રાજુ કરપડાની લાલજી દેસાઈ સાથેની મુલાકાતથી રાજકીય ગરમાવો: AAP સાથે છેડો ફાડ્યા બાદ નવા જૂનીના સંકેત?

AAP ના પૂર્વ નેતા રાજુ કરપડાએ સેવાદળના રાષ્ટ્રીય અધ્યક્ષ લાલજી દેસાઈની મુલાકાત લીધી. અમિત ચાવડા અને પાલ આંબલીયાની હાજરીમાં થયેલી આ મુલાકાતે ગુજરાતમાં રાજકીય ગરમાવો વધાર્યો છે.

Raju Karpada Lalji Desai Sevadal Meeting

Source : abp asmita

Show Quick Read

Key points generated by AI, verified by newsroom

ગુજરાતના રાજકારણમાં સ્થાનિક સ્વરાજ્યની ચૂંટણીઓ પહેલા મોટા ઉલટફેરના સંકેતો મળી રહ્યા છે. આમ આદમી પાર્ટી (AAP) ના કિસાન સેલના પૂર્વ પ્રમુખ રાજુ કરપડાએ આજે (20 February, 2026) કોંગ્રેસ સેવા દળના રાષ્ટ્રીય અધ્યક્ષ લાલજી દેસાઈની ખાસ મુલાકાત લીધી હતી. આ મુલાકાત દરમિયાન ગુજરાત કોંગ્રેસના દિગ્ગજ નેતા અમિત ચાવડા અને પાલ આંબલીયા પણ ઉપસ્થિત રહ્યા હતા. સત્તાવાર રીતે આ મુલાકાત લાલજી દેસાઈના ખબર અંતર પૂછવા માટે હોવાનું જણાવાયું છે, પરંતુ રાજુ કરપડાએ તાજેતરમાં જ AAP માંથી આપેલા રાજીનામા બાદ આ બેઠકને કારણે તેઓ કોંગ્રેસમાં જોડાશે તેવી અટકળોએ જોર પકડ્યું છે.

AAP ને મોટો ફટકો: કિસાન નેતાએ 5 વર્ષના સાથ બાદ આપ્યું રાજીનામું

નોંધનીય છે કે, ચોટીલા વિધાનસભા બેઠક પરથી ચૂંટણી લડી ચૂકેલા અને સૌરાષ્ટ્ર ઝોનના પ્રભારી રહી ચૂકેલા રાજુ કરપડાએ અરવિંદ કેજરીવાલને પોતાનું રાજીનામું મોકલી આપ્યું હતું. છેલ્લા 5 વર્ષથી પાર્ટીમાં અત્યંત સક્રિય અને 'ઝુઝારૂ નેતા' તરીકે ઓળખાતા કરપડાએ રાજીનામા પાછળ વ્યક્તિગત કારણોનો હવાલો આપ્યો હતો. જોકે, રાજકીય વર્તુળોમાં ચર્ચા છે કે પાર્ટીના અન્ય નેતા ગોપાલ ઈટાલિયા સાથેની લાંબા સમયની નારાજગી આ નિર્ણય પાછળનું મુખ્ય કારણ હોઈ શકે છે. અગાઉ બોટાદના ધારાસભ્ય ઉમેશ મકવાણાએ પણ પાર્ટી છોડતા AAP ની મુશ્કેલીઓ વધી છે.

ખેડૂત આંદોલનથી જેલ સુધીની સફર

રાજુ કરપડાની ઓળખ હંમેશા ખેડૂતોના હિત માટે લડનારા નેતા તરીકે રહી છે. વર્ષ 2021 22 માં AAP માં જોડાયા બાદ તેમણે કિસાન વિંગને મજબૂત કરી હતી. હડદડ ગામે થયેલી હિંસા અને કડદા પ્રથાના વિવાદમાં તેમની ધરપકડ પણ થઈ હતી. તાજેતરમાં જ તેઓ જેલમુક્ત થયા હતા. તેમના રાજીનામાના પત્રમાં તેમણે ભાવુક થઈને લખ્યું કે, "પાર્ટીને મજબૂત કરવા મેં પરિવારથી વધુ સમય આપ્યો છે, પરંતુ કુદરતે અહીં સુધીનો જ સાથ લખ્યો હતો."

કોંગ્રેસ નેતાઓ સાથેની મુલાકાત શું સૂચવે છે?

લાલજી દેસાઈની મુલાકાત સમયે કોંગ્રેસના નેતાઓની હાજરી સૂચવે છે કે વિપક્ષી ખેમામાં નવા સમીકરણો રચાઈ રહ્યા છે. રાજુ કરપડા જેવા મજબૂત કિસાન નેતા જો કોંગ્રેસમાં જોડાય છે, તો સૌરાષ્ટ્રમાં સ્થાનિક સ્વરાજ્યની ચૂંટણીમાં સમીકરણો બદલાઈ શકે છે. રાજુ કરપડાએ સોશિયલ મીડિયા પર પોતાની પોસ્ટમાં તમામ સાથીઓનો આભાર માન્યો હતો, પરંતુ તેમના આગામી કદમ વિશે હજુ સુધી કોઈ સ્પષ્ટતા કરી નથી.

આ પણ વાંચો

ધોલેરા બનશે ભારતનું ‘AI હબ’: L&T વ્યોમાના ₹25,000 કરોડના રોકાણથી ગુજરાતમાં ડેટા ક્રાંતિના મંડાણ!