ મુખ્યમંત્રીએ જવાનોને ગણાવ્યા 'ખરા સૈનિક', આજથી જ અમલ.

ટ્રાફિક બ્રિગેડ જવાનોના પગારમાં 50% નો મોટો વધારો

Show Quick Read

Key points generated by AI, verified by newsroom

• TRB જવાનોનું દૈનિક વેતન ₹300 થી વધારીને હવે ₹450 કરવામાં આવ્યું છે.
• પગારમાં સીધો ₹150 (50%) નો મોટો વધારો થયો છે.
• આ પગાર વધારાનો નિર્ણય આજથી જ લાગુ ગણાશે.
• રાજ્યના 10,000 થી વધુ જવાનો અને તેમના પરિવારોને આનો ફાયદો થશે.
• નાયબ મુખ્યમંત્રી હર્ષ સંઘવીએ TRB જવાનોને 'ટ્રાફિકના ખરા સૈનિક' ગણાવ્યા છે.

TRB Jawan Salary Hike Gujarat: ગુજરાતના માર્ગો પર ટાઢ, તડકો અને વરસાદ જોયા વિના ફરજ બજાવતા ટ્રાફિક બ્રિગેડ (Traffic Brigade - TRB) ના જવાનો માટે રાજ્ય સરકારે એક અત્યંત સંવેદનશીલ અને આવકારદાયક નિર્ણય લીધો છે. મુખ્યમંત્રી ભૂપેન્દ્ર પટેલના નેતૃત્વમાં અને નાયબ મુખ્યમંત્રી હર્ષ સંઘવી (Harsh Sanghvi) ના માર્ગદર્શન હેઠળ ગૃહ વિભાગે TRB જવાનોના આર્થિક હિતને ધ્યાનમાં રાખીને તેમના દૈનિક માનદ વેતન (Daily Honorarium) માં ધરખમ વધારો કરવાની જાહેરાત કરી છે.

પગારમાં કેટલો વધારો થયો?

ગૃહ વિભાગના નવા નિર્ણય મુજબ, અત્યાર સુધી TRB જવાનોને દૈનિક ₹300 ચૂકવવામાં આવતા હતા. જેમાં હવે સીધો ₹150 નો વધારો કરવામાં આવ્યો છે. એટલે કે, હવેથી ટ્રાફિક બ્રિગેડના જવાનોને દૈનિક ₹450 નું માનદ વેતન મળશે. આ વધારો આજથી જ અમલી ગણાશે. આ નિર્ણયનો સીધો ફાયદો રાજ્યભરમાં ફરજ બજાવતા અંદાજે 10,000 થી વધુ જવાનો અને તેમના પરિવારોને થશે.

'TRB જવાનો ટ્રાફિકના ખરા સૈનિક છે': હર્ષ સંઘવી

આ મહત્વપૂર્ણ જાહેરાત કરતા નાયબ મુખ્યમંત્રી હર્ષ સંઘવીએ જણાવ્યું હતું કે, "રાજ્યની ટ્રાફિક વ્યવસ્થાપન (Traffic Management) સુદ્રઢ બનાવવામાં TRB જવાનોની ભૂમિકા કોઈ સૈનિકથી ઓછી નથી. કાળઝાળ ગરમી હોય કે ધોધમાર વરસાદ, આ જવાનો પ્રજાની સુરક્ષા અને સુવિધા માટે રસ્તા પર અડીખમ ઉભા રહે છે. તેમના આ પરિશ્રમ અને સમર્પણની કદર કરીને રાજ્ય સરકારે આ આર્થિક પ્રોત્સાહન આપવાનો નિર્ણય કર્યો છે."

2018 નો ઠરાવ બદલાયો

ઉલ્લેખનીય છે કે, સુરત, રાજકોટ અને વડોદરા જેવા મહાનગરોમાં ટ્રાફિક એજ્યુકેશન ટ્રસ્ટ દ્વારા શરૂ થયેલી આ વ્યવસ્થા આજે સમગ્ર ગુજરાતમાં પોલીસને પૂરક બનીને કામ કરી રહી છે. વર્ષ 2018 ના ઠરાવ મુજબ જવાનોને ₹300 મળતા હતા, જે મોંઘવારીના સમયમાં અપૂરતા હતા. સરકારના આ નવા નિર્ણયથી જવાનોના જીવનધોરણમાં સુધારો થશે અને તેઓ વધુ ઉત્સાહથી ફરજ બજાવી શકશે. આજથી જ આ વધેલા વેતનનો લાભ મળવાનો શરૂ થઈ જશે, જેનાથી TRB પરિવારમાં દિવાળી જેવો માહોલ સર્જાયો છે.