ખેડૂતોના માથે આભ ફાટ્યું! 12 જિલ્લામાં કમોસમી વરસાદથી મગફળીના પાથરા પલળ્યા, માર્કેટ યાર્ડમાં ડાંગરને બચાવવા દોડધામ
Heavy rainfall Gujarat: સૌરાષ્ટ્રના મુખ્ય જિલ્લાઓમાં કમોસમી વરસાદનું જોર જોવા મળ્યું, જેનાથી ખેડૂતોની ચિંતા વધી છે.
Rain in Gujarat: હવામાન વિભાગની આગાહી વચ્ચે ગુજરાતના સૌરાષ્ટ્ર, દક્ષિણ અને મધ્ય ગુજરાત ના અનેક જિલ્લાઓમાં કમોસમી વરસાદ (માવઠું) વરસ્યો છે, જેના કારણે ખેડૂતોની મુશ્કેલીમાં ભારે વધારો થયો છે. જૂનાગઢ ના ચોરવાડ, ગીર સોમનાથ ના વેરાવળ-સોમનાથ, અમરેલી ના ધારી-ખાંભા, વલસાડ-સુરત-નવસારી અને પંચમહાલ-દાહોદ સહિતના વિસ્તારોમાં પવન સાથે ધોધમાર વરસાદ પડ્યો છે. આ અણધાર્યા વરસાદથી ખેતરમાં લણણી કરેલા મગફળીના પાથરા, ડાંગર, સોયાબીન, ચીકુ અને પશુઓનો ઘાસચારો પલળી જતાં પાકની ગુણવત્તા બગડવાનો અને આર્થિક નુકસાન થવાનો ભય ખેડૂતોને સતાવી રહ્યો છે. વરસાદી પાણી બજારો અને મંદિરોમાં પણ ભરાતા જનજીવન પ્રભાવિત થયું છે.
સૌરાષ્ટ્રમાં કમોસમી વરસાદ: ખેતરોમાં મગફળીના પાથરા પલળ્યા
સૌરાષ્ટ્રના મુખ્ય જિલ્લાઓમાં કમોસમી વરસાદનું જોર જોવા મળ્યું, જેનાથી ખેડૂતોની ચિંતા વધી છે. જૂનાગઢ જિલ્લાના ચોરવાડ અને આસપાસના વિસ્તારોમાં ભારે પવન સાથે વરસાદ વરસતા રોડ-રસ્તા પર પાણી ભરાયા હતા. માળીયા હાટીના ના ભંડુરી, પાણીધ્રા ગીર સહિતના ગ્રામ્ય વિસ્તારોમાં ધીમીધારે વરસાદ નોંધાયો. કેશોદ શહેર અને પંથકમાં વરસાદ પડતા ખેતરોમાં તૈયાર પડેલા મગફળી અને સોયાબીન ના પાકને મોટું નુકસાન થવાની ભીતિ છે.
ગીર સોમનાથ જિલ્લામાં પણ વેરાવળ-સોમનાથ શહેર સહિત એસટી બસ સ્ટેશન અને તપેશ્વર મંદિર રોડ પર ધોધમાર વરસાદને કારણે પાણી ભરાયા હતા. તપેશ્વર રોડ પરના શિવ મંદિરમાં પણ પાણી ભરાવવાની ઘટના બની. અમરેલી જિલ્લાના ધારી ના ત્રંબકપુર અને ખાંભા પંથકમાં પણ જોરદાર વરસાદ વરસ્યો, જેનાથી ખેડૂતોને તૈયાર પાક અને સૂકા ઘાસચારાને બચાવવા માટે દોડધામ કરવી પડી. પોરબંદર ના માધવપુર અને આસપાસના ગ્રામ્ય વિસ્તારોમાં પણ કાળા ડિબાંગ વાદળો સાથે વરસાદી ઝાપટા પડ્યા હતા. ખેડૂતોની મુખ્ય વ્યથા એ છે કે જો આ માવઠું ચાલુ રહેશે, તો લણણી કરેલો મગફળીનો પાક સડી જશે અને પશુઓ માટેનો ચારો પણ નકામો બની જશે.
દક્ષિણ ગુજરાતમાં માવઠું: ડાંગર, ચીકુના પાકને નુકસાનનો ડર
હવામાન વિભાગની આગાહી વચ્ચે દક્ષિણ ગુજરાતના જિલ્લાઓમાં પણ કમોસમી વરસાદ વરસ્યો, જેનાથી ઉભા પાકને નુકસાન થવાની ચિંતા વધી છે. વલસાડ શહેરમાં પવન સાથે વરસાદ વરસતા રોડ-રસ્તા પાણી પાણી થયા, અને સાંજના સમયે વિઝિલિબિટી ઘટતાં વાહનચાલકોને હાલાકી ભોગવવી પડી. વાપી શહેર, ઉમરગામ અને કપરાડા તાલુકામાં પણ વરસાદ નોંધાયો. ઉમરગામના નારગોલ દરિયાકાંઠે વરસાદ પડતાં દિવાળી વેકેશન માણવા આવેલા પર્યટકો ભીંજાયા હતા.
સુરત શહેરના ડુમસ દરિયાકાંઠે ભારે પવન સાથે વરસાદ પડ્યો, જ્યારે વેસુ વિસ્તારના રસ્તાઓ તરબોળ થયા. નવસારી શહેર અને ગણદેવી તાલુકાના બીલીમોરામાં પણ ધોધમાર વરસાદ વરસ્યો. આ કમોસમી વરસાદને કારણે ડાંગર, ચીકુ જેવા મહત્વના પાકને નુકસાન થવાની ભીતિ ખેડૂતોને સતાવી રહી છે. તાપી જિલ્લાના ઉચ્છલ તાલુકાના નારણપુરા અને ડાંગ જિલ્લાના આહવામાં પણ કમોસમી વરસાદ વરસતાં ડાંગર, વરાઈ, નાગલી અને કઠોળ ના તૈયાર પાકને ભારે નુકસાન થવાની સંભાવના છે.
મધ્ય ગુજરાતમાં બજાર યાર્ડમાં દોડધામ: ડાંગરને મોટો ફટકો
મધ્ય ગુજરાતના જિલ્લાઓમાં પણ કમોસમી વરસાદે ખેડૂતોની ચિંતા વધારી છે. દાહોદ, મહીસાગર અને પંચમહાલ જિલ્લામાં માવઠું જોવા મળ્યું. પંચમહાલ ના ગોધરા શહેર અને ગ્રામ્ય વિસ્તારોમાં પવન સાથે વરસાદ વરસ્યો. સૌથી વધુ હાલાકી કાકણપુર માર્કેટ યાર્ડ માં થઈ, જ્યાં ડાંગર ની ખરીદી ચાલુ હતી ત્યારે જ વરસાદ વરસતા ખેડૂતો અને વેપારીઓ પોતાનો પાક પલળતો બચાવવા દોડાદોડી કરતા જોવા મળ્યા. શહેરા તાલુકાના ગ્રામ્ય વિસ્તારોમાં વરસાદથી ડાંગર અને ઘાસચારા ને મોટા પાયે નુકસાન થયું છે. મહીસાગર ના બાલાસિનોર અને દાહોદ ના ઝાલોદ શહેરમાં ધીમીધારે વરસાદ પડતાં રસ્તાઓ પાણીથી ભરાયા હતા, અને ખેતીના પાકને થતા નુકસાનથી ખેડૂતોમાં ચિંતાના વાદળો ઘેરાયા છે.
ટોપ સ્ટોરી
ટ્રેન્ડિંગ સમાચાર
