Thakor Samaj Rules: ડીજે વિવાદ પર ગેનીબેન અડગ, અલ્પેશ ઠાકોરે કહ્યું- 'બેસીને રસ્તો કાઢીશું'
પાટડી-દસાડા સંમેલન: લગ્નમાં માત્ર 100 જાનૈયા અને 21,000 ના કરિયાવરનો નિર્ણય; ગેનીબેને કહ્યું- '2027 સુધી નિયમોમાં કોઈ ફેરફાર નહીં', અલ્પેશ ઠાકોરે દસાડા PI ની બદલીની કરી માંગ.
Thakor Samaj Constitution: પાટડી અને શંખેશ્વર (Patdi/Shankheshwar) ખાતે યોજાયેલા ભવ્ય સમારોહમાં ગુજરાતના ક્ષત્રિય ઠાકોર સમાજે (Kshatriya Thakor Samaj) સામાજિક સુધારાની દિશામાં એક મોટું અને ઐતિહાસિક પગલું ભર્યું છે. સુરેન્દ્રનગરના પાટડી-દસાડા ખાતે યોજાયેલા આ સંમેલનમાં સમાજના નવા 'બંધારણ' (Constitution) અને પ્રવર્તમાન કુરિવાજો પર મહત્વપૂર્ણ ચર્ચા થઈ હતી. આ દરમિયાન લગ્ન પ્રસંગે 'ડીજે સાઉન્ડ સિસ્ટમ' (DJ Sound System) ના પ્રતિબંધને લઈને ચાલી રહેલા વિવાદ પર સમાજના બે દિગ્ગજ નેતાઓ, અલ્પેશ ઠાકોર અને ગેનીબેન ઠાકોરે પોતપોતાની પ્રતિક્રિયા આપી હતી.
વાવ-થરાદના સાંસદ ગેનીબેન ઠાકોરે (Geniben Thakor) ડીજેના મુદ્દે અત્યંત કડક અને સ્પષ્ટ વલણ અપનાવ્યું હતું. તેમણે મંચ પરથી શબ્દો ચોળ્યા વગર કહ્યું હતું કે, "ડીજે વાળી વાતમાં હવે કોઈએ ચર્ચા કરવાની જ નથી અને તેમાં કોઈ ફેરફાર કરવાનો નથી. એકવાર આ બંધારણ પાસ થઈ ગયું છે, હવે 2027 સુધી તેમાં કોઈ સુધારો કરવામાં આવશે નહીં." આ નિવેદન સ્પષ્ટ કરે છે કે સમાજ હવે નિયમોના પાલન બાબતે ગંભીર છે.
ગેનીબેને 'સોશિયલ મીડિયા' (Social Media) પર સક્રિય યુવાનોનો આભાર માનતા કહ્યું હતું કે, જે લોકો સમાજના નિયમો તોડે છે તેમની સામે સોશિયલ મીડિયા વોરિયર્સ તૂટી પડે છે તે સારી બાબત છે અને જાગૃતિનું કામ કરે છે. પરંતુ સાથે સાથે તેમણે યુવાનોને ટકોર પણ કરી હતી કે ટીકા કરતી વખતે ભાષામાં મર્યાદા જળવાવી જોઈએ. તેમણે ઉમેર્યું હતું કે આપણા બંધારણ બાદ અન્ય 6 થી 7 સમાજોએ પણ ડીજે પ્રથા બંધ કરવાનો નિર્ણય લીધો છે, જે ગર્વની બાબત છે.
બીજી તરફ, ગાંધીનગર દક્ષિણના ધારાસભ્ય અલ્પેશ ઠાકોરે (Alpesh Thakor) થોડું નરમ અને સમાધાનકારી વલણ દાખવ્યું હતું. તેમણે કહ્યું હતું કે, "આ બંધારણ કોઈ એક વ્યક્તિએ નથી બનાવ્યું, પરંતુ સમગ્ર સમાજે બનાવ્યું છે. ડીજે વિવાદનો ઉકેલ આપણે સાથે બેસીને લાવી શકીશું." તેમનો મત હતો કે બંધારણનો કડક અમલ એટલે માત્ર કાર્યવાહી નહીં, પરંતુ જો બધાને સહમત કરીને અમલવારી થાય તો જ સમાજનું સાચું ભલું થશે.
કાર્યક્રમમાં વાલેવડા ગામમાં દારૂના પ્રશ્ને અને પોલીસની કામગીરી મુદ્દે અલ્પેશ ઠાકોર આક્રમક મૂડમાં જોવા મળ્યા હતા. તેમણે દસાડા PI ની તાત્કાલિક બદલી કરવાની ઉગ્ર માંગ કરી હતી અને જાહેર મંચ પરથી હુંકાર કર્યો હતો કે નિર્દોષ લોકો પર થયેલી ખોટી ફરિયાદો (False Complaints) પરત ખેંચવામાં આવે. ગેનીબેને પણ પોલીસને ટકોર કરતા કહ્યું હતું કે યુવાનો પર ખોટા કેસ ન કરે અને બુટલેગરોને સાથ આપવાનું બંધ કરે.
આ સંમેલનમાં ખોટા ખર્ચ અને દેખાડા પર રોક લગાવવા માટે કેટલાક કડક નિયમો (Strict Rules) જાહેર કરવામાં આવ્યા હતા, જેનું પાલન કરવું ફરજિયાત રહેશે. નવા નિયમો મુજબ, લગ્નમાં જાન લઈને જતી વખતે માત્ર 100 લોકોએ જ જવું. આ ઉપરાંત, દીકરીના પિતાએ 'કરિયાવર' (Dowry/Gifts) તરીકે મહત્તમ 21,000 રૂપિયા સુધીની જ ભેટ આપવી, જેથી ગરીબ અને મધ્યમ વર્ગના પરિવારો પર આર્થિક બોજ ન પડે.
સમાજના આગેવાનોએ નક્કી કર્યું છે કે સામાજિક અને લગ્ન પ્રસંગોમાં ડીજે વગાડવા પર સંપૂર્ણ મનાઈ રહેશે. જો કોઈ આ નિયમનો ભંગ કરશે તો સમાજ દ્વારા દંડનીય કાર્યવાહી થઈ શકે છે. આ તમામ મુદ્દાઓ પર વધુ ચર્ચા કરવા અને અમલવારી ચકાસવા માટે 10 દિવસ બાદ તમામ આગેવાનો ફરી એકત્રિત થશે.
ટોપ સ્ટોરી
ટ્રેન્ડિંગ સમાચાર
